تنور خولی
احوالات تنور خولی
اوغول تنوری عجب رشک جنت ایلمیسن
بو پست محفلی افلاک رفعت ایلمیسن
رواق عرشیده لازمدی سن مکان ائده سن
حضیض خاکه نولوبدور قناعت ایلمیسن
باشین بلاسین آلوم دور یارالی سینمه گل
بو بینوانی بئله غرق حیرت ایلمیسن
نقدر دیندیرورم ای گویول غمین آلانیم
ندندی نطقه گلوب بیرجه صحبت ایلمیسن
شکسته گویلومی آل باخگیلان سولان یوزومه
گوزون فداسی ندن بیر اشارت ایلمیسن
آنا دیلی گتوروب نطقه رأس مذبوحی
دئدی عجب بو غریبی عیادت ایلمیسن
اوجاتدی باشیمی افلاکه یُمن تشریفون
بو لطف محضیله مرهون منّت ایلمیسن
گوز آچماقیم آنا مشکلدی سصربی واضحدی
نه احتیاجی بیانه که رؤیت ایلمیسن
خیمده قامتیله کاش گورمیم آناجان
که قانیله آغاران زلفه زینت ایلمیسن
هامی حرملریمی حقّه تاپشوروب گلدیم
دئمه آنا بالالاردان که غفلت ایلمیسن
علاوه زینبیمون کیمیا اثر نفسین
گورن دئیر که عجب حفظ هیأت ایلمیسن
مرحوم حاج خلیل دستمالچی
.............................
تنور خولی
حسین شام غریباندور سنه یار اولماسام اولماز
چوخور یرده دوتوب ماتم عزادار اولماسام اولماز
سنون عشقون سالوب چولدن چوله بو غملی زهرانی
اولام لازمدی بو صحراده ناچار اولماسام اولماز
غم اهلی رسم عالمدور همیشه غملینی خوشلار
سنون تک غملی بیر سلطانه غمخوار اولماسام اولماز
شکسته دللرون قدرین شکسته دل بیلر اوغلوم
ئولوب اوغلون سنوب قلبون طرفدار اولماسام اولماز
بو باشسیز پیکره اولّام نگهبان ساربان قویسا
او گلسه دیده سی مقتلده خونبار اولماسام اولماز
نه لر اولدی خانم زهرا دوروب ترک ایتدی گودالی
دیدی هر یرده من درده گرفتار اولماسام اولماز
یوخ امکان اگلشم بوردا حسین جان ال کسن گلدی
ندور چاره گیجه وقتنده سیّار اولماسام اولماز
خرابه کوفه ده مطبخ سرادور مسکنیم بیلدوم
گلوب صبحه کیمی مشغول گفتار اولماسام اولماز
اولوبسان خولیه مهمان سنه گلم قوناق اولام
عزیزیم سن اولان منزلده من وار اولماسام اولماز
بلالی باشوون دردی باشا گلدی و یا اینکه
گنه بیر آیری دردون وار خبر دار اولماسام اولماز
منیم ئوز نازدانم سن منیم ئوز پروریدم سن
امیدیم سن پناهیم سن پرستار اولماسام اولماز
زیارت فیضینون مشتاقیم قصدیم زیارتدور
دوداقوندن ئوپوب مطبخده زوّار اولماسام اولماز
گلوب تاپدی اوغول باشین مرامی حاصله گلدی
کولون سیلدی گوزون اوپدی یوزون اوپدی دیله گلدی
دیدی اوغلوم آنون گور ایندی افغانه گلر گلمز
سرشگین گوزلرینده دوندروب قانه گلر گلمز
اوغول چولدن چوله دوشسه اوغول ایودن ایوه گیتسه
آنا آیا دالیجا خانه بخانه گلر گلمز
قابورقام سینماقیمداندا باش اولدی باشون دردی
بالا یاتسا کول اوستونده آنا جانه گلر گلمز
سنون پروانوم سنده منیم روشن چراغیم سن
چراغ هر یرده روشن اولسا پروانه گلر گلمز
گیدنده موکب سلطان عزیزیم شهریدن شهره
مگر شهرون رجالی دید سلطانه گلر گلمز؟
جلوس شاه شاهانی بیلنده دردمند اشخاص
عریضه الده درباره ذلیلانه گلر گلمز
قوناقسان بو ایوه افسوس خوشگلدون دِیَن یوخدی
گور ایندی قلبیمون آلامی طغیانه گلر گلمز
ئوزون غملی یرون غملی گلن یوخدی گیدن یوخدی
قوناق گلسه ایو اهلی نزد مهمانه گلر گلمز
مسلمان ابتلا گورمز مسلمانه قوناق گیتسه
بو ظلمی درک ایده رقّت مسلمانه گلر گلمز
کول اولسون باشینه اسلامه توهین ایلیوب خولی
بو توهیندن شماتت اهل قرآنه گلر گلمز
بو باشین قدرینی زهرا بیلر چون اهل عرفاندور
صفا عارف اولاندا بزم عرفانه گلر گلمز
بیر آز گیت هوشه محسن اَممیَن پستانلارون اوسته
کسوک باش قان دولان پستانه درمانه گلر گلمز
ئورک دردین آنا اولادینه بیر بیر مقال ایتدی
جوابینده اوغول گویا بو نوعی کشف حال ایتدی
آنا قانلو باشیم مطبخده بی پیکر قالوب قالسون
جنازم صفحۀ میدانیده بی سر قالوب قالسون
قولون قنفذ جفاسیندن اوجالمور غم یمه نینک
منیمده اللریم اللرده ای مادر قالوب قالسون
او داغلی دلده سن ساخلا حسن داغین حسین داغین
منیم قلبیمده داغ اکبر و اصغر قالوب قالسون
قویوبلار خارجی آدی حسینه غصّه سین ایتمه
شماتتده نوامیس حق داور قالوب قالسون
قیزیم صغرا فراقیمدن تیکوبدی گوز یولا تیکسون
آنام ام البنین یثربده بی یاور قالوب قالسون
سویولمش خسته قیزلاریم قولون بالش ایدوب ایتسون
مریض اوغلوم یانان چادرده بی بستر قالوب قالسون
رقیه قولارین قمچی گویَرتسون مانعی یوخدی
منه ناز ایلین بلبل شکسته پر قالوب قالسون
عروس قاسمی بی شرم اولان دشمن سویوب سویسون
گیدوب گوشواره سی تاراجه بی زیور قالوب قالسون
قوجالتسون غصّه کلثومی آغارتسون زینبین زلفین
ویروب قارداشلارین الدن قرا معجر قالوب قالسون
منیمدور جاودانی سلطنت هند اوغلی دنیاده
بِش اون گون آبروسیز ملّته رهبر قالوب قالسون
فقط قرآن وار اولسون پرچم دین اهتزاز ایتسون
اسارت پنجه سینده آل پیغمبر قالوب قالسون
بو بزم انسده اولما پریشان آغلاما نِینَک
کسوک باشیم سنان قولاره قربان آغلاما نینک
آنا کرب وبلانون محشریندن من دیوم یا سن
شهادت نامه نون غم دفتریندن من دیوم یا سن
حسینون دردینه سن که ئوزیندن یاخشی واقف سن
نه لر گوردوم او شامون لشگریندن من دیوم یا سن
حبیب ابن مظاهردن ایدک یا حریدن صحبت
شجاعان حماسه آفریندن من دیوم یا سن
گوزل اوغلوم اَوَل گیتدی عبا پیچ ایلدوم گتدوم
رسول اکرمون ئوز بنذریندن من دیوم یا سن
وفالی عمه سی میدانه گلدی باش آچوق گوردون
آناسی لیلینون اشگ تریندن من دیوم یاسن
ربابین شیر خوار اوغلی اوخی پستان کیمی اَمدی
نجه قان جاری اولدی اوخ یریندن من دیوم یا سن
قوی پنجه قوی بازو قوی هیکل علمدارون
سو اوستونده کسیلمیش اللریندن من دیوم یا سن
بلالی زینبیم من ذبح اولان ساعتده مقتلده
نجه شمرون یاپوشدی خنجریندن من دیوم یا سن
او پیراهن که ویرمیشدون من آلدوم فضّه دن گیدوم
نجه چخدی حسینون پیکریندن من دیوم یا سن
سویا حسرت اولان قیزلاریمی اود چکدی آغوشه
سوسوز بلبللرون یانمش پریندن من دیوم یا سن
بیری خندقده جان ویردی ایکیسی قول بویون ئولدی
باجیم ئوپدی یومولموش گوزلریندن من دیوم یاسن
یزیدی مست ایدوب دنیا اله مستانه جام آلسون
بو قانی قویماسون یرده خداوند انتقام آلسون
مرحوم انور اردبیلی
منبع مجموعه کانالهای مدح و مرثیه
......................................
تنور خولی
عاشق حقون گرک باشنده شور اولسون آنا
منزل شاهانه سی کنج تنور اولسون آنا
عشقه جان بذل ایتمینلر بلمز عشقین لذتین
عاشقه زیبادی نوش ایتسه شهادت شربتین
عاشقین زیبنده دور فردوس چکسون حسرتین
آغلیانی عالم معناده حور اولسون آنا
راه جاناندا باشندان کچمین عاشق دگل
ایلین فکر سر و پا و بدن عاشق دگل
قالمیان گونلر ایوینده بی کفن عاشق دگل
پیکر صد پاره سی لازمدی عور اولسون آنا
من شراب عشقیله پیمانمی ایتدیم دولی
مجلس روحانیت هر یرده اولسا روح اولی
محفل ارواحه جسمین شبه سیز یوخدور یولی
یار بزمنده گرگ اغیار دور اولسون آنا
عشقمه نقصاندی قالسام باجی قارداش فکرینه
عالم وحدتده کثرت یار و یولداش فکرینه
کچمیشم باشدان انا حاشا قالام باش فکرینه
عاشقه شایسته دور محنت سرور اولسون آنا
بلبلون عشقی مجازیدور گل اوستون خوش دوتار
گلشن ایچره گل بوداقین سنبل اوستون خوش دوتار
اوغلوون عشقی حقیقی دور کول اوستون خوش دوتار
خوابگاهین ایستر اوز عشقیله جور اولسون آنا
خولیدن یوخدور گلایم یوخدی حق بینا گوزی
خوش دگل بزم محبتده اولا دشمن سوزی
یر ویروب مهمانه کول اوسته یاتوب راحت اوزی
حقی هر گوز گورمسه لازمدی کور اولسون آنا
من شهید اولدوم که قسمت وصل یار اولسون منه
منزل ایتسم هر یری بزم نگار اولسون منه
سنده که گلدون گرک خوش روزگار اولسون منه
نیلورم سن سیز یریم دایم قصور اوسلون آنا
من دیمم بلبل کیمی قوی گل بوداقوندن اوپوم
یانمیشام نار فراقونده دوداقوندن اوپوم
باشیمی قوی تپراقون اوسته ایاقوندن اوپوم
مایه فخریم منیم تا وار دهور اولسون آنا
قیلسون (انور حافظی) شکر خدای بی نیاز
درگهمده نوکراولماقدا تاپوبلار امتیاز
چوخ چتین اولسون میسر بو قدر نعمت بو ناز
هامودا ممکن دگول ذوق وفور اولسون آنا
مرحومین حافظی تبریزی و انور اردبیلی
منبع مجموعه کانالهای مدح و مرثیه
.......................................
احوالات تنور خولی
هر کیم جهاندا طالب عیش و سروردور
یا عقلی یوخدی یا گوزی بالمرّه کوردور
نزدیک اولان سروره بو دارالسّلامیده
راه تمیز عقلیدن البته دور دور
ای هوشیار دل بیله غمخانه ملکیده
فکر اقامت ائتمه که جای عبوردور
دنیا اساسی درد و غم استه بنا اولوب
بد بخت او کسکه طالب عیش و سروردور
باخ گور ننوعی اوزدی هامی ماسوادن ال
سبط نبی که شافع یوم النشوردور
عشقینده عقلی ایلدی عاجز ویروبدی باش
بیر باشدا درک ایدنموری کیم بو نه شوردور
زهرا آناسی شام غریبانه تا گلوب
گوردی اوغول منامی مقام تنور دور
خولی ایوینده سبط نبی ایلیوب مکان
باطل مقرّی حقّه محل ظهور دور
کول اوستی مکر بازی دور سپهریدن
مشکوة نور معنی الله نور دور
حق جلوه سیله ساحت مطبخ سرا دولوب
کنج تنور غیر تجلای طوردور
راحت یاتوب کول اوسته شهنشاه مشرقین
گویا حریم وصلیده محو حضوردور
آئینه اخذ رنگ ایلیوبدور تنوریدن
دوتقون جمالی وجه خدای غفور دور
بالین ایدوب تواضعیله کوللر استینی
بیر باش که نازی مایۀ اعزاز حوردور
حال رضایتیله قویوب باش او بستره
فعلیله حق قضاسینه دلدن شکوردور
اما لبی حکایت ایدور سوز قلبینی
بیر لب که فیض بخش شراب طهوردور
«عابد» هوای مرقد پاکون ایدوب شها
بو آرزوی قلبی سنین و شهوردور
آگاهسن اورکده کی اسراره سن اوزون
اما گدایه عرض تمنا ضروردور
تا وار ولایتین اثری دلده یوخ غمیم
جرم و خطا شماره سی گور بیر کروردور
اوز ایتدیقیم گناهلری سانمورام حقیر
چوخ آگهم بو فعل کمال قصور دور
اما او یر که حقدی خطا بخش سن شفیع
جرم و گنه خیالی ایدن بی شعور دور
مرحوم عابد تبریزی
منبع مجموعه کانالهای مدح و مرثیه
....................................
زبانحال حضرت زهرا (سلام الله)
در تنور خولی
ای مست جام عالم قالو بلی اوغول
مطبخ سرا هارا یارالی باش هارا اوغول
سیر الی اللهینده مبارکدی منزلین
خلوت سرای عشقین اولوب غمفزا اوغول
سودای وصل یار دوشه هانسی بیر باشا
گلمز باشا باشیندا اولان ماجرا اوغول
جام بلایه مشتری سن شوق و ذوقیله
بیر کیمسه ائتمییوب بیله بیع و شرا اوغول
عالم فدا بو همت و ایثاریوه سنون
جانان یولوندا جانیوی ائتدین فدا اوغول
گلدی آنان عیادته آچ قان دولان گوزون
باغریم دونوبدی قانه اویان با وفا اوغول
گلم دالینجا هر یئره گئتسون دوزنمرم
تاب ائله مز بالا غمینه هیچ آنا اوغول
ناز ائیلمه که منده داخی قالمییب توان
اولما رضا بو قدری ائده م آه وا اوغول
گل سینمه چوخ اینجیمسن چوخ یورولموسان
از بس وروبلا یاره سنه اشقیا اوغول
خولی گتیردی باشیوی قویدی کول اوستونه
کول اولدی عالمین باشینا برملا اوغول
دوتدی هوای نفس گوزون حقی گورمه دی
گوردی سنه بو محنت و ظلمی روا اوغول
بیر باش که طوف ائدر باشینا عرش و فرشیان
گور هاردا یئر وئریب دیله قوم دغا اوغول
تک گلموسن ندن هانی بس لشگرون سنین
سرلشگرون هایاندادی دوتسون لوا اوغول
گوردوم وفالی قارداشیوین سعی و همتین
سو اوسته اولدی قولاری تندن جدا اوغول
یاندیم علی اکبر و قاسم غمینده چوخ
اصغر غمینده من سنی ائتدیم دعا اوغول
کسدی او دم کی باشیوی شمر لعین سنین
دوشدی بلایه عترت خیرالورا اوغول
سندن صورا خیامی قشون غارت ائتدیلر
عرشه اوجالدی خیمه دن آه و نوا اوغول
قورخوشدی قیزلارین نگران قاچدی چوللره
تا ائیلسین له جانلارین اوددان رها اوغول
هم سویدولا بالالاری هم دوگدولر او دم
اولدی اسیر عترت آلعبا اوغول
آتلارایاقی آلتدا قالیب نازدانه لر
سولدوردی بیر نچه گولی اهل جفا اوغول
سندنصورا آچیلدی فراتین یولی ولی
هر کیم سو ایچدی اولدی غمه مبتلا اوغول
باشون بلاسی درد و غمه سالدی عالمی
گتدی نوایه اهل دلی نینوا اوغول
گرچه کول اوسته یاتماقیوی بیلمیری باجون
گرداب غمده غرقیدی اول ناخدا اوغول
یانمیش چادیردا زینبی گوردوم گلنده من
قورموشدی خیمه گاهیده بزم عزا اوغول
نصفی یانان چادیردا طبیبانه زینبین
آچمیشدی اهلبیتیوه دارالشفا اوغول
نازین چکوب بالالاروین مهربان باجون
بیر کس یوخیدی ائیلییه درده دوا اوغول
بیکس رباب هیچ کیمه دردین دینمدی
گیزلین شراره یاندی اوغولسوز آنا اوغول
دوشدی یولوم گلنده منیم قتلگاهیدن
یاندیم شرار غملریله هکذا اوغول
توپراقلار اوسته قانه بلنمیش جنازه لر
ائتمیشدیلر او یئرده سنه اقتدا اوغول
گودال قتلگاهیدن آلدیم سراغیوی
گوردوم وروبلا جسمیوه سایسیز یارا اوغول
گلمیشدی نعشون اوسته بابان ختم الانبیا
هم قارداشین حسن هم آتان مرتضی اوغول
نازلی قیزین شیرین دیلیله نوحه باشلادی
وئردی او غملی انجمنه بیر صفا اوغول
یاندیردی داغلی سینه میزی لیک ساربان
اول دم که گلدی غارته اول بی حیا اوغول
بیر ال کی ال دوتاردی اونی کسدی ظلمیله
گلدی فغان و نالیه ارض و سما اوغول
گوردوم اوغول او منظره نی یاندیم اغلادیم
یاخدیم او قانی زلفیمه ائتدیم حنا اوغول
گلمز تمامه مصحف غم هرنه شرح ائده م
سن حالیوی بیان ائله ای مه لقا اوغول
مدهوش یازدی شام غریبان بو مطلبی
هر کلمه سینده ائتدی سنه التجا اوغول
کانال اشعار محمد هوشمند (مدهوش)
..............................
احوالات تنور خولی
عجب عجب که بوگون یاددوستان ایتدون
بو غربت ایچره من زاری شادمان ایتدون
اولوم فدا سنه ای نورچشم پیغمبر
مگر آنا اوغولی بیله یاد بود ایلر
باشیمی شمرکسنده او دم سنی آندیم
سو ویرمدیله سوسوزکسدیلرباشیم یاندیم
باشیمی قوی یره تا بیراپوم ایاقوندان
زبس آنا دیموشم یانموشام فراقوندان
زبس گیچن گون آنا تپراقا کوله باتدیم
تنورایچنده کول استنده بو گیجه یاتدیم
کول استه یاتماقا اولدوم رضا من دلگیر
بو یری ده منه چوخ گوردولر بو قوم شریر
صباح اولاندا سالالار گینه بلایه منی
تنوریدن چیخادوب وورالا جدایه منی
داخی خیال ایلمه عترتیم اولا آرام
گزربو قانلی باشیم نیزه لر باشیندا مدام
دیدی فغانیله کی مبتلای درد و محن
مگرکه بلمدیلرسن عزیز فاطمه سن
قویاندا حنجریمه خنجرینی شمر دغا
دیدی که کیمدی آنان سویلدیم آنام زهرا
توجه ایتمدیتوکدی او دمده گوزیاشیمی
عداوتیله او ملعون کسوب سوسوزباشیمی
باشیمی سینوه قوی چکمیشم آنا زحمت
آنا سینین سینه سینده بالا یاتا راحت
یوزی یوزینده دیدی نورهردو عینیم وای
آنان بو باشیوه قربان اولا حسینیم وای
هانی مزارین حسینیم هانی سنون کفنین
باشین قالوبدی تنورایچره بس هانی بدنین
منی باغشلا آنا بیرزادا یوخومدی گمان
سنین قدملریوه بو کسیک باشیم قربان
گلوب بودم باشیمی گوگلره یتوردون آنا
عزیزلیوب منی کول استن گوتوردون آنا
دیدی اوغول دی گوروم بس هانی سکینه زار
دیدی دیمه آناجان قولارینی باغلادیلار
دیدی اوغول اوزیوه سویله نیلدی دشمن
دیدی سوسوزباشیمی کسدی شمرذیالجوشن
دیدی اوغول داخی آرتورما درد و غملریمی
دیدی آنا کسوب اوزساربانیم اللریمی
یازاندا بو سوزی (شاکی) مدام آغلاردی
شرار آهیله اوزسینه سینی داغلاردی
مرحوم شاکی خویی
منبع کانال گنجینه گذشتگان
..........................
احوالات تنور خولی
زینبیمدن بو گجه جبریله مهجورم آنا
یوخ غمیم چون سنی گورماقله مسرورم آنا
قانه دوندردیله اوّل آناجان گوز یاشیمی
بیر بیر ئولدوردوله اوغلانلاریمی قارداشیمی
تشنه لب کسدیله ظلمیله قفادن باشیمی
سرگذشتیم بودی ، بو آدیله مشهورم آنا
دادیمه یتمدی بیر کس ، سسیمه ویرمدی سس
قلبیم اوخلاندی ، قلجلاندی باشیم ، باتدی نفس
سالدی دلدن منی آخرده سَنان ابن اَنَس
نحری منهور اولونان ، سینه سی مکسورم آنا
گتوروبدی منی بو منزله باشیمداکی شور
موسی عصرم آنا ، طوریم اولوب کنجِ تنور
عاشقه طوریدی هر یرده تاپا فیضِ حضور
بو کول اوستنده یوزوم ، محوِ همان نورم آنا
یتوروب ظلمینی بیر نوع بو گون غایته شمر
یری وار چکدیره خط ، دایرهء رحمته شمر
خنجر آلتیندا سالوبدور منی چوخ زحمته شمر
یورولوب اینجیمیشم ، خسته و رنجورم آنا
باخمادی زینبِ بی کسده فغان و آهه
ساتدی اوز دینینی دنیایه بو بش گون جاهه
چکمه لی قویدی قدم مخزنِ سِرّاللهه
بولمدی حکمتین اسرارینه گنجورم آنا
اولمادی شأنوه لایق سنه تکریم ایلیم
پیشوازه گلم ، اخلاصیمی تقدیم ایلیم
بو کسوک باشیله لازمدی که تعظیم ایلیم
چون بو اندازه ده تشریفوه مقدورم آنا
گورمیوب چشمِ جهان بیر بیله خلوتگهِ راز
اودی جانانله ایستردیم ایدم راز و نیاز
ایتمدیم باشیمی خاکِ رهوه پای انداز
بولمدیم گلماقیوی ، عفو ایله معذورم آنا
دوزموشم فرقتِ عبّاس و علی اکبره من
تا شفاعت ایلیم امّتِ پیغمبره من
پاره پاره بدنیله گیدرم محشره من
باشسیز السیز گوره جاقلار هامی محشورم آنا
حجّتی کوفه و شام اهلینه اتمام ایلدیم
شرع ترویجینه جاندان گچوب اقدام ایلدیم
نیزه ده ذکریمی تکبیرةُ الاِحرام ایلدیم
بولورم ایلدیقیم خدمته مأجورم آنا
نشئهء جامِ محبّت واریدی جانیمده
من همان نشئه نی تاپدیم بو گون اوز قانیمده
مختصر وار او اثردن لبِ عطشانیمده
خیزران آختارورام ، نشئه و مخمورم آنا
من هدایت گویونون اخترِ رخشنده سیم
داعی حقّم اوزوم ، فیض نماینده سیم
تابعم حضرتِ معبوده نچون بنده سیم
شامه دین امرینون اجراسینه مأمورم آنا
اوّل مرحله دور خوشدی بو منزل بو مقام
نیزه اوسته گزرم چوللری بیر عمر ، مدام
گوره جاقسان آنا تاپماز بو باشون ظلمی ختام
باخما سن بو گجه بیر گوشه ده مستورم آنا
باخما باشیمده جراحاتِ مُجرّد یرینه
اون ایکی قد ویریلوب خامیه بیر قد یرینه
حدّسیز نیزه دگوب خنجرِ بی حدِ یرینه
پیکری اوخدان اولان ، خانهء زنبورم آنا
(صافیا) ایسته سن قبر ایوین آباد ایده سن
روز و شب سرورِ مظلومی گرک یاد ایده سن
الده عنوان ایلیوب بو سوزی فریاد ایده سن
زینبیمدن بو گجه ظلمیله مهجورم آنا.
مرحوم صافی تبریزی
منبع مجموعه کانالهای مدح و مرثیه
........................
احوالات تنور خولی
ای خولی تنوری بو گجه طوره دونوبسن
موسی باشی سینونده یم نوره دونوبسن
سینونده یاتوبدی بو گجه سرور خوبان
سینون اودی کی فخر ایلیور گوگلره الان
خوش حالوه باخ گور کیم اولوبدور سنه مهمان
بير لطف ایلیوب جنت پر شوره دونوبسن
بير حده چاتوبسان بورا حوراده گلوبدی
عیسائله موسائله طاهاده گلوبدی
ئوز اوغلونا باش چکمگه زهراده گلوبدی
عاشقلره ایچون نقطه منظوره دونوبسن
فرصت بو مکاندا هله ذکر غمه واردور
گیت گل بورا چوخدی بو گجه همهمه واردور
هر گوز گوره بیلمز نه گوزل زمزمه واردور
بو زمزمه دن لانه زنبوره دونوبسن
غلامرضا هادی اردبیلی
...........................
تنور خولی
نقل ایدور همسر خولی بو اسفلی سخنی
بستر ایچره گیجه یاری یوخی دوتموشدی منی
بلمیوردوم شرفین ماهی بیزیم ایوده باتوب
فاطمه اوغلی تنور ایچره کول اوستونده یاتوب
بلمیوردوم ایویمون دورین آلیب حور و ملک
بیزه پهلوسی سینان فاطمه مهمان گَلَجک
ویردی بیر ناله سسی قلبیمه رویاده تکان
خواب غفلتده یاتان گوزلری آچدیم یوخودان
یاندیروب مشعلی سالدیم ایوه دقتله نظر
گورمه دیم ناله و افغان ایلیندن هیچ اثر
قلبیمی ناله سسی کورکیمی گوردوم داغلار
ایو عزاخانیه بنذر ثر و دیوار آغلار
ایشیدوردوم او سسین صاحبی دردین سانادی
سوزلریندن بلنور اوغلی اولن بیر آنادی
دیور آهسته لب خشکوه زمزم قربان
آلنون یاره سینه یاره لی سینم قربان
بالالارین حرمین گوزدن آتان اوغلوم وای
جسمی چولده باشی کول اوسته یاتان اوغلوم وای
تشنه لب قانلی باشی ذبح اولان اوغلوم لایلای
گوزینون کاسه سینه قان دولان اوغلوم لایلای
...................................
احوالات تنور خولی
عالمون داشینی سلطان جهان آتدی گئجه
شمس دین خولی تنورینده نیه باتدی گئجه
جسمی صحراده تنور ایچره باشی یاتدی گئجه
گوردی بو صحنه نی فریاد ایلدی حور و ملک
عرشیدن فرشه نزول ائتدی نچه قاره لچک
ائتدیلر دوره تنوری او برازنده زنان
هاموسی ایلدیلر اشکینی رخساره روان
کیم باخوب قعر تنوره ائلدی آه و فغان
بیری سسلندی حسین آدوه موسی قربان
دئدی مریم کسیلن باشوه عیسی قربان
بیر خانم گلدی قباقه آغاروب باش قاراسی
سورونور یرده عباسی سینه ده وار یاراسی
آغلادوب اهل سماواتی اونون اوخشاماسی
تا گوروب کوللرین اوسته بالاسین فخر انام
دئدی ای وای منه گور هاردا یاتوب نازلی بالام
بالانون باشینه باخدی آناسی ناله کنان
سسلدی آچ گوزووی فاطمه گلدی بالاجان
غم بی حدون ائدوب قامت زهرانی کمان
بیلمورم ظلم و ستم ائتدی سنی خسته اوغول
قوجاقیم بوشدی یاتوبسان نیه کول اوسته اوغول
نوید آسال اردبیلی
........................
تنور خولی
به خولی بگفت آن زن پارسا
که را باز ، از پا درآورده ای؟
که در این دل شب چو غارتگران
برایم زر و زیور آورده ای
به همراهت امشب چه بوی خوشی ست!
مگر بار مشک تر آورده ای؟
چنان کوفتی در که پنداشتم
ز میدان جنگی سر آورده ای
چو دانست آورده سر، گفت آه!
که مهمان بی پیکر آورده ای
چو بشناخت سر را بگفت ای عجب!
سری با شکوه و فر آورده ای
در این کلبه ی تنگ و بی نور من
ز گردون مه انور آورده ای
بمیرم، در این تیره شب از کجا
سر سبط پیغمبر آورده ای؟
چه حقّی شده در میان پایمال؟
که تو رفته ای داور آورده ای؟
ولی زآنچه من آرزو داشتم
به یزدان قسم، بهتر آورده ای
به گلزار جانان زدی دستبرد
به کوفه گلی نوبر آورده ای
گل آتش است این که از کوه طور
تو با خاک و خاکستر آورده ای
مرحوم نگارنده
منبع مجموعه کانالهای مدح و مرثیه
.........................................
احوالات تنور خولی
بیر گجه حسین باشی ایلدی مطبخی منور تنوریده
گوشواره عرش لم یزل ویردی فرشه زیور تنوریده
بیر به بیر ملائک دئیردیلر بیر باخون بو قانه باتان باشا
جاه و عزتین جمله عترتین حق یولوندا باشدان آتان باشا
بارها پیمبر چکوب الین بو کول اوسته یالقوز یاتان باشا
وجه ذوالمنندور بو شکلیده تا اولوب مصور تنوریده
جبرئیله امر ایلدی خدا ای امین من گئیتگلن یره
فاطمه حبیبیم بهشتیدن قصدی وار گیده اوغلونی گوره
گورسه کوللر اوسته اوغول باشین عالمی ویرار جمله بر بیره
افتخاریله ایت قنادوی سن او باشه بستر تنوریده
گوردی بیر طرفدن عیادته جدی خاتم الانبیا گلور
مرتضی الینده عمامه سی مجتبی دیور وا اخا گلور
اللری بلینده گوزونده یاش دید شاهه خیر النسا گلور
سسلنور حسینیم هایانداسان سس ویرور او سرور تنوریده
خولی دنی قانلی باشوی کوفیه قوناق دعوت ایلیوب
چون بیلوب امیر حجازسن شانوه گوره خدمت ایلیوب
میزبان گوروب چوخ یارالیسان رختخوابوی راحت ایلیوب
میزبان یاتوب رختخوابیده میهمان مضطر تنوریده
کربلاده باش سیز جنازوی قان ایچینده آلدیم کناریمه
بیر به بیر ئوپردیم یارالارون قانوی یاخاردیم عذاریمه
ساربانی گوردوم دوزنمدوم باعث اولدی بو آه و زاریمه
گلدیم ایلیم کوفه ده عیان باشویله محشر تنوریده
سن اوزون قوناقسان بو کوفه ده منده گلمیشم میهمان سنه
چکمه خجلت اولما ملول اگر خدمت ایتمیوب میزبان سنه
زلفیمیله پاک ایلرم باشون سینم اوسته ویرم مکان سنه
قویمارام بو عزتله بسلنن باش اولا محقر تنوریده
استاد کریمی مراغه ای
...............................
شام غریبان حضرت امام حسین (علیه السلام)
اولور بالا آنا قوینوندا گرچه راحت اوغول
یازیلمیوب سنه امّا بیر استراحت اوغول
گوز آچ قوناقلاریوا بیرجه خوش صفا ایله
قوناقه لازمه دور احترام و حرمت اوغول
بهشت خانملاری گویدن یره نزول ایلیوب
بو قصدیله سنی تا ایلسون زیارت اوغول
قوری دلیله اوزوندن قوناقلاری ممنون
نوازش ایت یولا سال جانه وار بو منت اوغول
بو صاق یانیمداکی جدّه ندی حالینی خبر آل
اماندی ایتمه آنامدان منی خجالت اوغول
جواب ورماقا یوخ سنده حال حقون وار
یورولموسان ویریلوب چوخ سنه اذیت اوغول
اگرچه زحمتوه راضی اولمارام بیرده
قبول ایله منیم خاطریمه زحمت اوغول
باشی بلالی بیر آز گوگلوم ایستوری دانیشاق
گجه گیچر گیده فوته مباد فرصت اوغول
فداک یا ولدی یا غریب و یا مظلوم
منه بو امت الیندن ایله شکایت اوغول
باشنداکی یارالاردان خبر ویرور اورگیم
گرک نقدر بدنده اولا جراحت اوغول
نه گونده دور بدنون احتیاجی گورماقا یوخ
ایدر باشون بدنون حالینی حکایت اوغول
اوغول کول اوستی هارا , سن هارا , تنور هارا
گتورمه میش باشیوا قالدی بیر مصیبت اوغول
مگر بو قالدی جدایه ووروب دولاندیرالار
کسیک باشون ایده تا شهرلرده شهرت اوغول
بو ظلملر , بو بلالر اوساندیلار یا نه
گتوردولر باشوا بو وفاسیز امت اوغول
نقدر دیندیرورم دینمومسن بو دفعه ده گر
جواب ویرمیه سن ایلرم قیامت اوغول
جواب
دوشنده فاطمه دلدن گلوب مقاله امام
ایدوب سوالینه ردّ جواب ویردی سلام
حسینوین طرفیندن باشون سلامت آنا
الیندن آلدیلا اوغلون ستمله امت انا
اوزوم الوم خبریمی گتورموشم ایده سن
جفای امتینی جدّیمه شکایت آنا
باشیمدا وار اون ایکی معتبر شهود و عدول
ویرور شهادتیمه هر بیری شهادت آنا
یانیمدا دورت مینه دین شاهدیم صغیر و کبیر
گور هر بیرینده ثبوته یتوب عدالت آنا
ایدر ادای شهادت حضور داورده
اولا ضرورت داعی مقام حاجت آنا
علاوه یتمیش ایکی تن شهید ایچون تعدیل
همین بو اکبر و اصغر ایدر کفایت آنا
منیم قانیمدا محققدی سرّ ثارالله
زیارتین فقراتی ایدر دلالت آنا
قانیمدی خون خدا , خونبها خدای شهید
شهید شاهدی جدیم ایدن زیارت آنا
مصیبتمده جزای جزیل و صبر جمیل
سنه خدای جلیل ایلسون کرامت آنا
نه احتیاج تسلی سنه اوزون بولوسن
بیز اهلبیته اولوب قتل ازلدن عادت آنا
چوخ آختاروردی گوزوم یاخشی وقتده گلدون
چکردیم ایمدیه دین انتظار فرصت انا
نه دیندیرن نه دینن وار یورولموشام گجه نی
ایدیم بو سینه ده تا صبح استراحت آنا
بو حالیله منی قویمازلا راضیم قویالار
تنور ایچینده اولام بیر دقیقه راحت آنا
صباح اولاندا قوراللار بیر اوزگه هنگامه
که وار بلالی باشیمدا بویوک مصیبت آنا
وراللا سنگ جفا شامده کسیک باشیما
ایدنده نیزه ده کهف آیه سین تلاوت آنا
سکوت ایتماقمی کم محلّوق ایتمه حساب
سوروشما سرّینی وار دینمه ماقدا حکمت آنا
سنون یانیندا اوزوم زینبون یانیندا خیال
قویار خیالی مگر منده نطقه طاقت آنا
قالوب نه حالته اوچ گوندی گورمیوب یوزیمی
گورنده نیزه باشیندا ایدر قیامت آنا
باخوب جدایه وورار چوب محمله باشینی
زبس سینان باشینی گرم ایدر محبت آنا
گتورسه لر نه بلا نوشدور کسیک باشیما
ولیک زینب و کلثومه دور اذیت آنا
بو امر خیلی گراندور سنه عیاندی منه
ایدلله اهل عناد آشکار عداوت آنا
خانم باجیلاریما , محترم حرملریمه
ایده لله اهل جفا کوفه ده شماتت آنا
قوناقلاروندا اوزونده مشرف ایلموسن
بو گلماقوز سیزه زحمت منه خجالت آنا
بغشلیون منی سیز بانوی معظمه سیز
گرک وظیفه شانوز اولیدی حرمت آنا
نچون قوناقه گوره احترام لازمدور
ولی نه فایده یوخ منده استطاعت آنا
خجالتم الی بوش منزلیم محقردور
بو منزلیمده سیزه بولمورم لیاقت آنا
باشیم بدنده دگل تا دورام ایاق اوسته
ویرم ظهوره حضورنده حسن خدمت آنا
اماندی قوی یوزومی تپراقا ایاقوندان
اپوم خیالیده مدتدی وار بو حسرت آنا
غریبم آغلا منه کربلاده قویمادیلار
دویونجا آغلیالار اهل بیت عصمت آنا
جزا مصیبتیمه یا عوض شهادتیمه
اقلّ مرتبه دور پایه شفاعت آنا
(حقیر ) نوکریمون نسبتی سنه منه وار
ولی سنوندی شفاعتده حق سبقت آنا
مرحوم حقیر خویی
منبع مجموعه کانالهای مدح و مرثیه
........................
زبانحال حضرت زهرا (س) در تنور خولی
یارالی باشیوی زهرا گورنمزدی گل استنده
نجه گورسون کسیک باشین تنورایچره کول استنده
قلجلانموش باشین قانی عیاندوربو محاسینده
دیرسن اگلشوبدور تازه شبنم سنبل استنده
نچاره ایلیوم لب تشنه آخرسو کنارینده
باشیوی کسدی بیرکافر سنون سنگین دل استنده
یری واردور ویرم تالانه دنیانی اوغول جانی
بودورسری حسینیم بو خرابه منزل استنده
باشیوی کسماقا مشتاقیدورچوخ عده ی کافر
اوتورموشدی کمینگاهینده قاتل قاتل استنده
کسنده باشیوی میدان آراسیندا تماشایه
گلیدی کاش آتان ساقی کوثردلدل استنده
دوتوبدورگل یوزین کول یا ندور من گورمورم آیا؟
اوتورموش ابرتیره بیرهلال کامل استنده
بیله ظلم اولماز ایلوبله ابوالفضله بو کافرلر
کسوبلر هانسی سروین قول بوداقین حاصل استنده
لباسون سویدولارآت چاپدیلار عریان جنازنده
یارالی نعشوین هیچ اولمادی بیر ساتراستنده
جواب
اگرچه ای آنا من یاتموشام چوخ گللراستنده
داغیلدی خانمانیم ایمدی قالدیم کوللر استنده
سوسوزحلقومیمی شمرین الینده کسمدی خنجر
منه آرتوخ ویروب زحمت کسنده بو سراستنده
گوروب کسمورقاباقدان خنجری سالدی یوزوم استه
منی چوخ اینجیدوب اول بیحیا بو رگلراستنده
باشیمی کسدیلرال چکمدیلرای آنا مندن
دوباره آت دولاندوردولا جسم بی سر استنده
اوزون سالدی سینم استه سکینه تا اولا راحت
اونا سیلی ووروبدورکوفیان بو پیکراستنده
نگوردوم نیزه استه اود دوتوبدورخیمه و خرگاه
وورولارتازیانه زینبه بیرمعجراستنده
باشیما چوخ مصیبت گتدولر بو فرقه گمراه
ولی چوخ اینجیدوبدی ساربان انگشتراستنده
(ذلیلا)بسدی پامال ایله سن بو ملک دنیانی
دیسن گربیرده شاه تشنه دن خاکستراستنده
مرحوم ذلیل تبریزی
منبع کانال گنجینه گذشتگان
..........................
زبانحال در تنور خولی
قتلگهده بویادی زلفین آنان قانه اوغول
گلدی خولی اوینه شام غریبانه اوغول
منه تودیعه گلندن سنه ای سبط رسول
گزورم چوللری آردونجا گوزی یاشلی ملول
ایتموسن هاردا بو یوللاردا سن اجلاس نزول
اوردا من دلده آدون گلمشم افغانه اوغول
کربلا دشتنه چکدی منی دردین هوسی
مخیمونده واریدم عمریون آخر گجه سی
خیمدن عرشه چخاندا باجوون ناله سسی
من اوزوم همدمیدیم زینب نالانه اوغول
آخرعمریونده قویاندا یوزوی توپراقا سن
دوشمیشدیم بوغازون آلتنا آق زلفمی من
الینی گوزلریمه قویدی آتان شاه زمن
دوشمیه تا نظریم خنجربریانه اوغول
دمه بیر لحظه سنی گوزدن آنان آتمشدی
قانه هر بیر یارادان کی بدنون باتمشدی
یارالار قانی منیم زلفمی ایسلاتمشدی
سن کیمی اوردا بلشمشدی آنان قانه اوغول
مصرعونده بلیمی بوکدی منیم لشگر شام
عمریون گچدی چراغی گونوز اولدی منه شام
گون کیمی گچدی باشون نیزیه گون اولدی تمام
چکدی قان لخته سی پرده خور رخشانه اوغول
گجه نین ظلمی گونوز ظلملرینن باشدی
هله گوندوز یاخلان قانیله زلفم یاشدی
او بدن کی کفنی نیزه قلنج اوخ داشی دی
اوزگه ظلم ایتدیلراول پیکر عریانه اوغول
ساربان اولدی سسب قانه دونن گوز یاشیما
اللرون کسدی دوتوب قانوی یاخدیم باشما
گلمدیم دشمن بیرحم ایونه اوز باشیما
گدی عشقون منی بو کوفه ی ویرانه اوغول
بلمیوب کوفه لیلر قدرووی من بولم اوغول
هر یره گتسه باشون دلیده آدون گلم اوغول
کول دولوبدور گوزیوه زلفمیله سیلم اوغول
آناوی عشقون ایدوب گور نجه دیوانه اوغول
گوندوزوم شامه دونوب سنسیز ایا صبح ازل
کیم سالوبدور سنی بو حاله اولا اللری شل
یاتما نازیله کول اوسته بالا دور سینمه گل
قویما اوج ایتسون آنان ناله سی کیوانه اوغول
سن بو ماتم زده خون جگره سو گلوسن
جور خاریله سولان گولشنمون بیر گولی سن
یارالی سینمه ترجیح وروبسن کولی سن
گلماقون سینمه منت دی گنه جانه اوغول
سن اوغول اوغلی اولن قلبی یانان بیر آتاسان
من اوغولسوز آناوی حاش گوزوندن آتاسان
نه گلوب سینه ی زهرایه کول اوسته یاتاسان
کول اولا مردمک عالم امکانه اوغول
گلمشم آچ گوزون ای برج امامت قمری
آناوون گور نجه رخساره آخور اشک تری
یوخوموش خولی بیرحمده انصاف اثری
بو نه منزیلدی وروب سن کیمی مهمانه اوغول
سینمی تیر غمه هر غمون آماج ایلیوب
منزلون دشمن ایوی صبریمی تاراج ایلیوب
چرخ آیینه نی خاکستره محتاج ایلیوب
کوله محتاج اولا بو چرخ ذلیلانه اوغول
ای جمال اللهه آیینه رخ انویله
سیلینن گرد رخی صورت پیغمبریله
دوزدی گرون سیلر آیینه نی خاکستریله
نه بو آیینه نه بو کول نه بو کاشانه اوغول
اولا هر ظلم و ستم دهریده مظلومه چاتار
غم اوخی غملر الیندن دل خونینه باتار
میزبان رذل اولا مهمانی کول اوستتونده یاتار
گوشه مطبخ اولار مأمن شاهانه اوغول
سیخلار اوچی الیندن یارالی قوش بو داغا
جبر ایدر شاهی پناهنده محقر اوتاقا
لیک ورمزله مکان کنج تنوری قوناقا
حتک حرمت دی بو یر سن کیمی مهمانه اوغول
بودی دنیانین ایشی خار ایده هر سو گولونی
داغیله غنچه اکن لاله ی نعمان دلینی
آفت باد خزانه ویره گلشن گولونی
هر بهار آغلار اودور ابر گلستانه اوغول
بسلدیم من گل طاهانی دل اوستونده بالا
خاره یالوارموشام آخر بو گول اوستونده بالا
یارالی صورتوی قویما کول اوستونده بالا
حیف دور گول دوشه خاکستر سوزانه اوغول
بوغازوندا باخورام زخم مکرر یرینه
حنجرونده یانورام اون ایکی خنجر یرینه
گور دوزر هانسی آنا اولسا بو مضطر یرینه
توکمز اشگ بصرین من کیمی دامانه اوغول
گزدیم ای یوسف گمگشته سراغونده سنون
تاپدیم آخر او چوخور یرده یارالی بدنون
گوندرم غصه لی یعقوبه بر پیرهنون
تاپمادیم جبرا آپارمشدیلار تالانه اوغول
پیکرون بنزوری گوردوم یازیلان قرآنه
جیلدی یوخدور داغلوب هر ورقی بیر یانه
من باخوردوم او داغلمش بدن عریانه
گوردوم اول جسمده گلمور یارالار سانه اوغول
ایتموسن عهد الستونده بلایانی قبول
او بلایا کی اونا واله و حیراندی عقول
داغدوب ناطق قرآن بدنین سم خیول
بیرده شیرازه ورولماز بیله قرآنه اوغول
قان ایدوبدور یارالی قلبووی قارداش یاراسی
باشدا شمشیر جبینونده اوغول داش یاراسی
قاریشوب بیر بیرینه داش یاراسی باش یاراسی
آناوون قانه دونر گوز یاشی گریانه اوغول
قان سریرینده یاتوبسان یارالی پیکریله
سایه سالیمش سنه اوخلار قوشی شهپرلریله
اهریمن ال تاپوب انگوشتوه انگشتریله
آچولوب غارت الی دست سلیمانه اوغول
گیتمز ایستکلیسی ایستکلیدن عالمده یانش
دیندیرر خوش دلیله هر کیمی دیندیرسه تانش
چوخدی غصه م بولوسن گوگلمی آل بیرده دانیش
آشنایم دگلم من سنه بیگانه اوغول
منزل ذهنی سائلده بو اشعاری یازان
صابر و حافظی و نجمی و سعدی زمان
مسگر و رنجبر و سالک و طهباز جوان
اولدی بانی حسنینیله بو عنوانه اوغول
بیزه نوکردی بولار شاهه تیکر گوز نوکر
اودی گوز یاشلی هره درد دلین عرض ایلر
جمله سی دردینه درمان و زیارت ایستر
دعوت ایله اولاری وقفه ی قربانه اوغول
مرحوم حسینی سعدی زمان
+ نوشته شده در چهارشنبه بیست و نهم مرداد ۱۳۹۹ ساعت 11:9 توسط شهرت گوزلی و رحیم حسینی نژاد
|
نوحه واشعاری درموردشهدا و اسرای کربلا