احوالات حضرت علی اکبر (علیه السلام)
اورك گوزومده عجب منظره هویدادی
نه منظره كه به سان بهشت اعلادی
دیسم بهشتیده هرگز بیله صفا یوخدی
ایدر بو عرضیمی تصدیق او گوز كه بینادی
اورك گوزیله باخاندا او ایكه من گورورم
دیلیم بیانینه عاجزدی ناتوانادی
ایله مجسّم اولور عالی بیر سرا گوزومه
كه آستانه سینه فرش اولان ثریّادی
او صحنه كه گورورم وادی مقدّسدور
محل لطف خدادی، مقام موسادی
او قبّه كه باش اوجالدوبدی قبّه ی فلكه
طواف ایدن اونی خورشید عالم آرادی
او قبّه دن گون ایدر كسب نور هر گونده
دیمه بو نور ندور یا بو نه تجلّادی
او گون كه سیر ایدر افلاكی گونده بیر دفعه
مرامی شوط همان قبّه ی معلّادی
او قبّه صاحبی كیمدور سوال ایتدیم من
جواب گَلدی قتیل گروه اعدادی
ذبیح كوی محبّت، شهید عشق خدا
یگانه گوهر گنج خدای یكتادی
آدین سوال ایلدیم ویردیلر جواب منه
حسین تشنه جگردی، آناسی زهرادی
ایشیتمیسن حرمینده اوغول دیور آغلور
اَلی اوركده گَزور، ذكری وا حسینادی
اجازه حاصل ایدوب داخل رواق اولدوم
نجه رواق، بهشتدن یقین دل آرادی
ایله رواقه اگر عرض ایدم لیاقتی وار
رواق عرش معلّادی، بلکه بالادی
گورن گوز ایستوری گورسون، که اَل اَل اوسته دوران
مسیح عشق حضورینده یوز مسیحادی
کلیم منتظر رخصتِ تکلّم دور
ذبیح گر اولا خُدّامی فخر عُظمادی
شهاب کشتی فکری اُتورمه اوز باشنا
گوزَتله غرق اولوسان، بو عمیق دریادی
کناره چخما، سوزون رشته سی چخار اَلدن
بیان واقعه ایله، دیمه که رویادی
او تحت قبّیه باخ بیرده بلكه بیر گوره سن
او محترم حرم ایچره نه شور و غوغادی
او آلتی گوشه ضریحی طواف ایدنلری گور
عجب مراده یتوبلر عجب تمنّادی
بیری زیارت اوخور گوز یاشین ایدیر جاری
بیریسی درد دله دل آچوبدی گویادی
بیری نظرده علی اصغری مجسّم ایدور
آدی صغیر ، گورور ماجراسی كبرادی
سوسوزدی آغلور آناسی باسوبدی سینه سینه
آناسی شامه گیدوب حالی چوخ غم افزادی
آنا یرینه آتا متّصل دیور لای لای
خرابه ده آناسی ذکری وا علیلادی
بیری عروس او زلفون یولان یری گوروری
ببریسی یاده سالور قان حنالی دامادی
بیری دیه او یتیمه اگر مبارک باد
حقیقتاً یری واردور، دیمه کنایادی
بیری ضریحین اَیاق سمتینی اُپور، دویمور
مگر او یرده یاتان هانسی ماه سیمادی
او بیر جواندی كه تعریف ایدوب اونی دشمن
جمالی گُلدی، لبی غنچه، قدّی رعنادی
ایله گُل اوزلی بشر گورمیوب بو گردش پیر
علاوه گورمیه جاق باقی تا بو دنیادی
مین ایلدی گُل آدی زیب مجالس غمدی
بیر عالم اهلی اونا عندلیب شیدادی
اوزی شبیه پیمبر، آدی علی اكبر
قرار و طاقت و آرام شاه بطحادی
بیله جوانیدن اَلحق چتیندی اَل اوزماق
بیله بلایه برازنده اُمّ لیلادی
گَلوب جهاده گیدنده آناسینی گورسون
گوروب خانمدا اُلوم حالی آشكارادی
آناسینا اورگی یاندی، نطقیدن دوردی
صراحتاً دیمدی بو وداع اُخرادی
آنا گورنده اوغول حالینی ، اوزی قاندی
اوغول قلج دمینه گیتماقا مهیّادی
نه اولدی تاب تكلم اوغولدا نه آنادا
تصوّر ایلمه سن بولمه سن نه اوضادی
آنا بالایه باخوب آغلادی ، بالا آنیه
او حاله آغلاسا سكّان عرش باجادی
اوغول، آنا، باجی، عمّه، تمام عورت اوشاق
قاریشدی بیربیره گویا كه حشر برپادی
اوجالدی ضجّه و شیون خیام طاهره دن
دایاندی عرشه حریمون فغان و فریادی
گر ایستَسَن بُله سَن بُل بو سوزدن اهل حرم
سُوَردیلر كه نه قدری او سرو آزادی
خیامیدن نچه دفعه تمام اهل حرم
چیخوب كناره او گون، اَلده واردی اسنادی
بیری حسینون او صحراده اوز وداعیدی
كه چولقامیشدی فغان پرده پرده ایجادی
بیری بو تازه جوانی یولا سالاندِیدی
گورن دیردی یقین نفخ صور پیدادی
بیری اَلیندن اُپردی، بیری ایاقیندن
بیری كسردی یولون دلده شیون و دادی
بیری چخاندا سراسیمه خیمه دن، یوگوروب
باساردی باغرینا اول نوجوان ناشادی
بیری دیردی غریبوخ بیزه ترحّم ایله
سنون بو آیریلیقون تلخ و ناگوارادی
اوغول آناسی باخاردی دوتاردی دلدن اود
اَلولانوب جگری، اودلانوردی اَكبادی
دیردی بیر چكیلون یوز قویوم قدم لرینه
اوغول اَیاقینه دوشه آناسی اولادی
قویون آچیم ساچیمی بیر توكوم گیدن یولونا
سالوم كمنده، عجب بو غزال زیبادی
گیدر دچار اولی صیّاده خیمیه گلمز
قالور آناسی اوغول سوز بو چولده تنهادی
ویرون اَلین اَلیمه سیز، منیم گوزوم گورمور
گوزیمه پرده گَلوب یا كه لیل یلدادی
اوجادان آغلامیون بلكه بیر سسین ایشیدیم
اوغول سسی آنیا طاقت و توانادی
امام گوردی حرملر علیدن اَل چكمور
او آه و ناله او خسته جوانه ایذادی
دیدی بالامی چوخ اینجیتمیون قویون گیتسین
یولونی گوزلور اونون منتظردی جلّادی
بالامی آغلیوب آغلاتمیون ، عطش گتورور
اوزی سوسوزدی، بو صحرا بیر اودلی صحرادی
حرملرین هره سین بیر دلیله ساكت ایدوب
اگرچه هر تكی بی صبر و بی شكیبادی
حرم غزالینی میر حرم حرمدن آلوب
سالوب یولا اوز اَلیله چاغیردی صیّادی
یوزون دوتوب گویه عرض ایتدی شاهد اول یا رب
بو نوجوان كه هامی حُسنِ خُلقه دارادی
آدی علیدی، آتام مرتضی نشانه سیدی
ولیكن خَلقاً و خُلقاً شبیه طاهادی
بس ایت بو قصّه ی جان سوزی شرح ویرمه (شهاب)
آناسی فاطمه بو غمده ناتوانادی
شاعر : مرحوم شهاب
نوحه واشعاری درموردشهدا و اسرای کربلا