خانیم زینب (ع) حضرتلری نین دیلیجه زبانحال
مرثیـه - نوحه
داغدار ائتدی حسین(ع)! پوزغون مزارون زینبی
آتش عشقه سالیب ، صبر و قرارون زینبی
***
غم قوجالدیبدیر منی ائیلیبدی گیریان قارداشیم!
گؤز یاشیملا بیر آخیر گؤزلرده کی قان قارداشیم!
چوخ مصیبتله یئتیشدیم قبریوه، جان قارداشیم!
ائیله دی نیسگیل داغی محزون غبارون زینبی
*
سؤیله ییم آخیر سنه من هانسی بیر فرجامدن؟!
کوفه دن یا دِیر راهیب دن یا راه شام دن؟!
گل دئییم بیر قورخولی ویرانه قالمیش دام دن
گؤر نئجه سوزان ائدیبدیر طفل زارون زینبی!
*
باغریما اود سالدی هیجران، قانه دولدی شامده
غصّه دن بیر نوگولون آج یاتدی سولدی شامده
هئچ سوروشمورسان رقیّه ن پس نه اولدی شامده
جان وئریب یاندیردی نازلی یادگارون زینبی
*
محبس اولدی روحیمه او مُلک شامی قارداشیم!
شرمسارم کی دییه م من چوخ کلامی قارداشیم!
اکتفا ائت بو سؤزه آل بو سلامی قارداشیم
یاندیریب یاخدی خلاصه روزگارون زینبی
*
قالمادیق ساکت ولی پوزغونلو بیر آمالده
عرصه نی دار ائیله دیک ظولمه خروشان حالده
فرصتی دشمن دن آلدیق، وقت قیل و قالده
صبره تسلیم اولدو چون دوتدی وقارون زینبی
*
ائیله دیک رسوا یزیدی شامده سجّاد ایله (ع)
ناگران اولما کی جنگیم وار گئنه بیداد ایله
هاشمی بولبوللری قویمام گزه صیّاد ایله
عارف فاضل ائدیب عطر بهارون زینبی
*
خطبه میز یارمیشدی دوشمن باغرینی شمشیر تک
گؤز یاشی آنجاق سلاح اولموشدو کسکین تیر تک
روبهان کوفه و شامی ووروردوق شیر تک
ائیله دی سؤزلر دَنیزی اقتدارون زینبی
*
باخما معناده بئله نیسگیللی محزون هیئته
دولموشام آللهه آند اولسون سراسر حئیرته
یئندیریب جانون تکان وئر قلب شاه امته
گؤرنه حاله سالدی قانلی لاله زارون زینبی!
*
اولموشام افسرده هیجرانیندان ای دریای داد
گل دعا ائیله بو تئزلیکله آچیم وصله قاناد
قالماییم دونیاده گؤرموم بیر بئله جور و فساد
ائیله دی مفتون او راز آشکارون زینبی
*
دونیانین باغرین گره ک بو کربلاده داغلییام
نیسگیلین چوخدور یئری وار هرنه قدری آغلییام
قالمادی فرصت منه قارداش! یاراوی باغلییام
غرق ماتم ائتدی حزن بیشمارون زینبی
*
قوی غریبلیکلرده یانسین قوربانون اولسون باجون
چیرپینان قلبی دایانسین قوربانون اولسون باجون
باشیوه پیدر دولانسون قوربانون اولسون باجون
اودلادی دونیاده چشم اشکبارون زینبی
*
روحیوی قایتارماغا بیر یول چالیش منله حسین! (ع)
آیریلیقلار آتشینده دور آلیش منله حسین!
دلشکسته قالمیشام گل بیر دانیش منله حسین!
الامان ائیلیبدی حال انتظارون زینبی
*
قافله دولدی غمه محزون و گریان قارداشیم
جانیم اولسون کاش سنه بو یئرده قوربان قارداشیم
گول بالان قوینوندا آرام یوخلاییب جان قارداشیم
اصغروندن سؤیله کی یاندیردی نارون زینبی
*
اَللری قوینوندا باخ گؤر نه نوا ائیلیر رباب!
سینه داغین غملی حالدا برملا ائیلیر رباب
ایسته ییر دردین دئسین امّا حیا ائیلیر رباب
اودلادی بو همسر بی اختیارون زینبی
*
ناز بالاسین وئر آنا بیر آرزییا چاتسین حسین!(ع)
باغرینا باسدیقجا بیر بیر غملرین آتسین حسین!
اصغرین راحتدی راحتتر ولی یاتسین حسین!
یاندیریب یاخدی عجب دیلسیز هزارون زینبی
*
من دئییم یالقیز بالاندان ، سنده اکبردن (ع) بویور!
من دئییم نازلی رقیّه ندن، سن اصغردن بویور
من دئییم یاسدان ، سن عباس دلاوردن بویور!
قارداشیم! چوخ یاندیریبدی روزگارون زینبی!
*
گلمیشه م بیر بیر زیارت ائیلییه م عطشانلاری
حق یولوندا اشتیاقیله جوشان قوربانلاری
گلشن عشق و وفاده بوی آتان ریحان لاری
سرفراز ائیلیبدی جام افتخارون زینبی
*
تا جهان واردی عزاداروندی زینب قارداشیم
محرم سرّ و هواداروندی زینب قارداشیم
ناگران اولما علمداروندی زینب قارداشیم
صاحب عزّت ائدیب پروردگارون زینبی
*
اؤلمه ییبسن آمما سن ای عارف عالی مرام
حق یولوندا اؤلمه ز هئچ بیر شخص مخصوصاً امام(ع)
بو آخان گؤز یاشی اولموش آیریلیقدان، وَالسلام
چاتدیرار بیر گون وصاله گلعزارون زینبی
*
شُکر اولا کی درب ِ گلزار حرم بازدی گئنه
بلبلانِ اهل بیته ایل بوُیی یازدی گئنه
هر قده ر « دادا »نی زینب(ع) دن یازا آزدی گئنه
یاحسین(ع)! چوخ یاندیریبدی روزگارون زینبی
دادا بیلوردی
تبریز – 1386
نوحه واشعاری درموردشهدا و اسرای کربلا