شجاعت شاهزاده حضرت علی اکبر (علیه السلام)

لشگر گوروب حسینون طاهایه بنزر اوغلی

میدانه سالدی غوغا الله اکبر،، اوغلی

ترک ایلیوب خیامی یوز قویدی رزمگاهه

بیر لخظه ده یتیردی میدان قتلگاهه

وحشت سالوب حسینون شهزاده سی سپاهه

سسلوردی ای جماعت گور نیلر حیدر اوغلی

هر بیر قدم گلوردی، صفلر دالا قاچوردی

جانین قوتاردی هرکس بیر ذره یول آچوردی

فرماندهان اعدا رنگینده قان قاچوردی

زینب دئیوردی احسن، شیر دلاور اوغلی

هرکیم گلوردی جنگه شبه پیمبریلن

تا روبرو دوروردی ماه منوّریلن

گویا دوروب مقابل فتّاح خیبریلن

صفیّنی ایتدی احیا، فتاح خیبر اوغلی

سسلوردی اشقیالر فرزند حیدرم من

استاد رزمیم عباس هر درسین ازبرم من

شیرخدانین اوغلی شیر دلاورم من

میدانه سالدی وحشت شیر غضنفر اوغلی

سسلوردی ویرموشام من پیمانِ عشقه امضا

جان نقدی قویدوم ایتدم میدان عشقی احیا

بازارِ مصره سالدوم بو قیمتیله غوغا

اولدی فقط خریدار زهرای اطهر اوغلی

من گلموشم علینون احیا ائدم حُنینین

تک قویمارام بتولین بو چولده نور عینین

اؤپسون گرک عمرسعد ال ایاقین حسینین

یوخسا ائدر بو نهری قان شاه محشر اوغلی

قلب سپاه دشمن ایتدی شکستی احساس

ایش بیر یره دایاندی اوضاع اولوندی حسّاس

مخیمده عشق ائلوردی هر ضربه سینده عباس

سسلوردی احسن احسن شاه دلاور اوغلی

شاعر گرکدی ائتسون هر مطلبه اشاره

ائتسون سفر خیالی،، او قان دولان دیاره

بو شعریده« فقیرین »قلبی اولوندی یاره

بی شک ائدیردی یاری لیلانین اکبر اوغلی

شاعر : فقیر خویی