زبانحال حضرت فاطمه زهرا (سلام الله)

زبانحال حضرت فاطمه زهرا (سلام الله)

گل جان ویرورم آیریلورام سندن عم اوغلی

آیریلما نه قدر ئولمه میشم مندن عم اوغلی

هر دم ئولوم آثاری اولور منده نمایان

صون وقتلریمدور منیم ای سرور دوران

قرآن سسیوی چوخ سویرم گَل اوخی قرآن

آیریلما نه قدر ئولمه میشم مندن عم اوغلی

بلبل ستم خاریله آیریلدی چمندن

من دویمادیم عالمده حسینیله حسندن

آز قالدی چخا فاطمه نین روحی بدندن

آیریلما نه قدر ئولمه میشم مندن عم اوغلی

هرگز دیمورم آغلاما، یان سینوی داغلا

جان تاپشورورام آغلا، صاق اولسون باشون آغلا

قوی فاطمه ئولسون گوزون اوندان صورا باغلا

آیریلما نه قدر ئولمه میشم مندن عم اوغلی

جانیم سنه قربان اولا ای شاه ولایت

واردی بولوسن سینه ی زهراده جراحت

تاپشور مَلَکُ الموته آلا جانیمی راحت

آیریلما نه قدر ئولمه میشم مندن عم اوغلی

ازبس ایلیوبلر بو جماعت منه توهین

تشییعیمه قویما گله لر، دفن ایله گیزلین

قوی قبره منی نصف شب ایت قبریمی ایتگین

آیریلما نه قدر ئولمه میشم مندن عم اوغلی

یوخدور بولورم آیریلیقین دردینه چاره

هیهات گورم گل یوزیوی بیرده دوباره

گل آل دیزون اوسته باشیمی گیتمه کناره

آیریلما نه قدر ئولمه میشم مندن عم اوغلی

ویرموش اوز آتام مژده که سن تیز ئوله جاقسان

چوخ اینجیموسن شاد اولاجاقسان گوله جاقسان

دین خدمتی نون قیمتین اوندا بوله جاقسان

آیریلما نه قدر ئولمه میشم مندن عم اوغلی

ناحق چالیشور ثروت دنیانی آپارسون

مومن چالیشور قبرینه ایمانی آپارسون

گلدی اوز آتام غمزده زهرانی آپارسون

آیریلما نه قدر ئولمه میشم مندن عم اوغلی

چوخ اینجیموسن رنجش درد و محنیمده

بیر زحمتیم آرتار سنه غسل و کفنیمده

پیراهنیمی قوی قالا یورقون بدنیمده

آیریلما نه قدر ئولمه میشم مندن عم اوغلی

بیر غم دیمه هرگز قویار آسوده من ئولّم

دشمن کسه جاق اوغلون حسین باشینی بولّم

خولی ایوینه شام غریبانینه گلّم

آیریلما نه قدر ئولمه میشم مندن عم اوغلی

دنیاده «ریاضی» ساییلور شیعه لروندن

آگاهدی فردای قیامت خبروندن

هنگام شفاعت اونی سالما نظروندن

آیریلما نه قدر ئولمه میشم مندن عم اوغلی

شاعر : مرحوم کهنمویی

زبانحال به حضرت فاطمه زهرا (سلام الله)

زبانحال به حضرت فاطمه زهرا (سلام الله)

هر زمان کردم نظر دیدم که بیداری چرا؟

پیشِ رویم چادر از رو بر نمیداری چرا؟

کس نمیگوید سلامم...کس نمیگوید جواب

بین این غمها تو قفلِ غم به لب داری چرا؟

رنگِ رخسارت خبر از روزگارت می دهد

کارِ خانه پس چرا لبخندِ اجباری چرا؟

هر چه پرسیدم ز حالت زود گفتی بهترم

پس بگو دستت ز پهلو بَر نمیداری چرا؟

ردِّ خونی پشتِ در روی زمین بینم... ولی

خیره با چشمان کم سو سوی مسماری چرا؟ 

یارِ هجده ساله ام رنگت چنان صد ساله هاست 

دست بر زانو خمیده سمت دیواری چرا؟

این دعایت را شنیدم مرگ میکردی طلب

نوبهارِ خانه ام از عمر بیزاری چرا؟

ای همه پشت و پناهم عزم رفتن کرده ای؟ 

قصدِ این داری که از من دست برداری ؟ چرا؟

صبح تا شب کارِ خانه نیمه ی شب گرمِ آه

هر زمان کردم نظر دیدم که بیداری چرا؟

شاعر : حبیب الله موحد

منبع : کانال مدح و مرثیه

در احوالات حضرت فاطمه زهرا (سلام الله)

در احوالات حضرت فاطمه زهرا (سلام الله)

یتوشدی جوراعدادن وفات حضرت زهرا

پریشان زلف زینب تک اولوبدورحالت زهرا

پیمبردن صورا غمدن بتولین قلبی داغلاندی

طناب ظلمیله دست ولی الله باغلاندی

لگدکوب عدودن سیندی پهلو درگهی یاندی

علینی بیعته چکدیله آرتوب حیرت زهرا

او خاتونین یتوشدی حاملان عرشه افغانی

صباح و شام آغلاردی چکردی ال دیرمانی

وداع ایلوبدی اون سکزیاشیندا داردنیانی

نقدرایتسن تفکرشرحه گلمز محنت زهرا

بو مدت عمریده اصلا اولمادی بیرلحظه آسوده

ایدردی حضرت مریمدن آرتوخ سجده معبوده

سرشکین ایلموشدی خون دلیله ایله آلوده

اولوب لیلا نهارا آغلاماقلوق عادت زهرا

باشی حیدرکنارینده گیدردی ضعفیدن هوشه

گلوب هوشه باخاردی زینبه دردی گلوب جوشه

گهی کلثومی گاهی مجتبانی چکدی آغوشه

قویوب آغلارحسینی قالدی دلده حسرت زهرا

نه وارزهرا آدیندا بلمورم ذکراولسا هریرده

هامی قلبه چکردرد و کدورتده سرا پرده

نه عالمدی اونون آدی گلوب عالم گلردرده

مگرتخمیراولوبدوردرد و غمدن طینت زهرا

اسوب باد خزان گلزارعیشی ظلمیله سولدی

هجوم آمراولوب زاغ و زغن صحن چمن دولدی

علینین قولارین باغلی گورنده مو سفید اولدی

بوکولدی بارمحنتدن اولوب خم قامت زهرا

خانم یا فاطمه زینب غمونده بیقرارآغلار

سنان و شمریوخدورخوفه دوشسون آشکارآغلار

دیارشامه گل بازاریده بی اختیارآغلار

او زینب که ظهورایلردی اوندا عفت زهرا

بو زینب آدینین زهرادن آرتوخ واردی تاثیری

اونون تاثیری هرقلبی یخوبدوریوخدی تعمیری

شرار دود آهی یاندوروبدوربند زنجیری

یزیدین مجلسینده هتک اولاندا حرمت زهرا

حسین باشین جداده گوردی زینب آه و زارایتدی

دیدی قارداش نه وارباشونده دشمن سنگسارایتدی

یهودیلرمحلاتین دولاندی شمر جارایتدی

دیدی آغوش عزتده بو باشدور زینت زهرا

بو غمده (بیخود )و (سالک)اولوب بلبل کیمی گویا

دل(واقف) گلوردرده ایدرناله علی السما

بیزی شش گوشه قبره (عاملیله)ایسته یا مولا

بحق تربت حیدر بحق عصمت زهرا

مرحومین واقف و عامل و سالک و بیخود سرابی

منبع : کانال گنجینه گذشتگان

زبانحال حضرت زینب کبری (سلام الله) در احوالات حضرت زهرا (سلام الله)

زبانحال حضرت زینب کبری (سلام الله)

در احوالات حضرت زهرا (سلام الله)

قد سروی خمیده ، یارالی آنام ایوای

گیدن قبره شهیده ، یارالی آنام ایوای

آز عمریله اولان مین خدنگ غمه آماج

یوزی گوامین اصلاً اولان خوش گونه محتاج

سپاه غم و غصّه ائدن صبرینی تاراج

سیه زلفی سفیده یارالی آنام ایوای

آز عمریله چکن چوخ جهاندا غم و محنت

قد سرو رساسین بوکن بار مصیبت

کسن رشتۀ عمرین یدِ ظلم و مشقّت

دؤُزَن ظلم مزیده یارالی آنام ایوای

بلا رنگینه هر آن خُم غمده بویاندون

آچوب ظلم الی ثانی قاپون یاندی دایاندون

شهید اولدی جنینون اؤزونده یارالاندون

اولان سینه دریده یارالی آنام ایوای

بو بس اولمادی الدن عدو مُلکوی آلدی

گیدوب حقّون الوندن گویه آهون اوجالدی

بیر ال دگدی یوزوندن اثر مه یوزه سالدی

خسوف اولدی پدیده یارالی آنام ایوای

آنا عطریون ائدردی خجالت گل یاسی

گله طعنه ووراردی یوزون ذوق و صفاسی

شل اولسون او الیکه اونون ائتدی جفاسی

او گل رنگی پریده یارالی آنام ایوای

بابام ختم رسالت گیدن گون بو جهاندان

سنه باب مصیبت آچیلدی نچه یاندان

دونوب ذلته عزّت دویوردی سنی جاندان

مُلِمّاتِ عدیده یارالی آنام ایوای

هامی عمرده بیر گون یوزون گولمدی دلدن

بلالر گونی گوندن آلوب صبریوی الدن

ئولونجه سالا هیهات قیزون آدیوی دیلدن

توکر قان یوزه دیده یارالی آنام ایوای

سنه غسل وئرنده آتام شاه ولایت

گوروبدور بدنونده وار آثار جراحت

حسینیله حسندن ائشیتدیم من او ساعت

دیوللر که شهیده یارالی آنام ایوای

دوشور یادیمه هر دم گوگل سوز و گدازون

اولور گوزده مجسّم دل شبده نیازون

قیزون بوش گورور ایمدی ولی جای نمازون

شب تار و سپیده یارالی آنام ایوای

اولوب وضع قنوتون سبب دلده ملاله

بیر الّی ال آچاردون درِ عزُّ و جلاله

قولون قاخموری گوردوم ائدورسن نجه ناله

خداوند مجیده یارالی آنام ایوای

او غملر که توکولدی سنون اوستوه هر دم

توکولسیدی گون اوسته اولوردی شب مُظلم

گلیدی اجل ا ی کاش ئولیدوق آنا باهم

قیزون قالدی وحیده یارالی آنام ایوای

بویورموشدی پیمبر منه اجر رسالت

فقط آل عبایه محبتدی ، مودَّت

عجب امّتی ائتدی مراعات وصیّت

غم و رنج کشیده یارالی آنام ایوای

او گون مسجده گئتدون گوزی یاشلی و خسته

او قومیله دانشدون یارالی ایاق اوسته

گئدر شامده بیر گون جفا قیدینه بسته

قیزون بزم یزیده یارالی آنام ایوای

آنان رحلتی ائتدی حسینی سنی نالان

اودور پوزدی بو جمعی سوزون ائتدی پریشان

بویوردی سنه ناحی بونی ذکر ائله هر آن

گئدن قبره شهیده یارالی آنام ایوای

شاعر : مرحوم حسینی سعدی زمان

زبانحال حضرت زهرا (سلام الله)

زبانحال حضرت زهرا (سلام الله)

ئولورم عم اوغلی دلده غم بی نهایتیم وار

ایله سن قبولِ زحمت سنه بیر وصیتیم وار

بولورم بو غمده زینب ، شه مشرقینیم آغلار

گلر عترتیم فغانه ، ایکی نور عینیم آغلار

باشیم اوسته باش آچاللار ، حسن و حسینیم آغلار

اولارا تسلّی وئر سن ، منیم استراحتیم وار

گجه لر حسین یاتاردی ، منیلن شه مدینه

اونا خوابگه اولوردی ، آییلان زمان بو سینه

آناسیز قالور انیس اول ، اونا سن آنا یرینه

بولوسن منیمده سن تک ، اونا چوخ محبتیم وار

بویوروب بابام حسینون ، باشنون بلاسی چوخدور

کسیلور قفادن اُول باش ، بیله ماجراسی چوخدور

قویاجاق کول اوسته باشین ، ستم جفاسی چوخدور

گئدرم زیارتینه ، او باشیله اُلفتیم وار

بو شکسته خاطریم تک ، باتاجاق ملاله زینب

آناسیزلیقین دمادم ، سالاجاق خیاله زینب

نقدر حیاتی واردور ، ایده جاقدی ناله زینب

اونا ارث اولور عم اوغلی ، نقدر مصیبتیم وار

اونا وئر تسلی هر دم ، گله قویما چوخ فغانه

اولی دستگیر بولّم ، ستمیله کوفیانه

او بلاکشه منیم تک ، ووراجاقلا تازیانه

دؤزر هر بلایه اصلا ، دئمز هئچ شکایتیم وار

گتورور منیم بو عرضیم ، سنی گر چه آه و زاره

گئجه غسل وئر عم اوغلی م، ن زار و دلفکاره

ائشیدینجه اهل کینه ، کفن ایله قوی مزاره

گله لر جنازه م اوسته ، اولارا نه نسبتیم وار

شه لافتایه زهرا ، ایله کیم ائدوب وصیت

ایلیوب غروب گون تک ، یئرینه او شمس عصمت

حسنین اولوب خبردار ، گلوب ائتدیلر قیامت

سوله دی حسین آنا جان ، سنه بیرجه حاجتیم وار

بیزی ساغلیقون کیمی سن ، اگر آلماسان کناره

توکروخ سرشک دیده ، آناجان بو زرد عذاره

بولوروخ داخی ئولونجه ، سنی گورمروخ دوباره

گوزون آچ گور ای بلاکش ، نئجه غملی حالتیم وار

کفن ایچره ایلدی چون ، آنالوق محبّتی جوش

قولین آچدی ائتدی اول دم ، حسنینی زیب آغوش

بئله غملی ماجرانی ، ائلیوم نئجه فراموش

سالی کربلانی یاده ، اودی دیلده محنتیم وار

شاعر : مرحوم دلریش

احوالات حضرت فاطمه زهرا (سلام الله)

احوالات حضرت فاطمه زهرا (سلام الله)

جهانی دولدوروب گینه غم و ملال فاطمه

باتوبدی ماتمه بو گون تمام آل فاطمه

اشاره ایلسم اگر مصیبت بتولیدن

رساله الده شرم ایدر خجل اولار رسولیدن

سوروش بتوله نائبه فسرده دل ملولیدن

هنوز زینبی ملول ایدوب ملال فاطمه

او گونکه تاپدی خلقت بشرله ماسوا نظام

عطا اولوندی حقّیدن بتوله عالی بیر مقام

که یتمیوب بیر عورته بیر ایله رتبه ی عظام

جهانیانی حیرته سالوب جلال فاطمه

او گونکه اهل محشره خدای حیّ کائنات

حساب خیر و شرّ اوچون ویرور دوباره دن حیات

او سخت گیر و داریده چتیندی هر کسه نجات

گر اولماسا شفاعته او گون خیال فاطمه

بو شان و بو مقامیله بو عزّت و جلالیه

گورون بو چوخ آز عمرینی ویروب باشا نه حالیله

انیسیدی گجه گونوز مصیبت و ملالیله

سارالدی سولدی گل کیمی جمال آل فاطمه

گلوبدی بیر گونی ایوه علی ولیّ کردگار

پیمبرین عزیزه سین گوروب ملول و دلفگار

یاتوبدی قبلیه طرف فسرده دل غریب و زار

او شهریار حالینی پوزوبدی حال فاطمه

شروع ایدوب اویاتماقا عزیزه سین ابوتراب

نه دللریله سسلدی ایدوب نجه گوزل خطاب

ملول اولوب سوالیدن گوروب که گلمدی جواب

اورکلنوب او بلبل شکسته بال فاطمه

اولوب سرشک حسرتی عذاره سیل تک روان

دیدی عم اوغلوام سنون نه یاتموسان گوز آچ اویان

نه دل دیدیم دانشمادون، نولوب او نطق خوش بیان

علینون آلدی طاقتین بو نطق لال فاطمه

سنون بو دینمماقلیقون ز بس ایدر اثر منه

که قورخورام اورک یانا گلم دله ایدم گله

اورکده چوخدی درد دل اماندی بیرده گل دله

فرح ویرور روانیمه او خوش مقال فاطمه

آچوب گوزین او حالیده او نور دیده ی رسول

رسول جانشینینه ادبله عرض ایدوب بتول

سنون ملالون ایلیوب منی عم اوغلی جان ملول

فراق باشلانوب یتوب باشا وصال فاطمه

یاخونلاشوب اوشاقلاریم یتیم اولا عم اوغلی جان

واریمدی بیر نچه سوزوم اجازه ویر ایدوم بیان

ازلکه خواهشیم بودور گر عورت آلسان هر زمان

بیر عورت آل که تا اولا رئوف آل فاطمه

منیم که قویمادی فلک زمانه ده یوزوم گوله

شبیهیدیم همیشه بیر خزان اولوب سولان گله

جنازه مین گوتورماقین مباد اهل کین بوله

گرکدی خلقیدن نهان اولا رحال فاطمه

ئولومده گوردوم عاقبت فشاریدن نجاتیمی

اودور که حقدن ایستدیم گجه گونوز وفاتیمی

هانی بولن نه چکمیشم بو مدّت حیاتیمی

بو مطلبی بولور فقط او ذوالجلال فاطمه

اگرچه غمده زینبیم سببدی شور و شینیمه

او چوخ علاقه منددور بو ایکّی نور عینیمه

اونون جهاندا منجه وار محبّتی حسینیمه

او بلبلی ملول ایدر بو گل جمال فاطمه

عبث دگل که گوزلریم بهار ابری تک دولار

صغیر اَکَن بو نازنین بالالاریم یتیم اولار

حسن پوزولسا دل یانار، حسین سارالسا گل سولار

چمنلری خزان ایدر بو نونهال فاطمه

باخاندا زینبه دولور سرشک چشمیله گوزوم

آنا فراقی قیزلارا چتیندی گورموشم اوزوم

بو محنته بو فرقته محال امردور دوزوم

آنا دیوب نه قدر وار یانار مثال فاطمه

بو فصل تازه « شأنیا » ملول ایتمه سین دلون

تانور تمام اهل دل سنون سوزون سنون دلون

نجه جهاندا حلّ اولور تمام سخت مشکلون

یقین جزاده ده یتر سنه نوال فاطمه

شاعر : مرحوم شانی

در احوالات حضرت فاطمه زهرا (سلام الله)

در احوالات حضرت فاطمه زهرا (سلام الله)

چوخ چکدی جفا عمروده دلبند پیمبر

ایستردی خدادن ئولومون با دل مضطر

زهرانی قوتار دار جفانین ستمیندن

قدّیم خم اولوبدی آتامون بار غمیندن

هر گونده نماز اوسته او بانوی دل افگار

ایلردی بو طرزیله خانم دردینی اظهار

یارب سنی جدّیم داخی ئولدور منی قورتار

آخِرده مرض فاطمه نی بستره سالدی

مظلومه لیقین عالم آرا دللره سالدی

بستر خانما مونس اولوب گوگلینی آلدی

زهرا دیه سن بیر گلودی سولدی سارالدی

گل سولدی سارالدی غمی بلبللره قالدی

غمدن بالاسی زینبه چوخ حصّه یتیشدی

چون باشی بلالیدی اونا غصّه یتیشدی

گوردی ئولوم آثاری نمایاندی یوزونده

تاریک ایلیوب غم گیجه سینده گونوزونده

گوزیاشی ووروب زینبینون حلقه گوزونده

مقراض اجل رشتۀ امّیدی قیراردی

بو حالیله زینب تلینه شانه ووراردی

ووردوقجا پریشان تلینه شانۀ حسرت

آغلاردی دیردی قیزیم اولدی بیله قسمت

یاخشی قولاق آس ایلیورم نچّه وصیّت

مندن صورا باشون دوشه جاق درد و بلایه

دیداریمیزین قالدی بیری کرب و بلایه

قارداشلاریوین غم گونی غمخواری سن اولدون

آغلار باجیوین مونس و دلداری سن اولدون

آز سنّیله ایتام پرستاری سن اولدون

زهرا عوضیندن اولارین گوگلین آلارسان

زهرانی سالوب یاده بو ایوده دولانارسان

من تک خُم محنتده غمیله بویانارسان

بو قارداشیوین باشینون اوسته سو قویارسان

سسلنسه آنا سن عوضیمدن اویانارسان

ای مادر غم آغلاسا قارداشیوی قویما

گر ایستسه آخسون یوزه گوزیاشیوی قویما

آغلاشدیلا بو سوزده ایکی بانوی عالم

اولموشدولا بیربیرلرینه مونس و همدم

میر نجفیله حسنین گلدیله باهم

اوغلانلارینین بوینونا سینمیش قولی سالدی

هر تک تکینون ئوپدی یوزون گوگلونی آلدی

عرض ایتدی عم اوغلی اورگیم قان اولا قویما

اشکیله حسینین گوزی بیر آن دولا قویما

گل تک بالالاریم سارالوب یا سولا قویما

روحیمدی حسین آیریلورام روحیدن ایمدی

کشتی نجات ایچره اولان نوحیدن ایمدی

قویما آخا گوزیاشلاری سیمایه عم اوغلی

گیتسونله بویور روضۀ طاهایه عم اوغلی

ایتسونله دعا اوردا بو زهرایه عم اوغلی

گلچین اجل گلدی دی بلبللره گیتسون

دورسون بالالار روضۀ پیغمبره گیتسون

زهرا سوزی تاثیر ایلدی میر حجازه

گوندردی او شهزاده لری مجلس رازه

فرمایش ایدوبدی دل آچون راز و نیازه

خیر البشرین روضه سی چون دار شِفادی

اول قبّه نین آلتیندا برآورده دعادی

چوخ حسرتیله ال اله ویردی ایکی قارداش

عمّامه لری الده توکولّر یوزه قانیاش

تا روضۀ پیغمبره دین قاچدیلا بیر باش

غم ساغری دولموشدی یره دوشدی جالاندی

اول روضه ده بیردن بیره بو سس اوجالاندی

مقتلده اوکی ضبط اولونوبدی بودور عینی

سس گلدی یتیم اولدولا زهرا حسنینی

زینب آناسیز قالدی یتیم اولدی حسینی

کلثوم آناسی ترک ایلدی دار فنانی

یاندوردی بو سوز قلب شه کرب و بلانی

فوراً قییدوبلر ایوه با دیدۀ گریان

اَسمانی گوروبلر دایانوب زار و پریشان

گلدی دله اوّلده حسین ایلدی عنوان

آخِر دی گوروم ایمدی آنام فاطمه هاردا

علّت ندی گوزیاشون آخور عارضه اسما

عرض ایتدی آنان غملرینی گوزدن آتوبدی

وصل عالمینون لذّتینی هجره ساتوبدی

سسلنمه اویاتما اونی آسوده یاتوبدی

پروانه ده هجر آتشینه من کیمی یانمور

چوخ سسلموشم من اویانا بلکه، اویانمور

بو سوزلریله ایلدی سدّ ره چاره

فرمایش ایدوب وورما یارا قلبیمه یاره

چک زحمتیمی سن آنامی سسله دوباره

قلبین غم اوخی سویله گلن دلدی حسینون

گیتمیشدی دعا ایلماقا گلدی حسینون

بیر سوز دیماقا تاپمادی اسما او حزینه

باشین اشاقا سالدی گلوب داد و انینه

ساکت دایانوب لیک غم آرتوردی حسینه

یوز دوتدی او دم قارداشینا شاه شهیدان

بو سوزلریله غملرینی ایلدی اعلان

غم آز قالوری صبر و قراری اوزه قارداش

بو غمده یانوب دوندی وجودیم کوزه قارداش

قول بوینوما سال قوی منیله یوز یوزه قارداش

سن اوخشا آنامی توکرم من یوزه قانیاش

بیر بزم عزا گل قوراخ ایمدی ایکی قارداش

هجرینده آنامون اورگیم قانیله دولدی

اولاد بتولین داخی پرگاری پوزولدی

گل آغلاشاق ایمدی بیزه قارداش اولان اولدی

بیز تک آناسیز خوش گونه حسرت قالا خوشدی

آخِر نجه گورّم که آنامون یری بوشدی

اولماز داخی بوندان صورا خوش گون بیزه قسمت

قلبیمدن ئولونجه چخا حاشا بو مصیبت

دیدارینه قویدی آنام آخِر بیزی حسرت

یاندوردی بو سوزلر «حسنی» ایلدی غمگین

گوزیاشی آخوب دامنینی ایلدی رنگین

شاعر : استاد حسین حسنی افشرد

معجرحضرت فاطمه زهرا (سلام الله) و مسلمان شدن عده ی زیادی از یهودیان مدینه

معجرحضرت فاطمه زهرا (سلام الله)

و مسلمان شدن عده ی زیادی از یهودیان مدینه

گلورخیالیمه بیر قصه اسف انگیز

دوام ایتمزاورک بیله حسرته هرگز

روایت ایلین علامه دورهمین بو سوزی

سوزی دیه دیه ویردی نشان محلین اوزی

اوزی خبرده مسلطدی هربدو خوبه

ویروبدی نسبتینی ابن شهرآشوبه

گلوبدی بیرگون ایوه شهریار ملک وفا

دیدی طعامه گمانین گلوری یا زهرا

کمال خجلتیله سویلوب ای شه دوران

حضوریوه گتورم بیرزادا یوخومدی گمان

اشاقلاریمدا اوزیمده آجام جعلت فداک

اوزون علاج ایله قویما عیالیوی غمناک

آلوب او وقتیده چادرشبین او کنز غمین

شراره سی سونه دللرده بلکه بو المین

یهودینین ایوینه گلدی میرربانی

لحکمه اونا فاش ایتدی بو قضایانی

قویوبدی فاطمه چادرشبین او یرده گرو

معاش ایتماق ایچون بیرقدرآلوبدورجو

قیتدی منزله مسرور حال و چوخ دلشاد

اولا بالالاری تا قید جوعیدن آزاد

یاخوندی موج ایده دللرده آجلیقین سیلی

علی و آل علینین اله گلوب میلی

غروبه گون یتوب آفاقی چولقادی ظلمت

اولوب شب عالی و ادنا  هامی یاتوب راحت

یتوبدی نصف شب عالم اولوب سراسرتار

اولوب عیالی یهودینین اول زمان بیدار

او حجره که واریدی معجربتول اوردا

گوروب او حجره دن افلاکه نوراولورپیدا

دوشوبدی حیرته یکباره ایلینده نظر

علاوه نورگلور گوردی عطر مشک و عبر

ایدوبدی صاحبین اول وقته خوابیدن بیدار

نه یاتموسان دیدی دور بیر مهم مطلب وار

گوروبله نور اوجالورآسمانه پی درپی

اودم حقیقت زهرایه تا آپاردیلا پی

او دم ویروبله هامی خویش و اقربایه خبر

او نوری گورماق ایچون خویش و ایل گلوب یکسر

گورن او حالتی ترک ایتدی فورا آئینین

قبول ایلدی تا که پیمبرین دینین

مشرف اولدی نچه خوانواده اسلامه

بلی کرامت زهرا یتوشمز اتمامه

روادی گوربوجلال و بو شان صاحبینی

سالا فشاره عدو آرتورا مصائبینی

آتاسی الدی سالوب محنته او غم زده نی

پیمبرین قوروسون ثانی قویمادی کفنی

اودرکه قابض الارواح اذن آلوب اوندان

همان او درگهه اودووردی فرقه عدوان

قاپو دالیندا دایانموشدی دخترطاها

هجوم دشمنی سد ایلیه او مام بلا

بو فکردیدی خانم قویمیا قاپو آچیلا

نه اینکه سینه سینه  ارغوانی گل ساچیلا

او پشت درده نه صدمه یتوب خدا بلدی

بو قدروارکه دیدی فضه گل بالام الدی

جنینی بیرطرفه دوشدی بیرطرفه اوزی

نه حاله قالدی او مخدومیه دوشنده گوزی

بتولی حجت حق گوردی قانینه غلطان

رواندی سین سینین قانی ای امام زمان

نه حاله قالدی دیه بلمم ای شه کونین

ولی بو سری بلر کربلا غریبی حسین

نچون او شهده گوروب شمرالینده محرمینی

سالاندا یادیمه قان آغلارام بو بیرغمینی

آچاندا دشت بلا ایچره قان دولان گوزینی

گورنده زینبی یاددان چیخاتدی اوزاوزینی

نه گوردی قارداشینین فکرینه قالورزینب

دوتوبدی قاتل الین شمره یالوارورزینب

امام امرایلیوب خیمگاهه گیتدی اوزار

ولی تیکوب یولا گوز(حامد)ایمدیده آغلار

شاعر : مرحوم حامد تبریزی

منبع : کانال گنجینه گذشتگان

زبانحال به حضرت فاطمه زهرا (سلام الله)

زبانحال به حضرت فاطمه زهرا (سلام الله)

ظلم اودیله درگهون اودلاندی یا زهرا سنون

محسنون سقط اولدی قلبون یاندی یا زهرا سنون

هر طرفدن چون سنه تنگ ائتدی دشمن عرصه نی

گوردیلر یا فاطمه یالقوزلیوب محنت سنی

آلدیلار حقون اَلوندن ظلموله قوم دنی

حقّووی حق بولمینلر داندی یازهرا سنون

اولمادی ثانی رضا گُلماقه بیر لحظه یوزون

اود وروب درگاهوی یاندوردی آغلاتدی گوزون

سندیروب پهلوی نازون قالدی دلده حق سوزون

قتلیوه بو صدمه بیر عنواندی یازهرا سنون

دوشدی ظلم اشقیادن بسکه امرون مشگله

گرچه یاندون آغلادون دردون ولی سالدون دله

جانه گلدون آغلاماقه گئتدون آخرده چوله

صبریوه قدّوسیان حیراندی یا زهرا سنون

بس دگولدی بیر بئله جور و جفا آیا سنه

ائیلدی آخر پیمبردن صورا اعدا سنه

بیرده ظلم فاحش ائتدی ثانی یا زهرا سنه

باخمادی کوئلون لبالب قاندی یازهرا سنون

آشکار عرض ائتمرم نئتدی سنه اول نابکار

ضرب سیلیدن قولاقون پارچالاندی آخدی ثار

گُل جمالون اولدی نیلی ای دُر گنج وقار

قاتلون مطلق او بی ایماندی یازهرا سنون

گورمدون خوش گون بو عالمده سن ای کان وفا

آشکارا حقّووی غصب ائیلدی اهل جفا

اولدی لیکن ظلم اعدادن سنون دفنون خفا

قبر پاکون ایندیده پنهاندی یازهرا سنون

کاش اولیدی بی مروت قنفذون شل اللری

شیر حق غسلون وئرنده تازیانه یرلری

آغلادوب اول شاهی مطلق یاندیروب پیغمبری

هر غمون مین موجب افغاندی یا زهرا سنون

گرچه چوخ ظلم ائتدی یا زهرا سنه دشمنلرون

اولمادی غارت ولی باشدان ستمله معجرون

نه یارالاندی خانیم بیر معجر اوسته اللرون

نه اوگون بارماقلارون دوغراندی یازهرا سنون

ای بلا کاشانه سی وی دختر خیرالورا

زینبه نه ظلم واردی ائتدی شمر بی حیا

آغلاسان جنتده بو ظلمه یقین صبح و مسا

زینبه دائم گوزون گریاندی یازهرا سنون

گورمسیدی گر سنه ثانی ایاق ظلمین روا

ائیلیینمزدی او ظلمی زینبه شمر دغا

بیر بلالی زینب اولدی بو جفایه مبتلا

بیرده قلبون بو جفادن یاندی یازهرا سنون

نچه ایل دور که اولوب بیر درده عاصی مبتلا

هر دیلیله یالوارور اوغلون اونا ائتمور دوا

سنده دور یا فاطمه بو دردیمه قطعی شفا

بیر نگاهون دردیمه درماندی یازهرا سنون

شاعر : مرحوم عاصی تبریزی

زبانحال به حضرت زهرا (سلام الله)

زبانحال به حضرت زهرا (سلام الله)

ای سُها اولدوزی تک چرخ مصیبتده یانان

آچ گوزون، یاتما دور ای زینبینی گوزدن آتان

چوخ سویردون منی، مندن نیه تیز دویدون آنا

گیتدون عالمده منی سن آناسیز قویدون آنا

دیمورم باخ بو بلالی قیزیوین گوزیاشینا

گوزی یاشلی دولانام من بو مزارین باشینا

گوزیاشیله یازارام دردیمی قبرون داشینا

ای قرارین غم و اندوه زمانه آپاران

جدّینه سیلی یرین یوزده نشانه آپاران

دیمورن درد و غمیله نجه رفتار ایلیوم

داد ایدوم کثرت غمدن اوزومی زار ایلیوم

کیمه سندنصورا من دردیمی اظهار ایلیوم

سن آنا زینبه عالمده شریک غمیدون

دردیمی دلدن آلاردون، غمیمه همدمیدون

دیمورم ترک ایلدون عالمی باغلاندی قاپون

لیک سندنصورا گوزیاشیمه عنواندی قاپون

نجه یانماز اورگیم ووردولار اودلاندی قاپون

جور و ظلمیله عدو باغلادیلار چاره یولون

در و دیوار آراسیندا آناجان سیندی قولون

گل سویر بلبلین هر آن گله گلزاره سسی

قبرون اوستن دگوری گوشیمه گهواره سسی

ایله بیر که گلوری محسن مه پاره سسی

یوخسا گوندردیقون اوز غنچه وه چاتدون آناجان

محسنون یاتمیشیدی گیتدون اویاتدون آناجان

فلک امّید چراغین آنا خاموش ایلدی

منی اندوه و ملالیله هم آغوش ایلدی

تا الیمدن سنی آلدی غمیوه توش ایلدی

دولانان یرلریوی ایوده باخوب بوش گوررم

اوزیمه دار فناده ئولومی خوش گوررم

بولورم سنسیز آنا تار اولی دنیا گوزومه

بو بلا گونلری روشندی ازلدن اوزومه

باد غم اسدی، یتیملوق توزی قوندی یوزومه

گلسه مینلر آنا دنیایه آنا اولماز اوزی

اودی گولمز آناسیز قیزلارین عالمده یوزی

بو گجه شام غریبانیدی ای بیکس آنا

نه عزایه گلن اولدی نه ایدن شور و نوا

قاپونی باغلادوق ایوده اوزوموز دوتدوق عزا

آغلیوب بو گجه کلثومیله ایوای دیمیشوخ

ایکی باجی دولانوب ایوده آناوای دیمیشوخ

آنا مسجد دوشنِیدی گرک عالمده سنه

تا ویریِدی هامی باش ساقلوق حسین و حسنه

اولمادی یاس دوتان، ایتدی ایله تاثیر منه

باخمیوبلر آناجان چرخ جفا اولدوزوسان

فخر نسوانسان اوزون،‌حضرت طاها قیزیسان

رسمیدور یاسی اولار ایوده بیری ئولسه اگر

تا آچالّار قاپونی خلق تسلّایه گلر

وار یری سالسا بو غم عالم امکانه شرر

کیم گوروب یاسدا یاس اهلی قاپونی باغلیه لر

اوزلری یاس دوتالار، اوخشیه لر آغلیه لر

ایمدی شهر اهلی دوتیدی گرک هر یرده عزا

غم یاغِیدی چکیلِیدی در و دیواره قرا

هر طرفدن اوحالِیدی گویه فریاد و نوا

آغلیوب منده دییدیم غمی گیزلین آناوای

قبری ایتگین ائل آرا ماتمی گیزلین آناوای

بو غمون گور آنا یاددان چخار عالمده مگر

سنی تشییع جنازه ایلدی یتدی نفر

بو محن زینبی قان آغلاداجاق شام و سحر

ای خدنگ غم و اندوهیله قلبی اویولان

نصف شبده یارالی جسمی مزاره قویولان

آنا قارداشیم حسین ایتدی آدون ورد زبان

ایلدی حسرتیله صبحه کیمی داد و فغان

گوردی گلزاریمیزه تازه اسوب باد خزان

اوزونی بلبله، سولموش گله اوخشاتدی منی

یارالی سوزلریله آغلیوب آغلاتدی منی

ایمّیزین بو گجه پوزقونلوقی چوخ پوزدی منی

آغلادیم ایلدیم عنوان اوزومه بو محنی

قویمادی آغلاماقیم یاتسون حسین و حسنی

سنسیز عالمده گرک رنگ ملاله بویانام

سن کیمی هر غم و اندوهه دوزوب تا دایانام

شاعر : مرحوم اعظمی تبریزی