کونول آسیلدی سرِ طرّهء مُطرّادن
مسیحِ عشقه بلی دار اولار چلیپادن
حقیقت اوسته گیدن پای داره ، پایدار اولدی
صفا و صدقیله هر کیم که گیتدی دنیادن
مجازیدن یتیشرمیش حقیقته عاشق
اینانماسان خبر آل سرّینی زلیخادن
بو یرده شاهدیمز چوخدی ، بیر ایکی دگولی
لزومی یوخدی دیاخ وامقیله عذرادن
ایدوبدی آئینهء دلده جلوه طلعتِ یار
ضمیریمی اوخیوبدی نهان و پیدادن
اورک گوزینده اونی آیری جذبده گورّم
نه قدریده باخورام دویمورام تماشادن
سالوبدی قلبیمه رحمت سحابی تک سایه
آلوبدی لطفنی گویا او لیلِ اسرادن
باخاندا رنگینه زلفی کیمی قرا گورونور
ایشقیدی لیک یوزی مِهرِ عالم آرادن
بِلاله اوخشوری همگام اولوب اباذریلن
دیولّه (جون) آدینا ، شاد بو مسمّادن
اوزی غلامیدی زنگی و لیک آزاده
حقیقت اوسته گیدور گوردوقی مزایادن
ازل عقایدینی اورگنوب اباذردن
نه مادر و پدریندن نه جدّ و آبادن
وظیفه بولدی که مولاسی تک حمایت ایده
ولیّ امرِ زماندان علیّ اعلادن
ئولونجه چکمدی ال ، بهره مند اولوب بیر عمر
علی و آلِ علیده اولان مزایادن
ملازم اولدی حسینین رکابِ اقدسینه
او کاروانیله باهم چیخوبلا بطحادن
غلامی همره ایدوبدی امامه صدق و صفا
هراس ایلمه دی یولداکی بلایادن
یتیشدی موکبِ میرِ اُمَم بلا چولونه
آلوب مشامه شهادت ایگین او صحرادن
دولاندی گون یتیشوب شامِ تارِ عاشورا
امام فارغ اولوب حمدِ حیّ یکتادن
صورا بویوردی گیدنلر دایانماسین گیتسین
هاموسی بهره ور اولسون بو لیلِ یلدادن
قالان سحر بو بیاباندا قانینه باتاجاخ
چتیندی ساغ قوتارا جانینی بو غوغادن
گیدن گیدوبدی قالان اولدی جنگه آماده
او نوعیلن که هامی باخبر قضایادن
قالانلارین بیریده (جونیدی) سعادته باخ
او یرده گیتمدی قالدی ، اولوب اَخِلّادن
اولوبدی متعکف اوز خیمه سینده صبحه کیمی
اگر چه باخبر اولموشدی کارِ فردادن
دیردی اوز اوزونه صبحه تک خدا گوره سن
اولار که منده حسینه اولام احبّادن
بونی بولوردی ولی فرقی یوخدی آق قارانون
بیری عزیز اولا بولمز مگر که تقوادن
اویاندا لشگرِ اعدا گیجه ایدوب شورا
سحر نبرد اولا تصویبی چیخدی شورادن
آچلدی صبح نجه صبح؟ شامِ آل علی
گیچردی نالهِء واحسرتا ثریّادن
گوروردی (جون) حسینین مقابلنده دوران
او جمع آدلاری مُسلومدی پَست ادنادن
حلال اولان سوئی حتّی' حرام ائدوب او شهه
صدای العطش اوج ائلیوب صبایادن
مدام سسلوری هل من معین او حامیِ دین
او سنگ دللرین اما جوابی وار لادن
گلوب حضورینه ال سینه سنده پوزقون حال
جهاده اذن آلا تا اینکه پورِ طاهادن
سلامدن صورا عرض ائتدی ای امامِ همام
سیزه کمک اولا اولماز بو قومِ ادنادن
اجازه اولسا اگر ایستورم اولام کمکوز
مصون اولا بالالار من ئولنجه ایذادن
محبّتیله نظر سالدی (جونه) پورِ علی
معاف سن بویوروب ایسته سن بو دعوادن
گرگ دگول بیزه خاطر خطر قبول ائده سن
مُجازیسن گئده سن بو مکان و مأوادن
بو سوزده لرزیه دوشدی وجودی بید کیمی
بیر اودلی آه چکوبدی او دم سویدادن
دوشوب قدملرینه عرض ائدوبدی عجزیله
نه فایده منه سنسیز بو دارِ دنیادن
شرافتیم قسم آللهه لکّه دار اولدی
تَنفّروم وار اوزومدن اولام بقایادن
سیزون آقالوقوزی من قبول ائله میشم
بو قولی ثابت ائدر فعلیم عهده ایفادن
خدایه آند اولا من سیزدن آیرلان دگولم
بو یولدا خوف و هراس ائتمرم منایادن
غلامِ حلقه بگوشم سیزه هاچان اولی که -
غلام آیریلا وقتِ خطرده مولادن
قبول اولماسا نوکرلیقیم حضوروزده
اورک ئولنجه یانار حسرتِ غم افزادن
آلام رضایتوزی نقدِ جان الیمده گلوب
گرکدی چوخ آپارم منفعت بو سودادن
توکوب سرشگینی آغلاتدی صبر دریاسین
اجازه آلدی امامِ علیم و بینادن
گلوبدی شوقیله صفلر مقابلینده دوروب
ائدوب ازل رجز انشاد طبعِ گویادن
صورا بویوردی ایچرسیز بو تیغِ تیزیمدن
اجل پیاله سی لبریز اولوبدی صهبادن
حسین امامیدی واردی ولایتی هامویا
سعید او کسدی که چوخ سهمی وار تولّادن
منه ده ، حقه ده ، دشمندی دشمنانِ حسین
خوشام سیزه گوره قلبیمده کی تبرّادن
اگر چه سوزلری باشدان باشا نصیحتیدی
آیلمادی ولی بیر کیمسه اول سُکارادن
بلا درنگ قلنجین نیامدن چخادوب
ائده دفاع حریمِ امامِ والادن
یسارِ لشگری طومار تک آچوب بوکدی
مشاهده اولونوب برقِ تیغی یُمنادن
نظرده آلدی کی قلبِ سپاهه حمله ائده
نتیجه بلکه آلا ائتدوقی تَقلّادن
او قومه تنگ ائلیوب عرصه گاهِ پیکاری
سالوبدی توپراقا بیر عدّه فوجِ اعدادن
قاچاردیلار قاباقندان عَساکرِ لشگر
قاچار او نوعیله روبه که شیرِ غَرّادن
امیرِ لشگر کوفه او پیرِ تابعِ نفس
ائدوبدی امر توان آلماقا او برنادن
قاچان قیتدی بِناگاه هر گلن دوردی
گویون یوزی دوتولوب گَردِ سطحِ غبرادن
او شیرِ شرزه نی ائتدی محاصره لشگر
هجوم گتدیله هر سمتدن ، زوایادن
یتشدی بوینونا بیر یاره بسکه کاریدی
آلوب توانین او یاره سالوب توانادن
یخلدی توپراقا سعی ایلدی دوباره دورا
دورانمادی یارا سالموشدی بسکه یارادن
مصمّم اولدی قالا سجده گاهِ عشقینده
ائده عروج ، سماواته اول مصلّادن
خیال ائدوب چاغوروم دادیمه آقام گلسین
ولیک منصرف اولدی بئله تمنادن
دیوبدی اوز اوزونه سن هارا حسین هارا؟
اورکده کی نه تمنّادی پورِ زهرادن
بولوبدی خواهشِ قلبین ولی امامِ علیم
چتیندی گیزلنه بیر سِرّ سرّه دانادن
گلوب یتشدی آلوب باشینی دیزی اوسته
گوروب که قان گئدوری چشمه چشمه اعضادن
بویوردی دور ایاقا ای منیم هواداریم
اگر چه سرو کیمی سالدیلار سنی پادن
دیرسن عاذر بی جاندی جانِ تازه تاپوب
مسیحِ عشقه وئرن دم ، دمِ مسیحادن
آچوبدی گوزلرینی باخدی بیر امامه طرف
دوباره فیضِ لقا آلدی ماهِ سیمادن
او بیر باخیشدا بولوبدی مرامِ قلبین امام
سیلوبدی لخته لَنَن قانی چشمِ شهلادن
صورا اگیلدی او زهرا اوپن جمالی حسین
قویوب غلام اوزونه صورتیله معنادن
دئدیکه ائیله خدایا بو قاره رنگی سفید
نه تک سفید ، گوزل رنگی رنگِ بیضادن
معطّر ائیله الهی بو (جون) رایحه سین
منی خجل ائلمه ائتدیقم تقاضادن
بو سوزده گوزلرین آچدی تبسّمیله دئدی
دُرِ سعادتی اخذ ائیلدیم بو دریادن
کیمین چاتار منه شأنی به غیرِ آلِ علی
اولوب بو قاره یوزوم رنگ رنگ زیبادن
دوشوب او حالیده موسی کیمی اولوب مدهوش
همان او گوردوقی سیناده کی تجلّادن
آخوبدی گوزلر حسینین یوزونده قالدی گوزی
او قدر گیچمه دی که محو اولوب تماشادن
بئله رئوف امامین نجه روادی باشین
جفائیله چکلر داره نخل خرمادن
نه سرگذشتی وار الله بو یاره لی باشین
تنوریدن گلوری گه سسی کلیسادن
قویوب کول اوسته مسلمان ولیک راهب اولان
ائدوبدی بستر او باشه حریر و دیبادن
مرادیوی (حسنی) وئردی صاحبِ احسان
تشکر ائیله سنه لطف اولان هدایادن
اولوبدی بانیِ شعر عسکری آدی محسن
نهان ائدنمه دی دردین غمِ هویدادن
شریک ائیله خدایا اونودا بو فیضه
سهیمدور منه الحق بو فیضِ عظمادن
ذخیره ائیله بو فیضی قیامتین گونونه
اونوندا واردی منیم تک هراسی عقبادن.
استاد حسین حسنی افشرد
منبع مجموعه کانالهای مدح و مرثیه
نوحه واشعاری درموردشهدا و اسرای کربلا