در احوالات حضرت امام حسین (علیه السلام)

مهرون اولدی قلبیمین ملکینده سلطان یاحسین

 ویردون عشقین دولتیلن قلبه سامان یاحسین

سن بو ویران ملکی آباد ایلیوبسن من ولی

ایلدیم یوز معصیتلن ملکی ویران یاحسین

قلبیمین ملکی سنون تک شاه چون لایق دگول

نینییم بو عشقه وار قلبیمده ایمان یا حسین

فخر ایدیب گهوارووی تر پتمگه روح الامین

جبرئیلون شه پرینده عرشه مهمان یاحسین

کورپه لیکده عرش الرحمانی تسخیر ایلدون

عرش الرحمان قالوب شانینده حیران یاحسین

انبیا ایلور زیارت آستان قدسووی

آستانونده دوشوب توپراقه مین جان یاحسین

هر مکاندا گلسه آدون اول مکانین توپراقین

سرمه ایلر گوزلره حوریله قلمان یاحسین

سن کی نصرانیله ترسانون ویرورسن حاجتین

سسلیور عیسا ایلن موسی ابن عمران یاحسین

منده محتاجم سنه قابل اگر بیلسون حقیر

وار امیدیم  مور اولام سنده سلیمان یاحسین

معتکف درگاهووه اولسا هر عارف بیر گجه

 بیر گجه ختم ایلیر یوز ایلیگ عرفان یاحسین

در گهینده باغلا زنجیرایله گردیوانه ام

نینیرم سنسیز اولام حکمتده لقمان یاحسین

ایستورم  نظمه چکم  شخ شوشتریدن بیر سوزی

نیتیم واردور اولا بوشعره عنوان یاحسین

یازماقا بو مطلبی خالیقدن امداد ایسترم

ایسترم کی اولمیا شعریمده نقصان یاحسین

وار صفاتونده  عیان  اهل کسانون خصلتی

أل طاها ایچره قدری شانی شایان یاحسین

جدون احمد تک جمالونده نبوت نوری وار

ای گونش  سندندی اولموش پرتو افشان یاحسین

صولتون حیدر کیمین غرا بلاغت صاحبیی

 ذالفقارین وارثی زرقام میدان یاحسین

عصمتو ن کانی حقه مظهر فظیلت معدنی

عصمتینده فاطمه اولموش نمایان یاحسین

حسنیده سنسن حسن قارداشوویلن همتراز

سجده ایلر صبرووه هر صابر انسان یاحسین

فوج اعداایله تک جنگه چیخوب جولان ایدن

جنگینه حیران قالان چوللرده آصلان یاحسین

الده جان نقدی یاراتدون کربلانین نهضتین

باغلیان اللهیلن عشق اوسته پیمان یاحسین

ظلمه بی داد ایلین مظلومه امداد ایلین

بس نیه ائولدون ائوزون مظلوم دوران یاحسین

یوز ایگیرم دورت مین نبی حق گسترن آئینه ده

گل جمالین گوردولر قانیله الوان یاحسین

سجده گاهین قاندی محرابین دولی  غم  جلوه سی

قیلمیوبدور بو نمازی هچ مسلمان یاحسین

چخدی دعوایه سنیلن سعدین اوغلی بیلمدی

عاقبت شمشیرینه پیروز ائولار قان یاحسین

قانووی توکدی ارازل سانکی قرآن جوهری

ایندیده بیلموله کی سنسیز نه قران یاحسین

الی مین یول ختم قران بیر سنه وابسته دور

یوخساکی باطلدی مین حجیله احسان یاحسین

سن بویاندون قانه اما نهضتون پاینده دی

جان عالم نهضت خونباره قربان یاحسین

هر شهیدون قانینین اجری بهشت اولسا اگر

قانوا قابیل اولامز باغ رضوان یاحسین

حضرت زهرا گلوبدور مقتله آغلور سنه

اوخشیور زینب سنی اولموش نواخوان یاحسین

سسلیور  اطشان حسین زینب سنه قربان حسین

یاندورور آهی جهانی ایلور افقان یاحسین

آی یتیملیک دردینه تاب ایلین دور گور نجه

فاطمه عطریله دولموش بو بیابان یاحسین

پارلیان زهرا اوینده بیر گونی گون تک یوزی

قان بولود تک جسمیوی ایلوبدی پنهان یاحسین

جسموه ضربت ووران ظالم بونی بیلمور مگر

جسمین اطهردور ایاقیندن اوپر جان یاحسین

تک قویوبسان سن پریشان زینبی بو عرصه ده

ئولمین باجون داغیلمیش جسمه قربان یاحسین

ایستموردی آیریلا سندن باجون بو دهریده

ایستیور سندن سورا بو عمره پایان یاحسین

اودلانان گوندن رسالت در گهی غم چکمیشم

ایندیده اولدوم سنون یاسینده نالان یاحسین

آستانوندن سنون چوخلار آلور درده دوا

ایستیور سندن (حسنده) درده درمان یاحسین

شاعر : حسنعلی بالایی

منبع : کانال اشعار حسنعلی بالایی