تنور خولی
احوالاتِ تنورِ خولی
گدای عشق ، که سلطانِ تختِ لولادور
طریقِ حقده فنا فیِ الله اولسا اولادور
نشان و تاجینی دشمن سویوب قلجلاریلان
بصیرت اهلی گورر ، بی بصیرت اعمادور
او گوز که آئینه ده عکسِ یاری درک ایتمز
یقین او گوزده و یا دلده ، لکّه پیدادور
همان او لکّه دی فرعونی قویدی حیرتده
مقامِ جنگده سویلردی جلدِ موسادور
او جلده بیرده گیروب شمر ، کربلایه گلوب
ولی بولوردی حسینی ، کلیمه والادور
امام رتبه سی مافوقدور نبوّتدن
به غیرِ ذاتِ محمّد که شأنی والادور
(سورهء مبارکهء بقره آیهء ۱۲۴ و دیگر آیاتِ شریف)
او آهنیکه قبول ایتدی شمره خنجر اولا
اودا او جلده گیروب ، قاتلِ مصفّادور
کسوب حسین باشینی ، شمرین اللرین بویادی
دئدی بو امره بولون شمرِ دون مهیّادور
گناهی شمر ایلیوب ، خنجرین نه شرکتی وار
بو امره شاهدِ عادل ، بساطِ عقبادور
توکنده قانینی آغلاردی خنجرین اوجی قان
اگر چه شمره بو قان آغلاماق گوارادور
حیا ایدردی قاباقدان کسه قباق باشینی
گورردی باشین آچان باشی اوسته زهرادور
حسینی سالدوروب علّت اودی یوزی اوسته
علاجی یوخدی گوروب شمر ، بی مهابادور
حسینون آنّینا خنجر اوزی یازوب قاندان
شهیدِ دیندی بو شه ، مَنشأء هدینادور
نجه روادی هدینا باشی کول اوسته یاتا؟
بو ظلمه واله و حیران تمامِ دنیادور
گورون نه سسدی گلور خولینون تنوریندن؟
صدای حضرتِ مریمدی ، صوتِ حوّادور؟
بو سس جگر یارالور اوزگه بیر سسه بنزر
گمان قنادی سینان عندلیبِ شیدادور
که یعنی فاطمه دور ، زلفی تک پریشانحال
دیر حسین بو نه منزلدی ؟ بو نه مأوادور؟
بو یر تنور دگل ، بزمِ رازِ جاناندور
بو یر تجلّی یزداندی ، طورِ سینادور
دگوب او قانلی دوداقلار او دمده بیری بیرینه
گورن دیردی لبِ حضرتِ مسیحادور
بو بزمِ رازه دئدی خوشگلوب صفا گتدون
محبّتون آناجان ظاهر و هویدادور
اوزوم بونی بولورم منزلیم محقّردور
ولی سنون نظروه عزیز و اعلادور
لیاقت اولسا کول اوستنده کی کسیک باشدا
سنون قدملرون آتدا ، ذبیح آسادور
سبب ندور آناجان ساچلارون باتوب قانه؟
فغانیله آغاران زلفون ، ایمدی حمرادور
بویوردی فاطمه : بو قان سنون قانوندور اوغول
یوزوم گوزوم بدنیم ، اللریم مُحَنّادور
گلوردوم ایمدی یولوم دوشدی قتلگاهه طرف
او یرده گوردوم اوزوم ، شورِ حشر برپادور
پوزوبلا نقشه سینی جسمیوون نماسی قالوب
دئدیم خدا بو نه ترکیبدور ، نه ایمادور
منیم یانیمدا گلوب ساربان الون کسدی
بو غصّه شرحی مفصّل ، بیانی دریادور
گزردیم اوردا چوخور یرده بیر بدن گوردوم
نه تک باشی کسیلوب ، قطعه قطعه اعضادور
همان او قاندی دوتوب الده زلفیمه یاخدیم
دئدیم قوناق گیدنون عطرِ زلفی زیبادور
تنورِ خولیه عشقون منی قوناق گتدی
خجالت اولما کول اوستی حریر و دیبادور
نقدر قالسان اوغول بوردا ، منده چوخ گورّم
بو بزمدن دئ گوروم هانسی یر دل آرادور؟
دئدی آنا بولوسن سرّینی شهادتیمون
اگر چه بعضیلره بیر بیوک معمّادور
سَنان سحر باشیمی گون کیمی جدایه وورار
گورن دییر ، چکلن دارِ عشقه عیسادور
باشیم یانینجه جوانلار باشی گیدر شامه
یزید مجلسینه تحفه دور ، هدایادور
گیدنده شامه ازل ، دِیر اولور منه منزل
باشیم او یرده آنا نسخِ دینِ ترسادور
کشیشلر هاموسی دینیمی قبول ایلر
ایشقلانان بو جمالیم کیمی کلیسادور
یزید مجلسینون واردی اوزگه بیر ذوقی
بولر بو ذوقی او کس ، درسِ عشقه دارادور
ووراندا لبلریمه چوبِ خیزرانی یزید
توکن سرشکینی زینب باجیمدی لیلادور
همان او حالتیم جاثلیقی یاندیراجاق
ئولن یانمیدا ، نمایندهء نصارادور
همین قضیّه نی بزمِ عزاده خوش اوخویان
عماددن ایشیدوب ، ذکر ایدن (ثریّادور)
شفاعتونده (ثریّانون) ای آنا گوزی وار
ایشی بکادی ، تباکادی ، یا که ابکادور.
مرحوم سید احمد یاسرِ نجفی متخلص به ثریّا
منبع مجموعه کانالهای مدح و مرثیه
ادامه دارد.........................
نوحه واشعاری درموردشهدا و اسرای کربلا