شجاعت حضرت ابوالفضل العباس (علیه السلام)

شجاعت حضرت ابوالفضل العباس (علیه السلام)

ای لشگر ستمگر سردار لشگرم من

عباس نامدارم ماه منوّرم من

دنیایه گوز آچاندان مولایه نوکرم من

اُمّ البنینون اوغلی غیرتلی اَفسرم من

سالار و سرورم من فرزند حیدرم من

کرببلا چولونده وار حکمت فراوان

خلق ایلرم بو یرده عشقیله آیری طوفان

مولا اجازه ویرسه دشمن اولار پشیمان

قولارین ابن سعدین من باغلارام چوخ آسان

من آل مصطفایه غیرتلی افسرم من

سالار و سرورم من فرزند حیدرم من

ای اهل‌بیت طاها آسوده‌تر قالون سیز

اذن جهادی شهدن لطف ایلیون آلون سیز

سالسون یولا فراته مولایه یالوارون سیز

من نیلورم جهانی نهره یولا سالون سیز

گورسونله ایندی فرصت اغیاره ویرمرم من

سالار و سرورم من فرزند حیدرم من

ناگه گلوبدی بیر سس اَخیامه دوشدی تشویش

گاهی چکوردی نعره گاهی ایدردی خواهیش

شمرون گلور صداسی بیلدی هامی کم و بیش

یعنی دیوردی قصدیم گلمکده واردی سازیش

عباس اودم بویوردی سالار لشگرم من

سالار و سرورم من فرزند حیدرم من

اُمّ البنینه خاطر قَصد اَمان واریمدی

قوم بنی کلابه عشقیم هرآن واریمدی

اَخیامیده بیلون سیز درّ گران واریمدی

ابن زیاده یازدیم نام و نشان واریمدی

سقا جواب ویردی ظلمه باش اگمرم من

سالار و سرورم من فرزند حیدرم من

بیعت پیمبر اوغلی گر ایتمدی یزیده

سن قالما خیمه لرده عباس نور دیده

سیز اولمیون بو یرده میداندا سر بُریده

لشگردی دورت طرفدن وحشی کیمون دریده

شمره بویوردی دور اُول مولایه نوکرم من

سالار و سرورم من فرزند حیدرم من

امّا نه‌لر اولوبدی اخیامیده خدایا

شرمنده اولدی یارب بو سر صدایه سقا

شمره غضبلنوبدی غیضیله مثل عنقا

یعنی حسیندی عشقیم یعنی حسیندی مولا

بو اسم اعظم آدین دنیاده ازبرم من

سالار و سرورم من فرزند حیدرم من

مولا دیدی اَمان ویر ئولدورمه ای برادر

صبر ایله توکمه قانین فرزند پاک حیدر

کیم گلسه بو حریمه مهماندی ای دلاور

نقشه چکوبدی دشمن فتنه سالا ستمگر

لشگر جهانی دوتسا مافوق لشگرم من

سالار و سرورم من فرزند حیدرم من

اورگشموشم بو درسی من میر مقتدادن

خط آلموشم جهاندا سالار و رهنمادن

درس آلموشام حسیندن فرزند مرتضادن

طاقت گرک آلام من بیر فوج اَشقیادن

سیلی ویرام بو قومه دلبند مادرم من

سالار و سرورم من فرزند حیدرم من

مولا حسینون آدین عشقیله سسلر عباس

خاموش اولوب دیلنده آتش فشان احساس

صول الده بیرق حق ساق الده تیغ الماس

سسلندی نعره چکمه بیر بیله پیر خنّاس

دنیایه سرور اولسام شاماته گیتمرم من

سالار و سرورم من فرزند حیدرم من

کیمدی بنی کلابی بیر مُنجلی یانیندا

عشق ایلورم همیشه منکه ولی یانیندا

یانماز چراغ ناکس حق مشعلی یانیندا

ئولسم هدف واریمدی آل علی یانیندا

ارباب اولیایه عالمده شهپرم من

سالار و سرورم من فرزند حیدرم من

عشقین امیریمون من هفت آسمانه ویرمم

بیر دیرناقین حسینون کلّ جهانه ویرمم

حق پرچمین الیمدن من دیگرانه ویرمم

نوکرلیگین نشانین هر بی نشانه ویرمم

مولا آدین دیلیمده عالمده ازبرم من

سالار و سرورم من فرزند حیدرم من

شمر ستمگر اَسدی یاپراق کیمون او یرده

لاف گزافی اوسته چکدی او دمده پرده

مکتوبینی آتوبدی قالدی او دردسرده

بیردن قیتدی قاچدی یوخ کیمسه دور و برده

سقا بویوردی قاچما باش کُفره اگمرم من

سالار و سرورم من فرزند حیدرم من

راوی دیور غضبدن گوردوم او سرسپاهی

اوت ووردی کربلایه افلاکه گیتموش آهی

بیر سوز دیدی اوجالدی عرشه چوخ عزّ و جاهی

یعنی دگر بهشته اربابیمون نگاهی

اَل تا اَبد حسیندن ئولسمده چکمرم من

سالار و سرورم من فرزند حیدرم من

حیف اولسون ایندی مولا مانع ایدوب جدلدن

قورتاردی نحس باشوون ای شمر دون اَجلدن

عشقیم حسیندی تنها الله بیلور اَزلدن

حاشا دوران ایاقه سیلی ییسون بو اَلدن

جانون سنون آلاردیم بیر کوه پیکرم من

سالار و سرورم من فرزند حیدرم من

شهرت منه نه لازم عزت واریمدی بسدی

آل علی یانیندا قیمت واریمدی بسدی

فخر ایتمرم قولومدا قوّت واریمدی بسدی

شکر ایلرم خدایه غیرت واریمدی بسدی

خاک رهین حسینون دنیایه ویرمرم من

سالار و سرورم من فرزند حیدرم من

میدان کربلاده هر سمته دوندی سقا

شمری گوره جوابین شمشیریله ویره تا

گزلندی شمر ظالم غرق اولدی قانه اعدا

طوفان گویه اوجالدی سقا سالوبدی غوغا

سسلوردی پشت سرهم میر دلاورم من

سالار و سرورم من فرزند حیدرم من

میدانه لرزه سالدی خونپاش تیغ بُرّان

افلاکیده مَلکلر گوردی قالوبدی حیران

آلدی فراتی سقا جانلار او عشقه قربان

تل اوسته گوردی مولا خورشید اولوب نمایان

اظهار ایدور فدای شهزاده اصغرم من

سالار و سرورم من فرزند حیدرم من

سو ئوپدی اللریندن تشنه قالوبدی سقا

نفسی دیدی ئولمده سو ایچمرم من حاشا

یالوارسا نهر علقم یالوارسا نهر و دریا

عطشاندی آل حیدر نالاندی آل زهرا

عرض ایلدی اوتان سو سقای رهبرم من

سالار و سرورم من فرزند حیدرم من

مشکین ایدوب حمایل آیرلدی بی‌مهابا

کسدی یولون دوباره نخل ایچره قوم اعدا

بیر بی‌حیا حواله شمشیرین ایتدی اوندا

آیرلدی ساق قولوندان دریای عشق سقا

مشکی بویوردی خصمه ئولسمده ویرمرم من

سالار و سرورم من فرزند حیدرم من

صول قولدا آز زماندا اولدی جدا بدندن

بیر اوچ پر اوخ چخبدی دستان اهرمندن

ای حرمله اورکلر درده دوشوبدی سندن

شرمنده اولدی سقا علقمده صود اَمندن

دوشدی یره وجودی سسلندی بی پرم من

گل داده ای امیریم فرزند حیدرم من

مولا گلوبدی باشین دیز اوستونه آلوبدی

قامت کمان اولوبدی حیران اودم قالوبدی

قولارینی ترابه گوردی عدو سالوبدی

اطرافیده او قوم دل کینه اَل چالوبدی

سسلندی ای وزیریم بو وضعه نیلرم من

دور بیر منی دانیشدور فرزند حیدرم من

باشدان آچوب عمامه سیلدی قانین گوزوندن

بلمم نجه خمیده اولدی ئوپوب یوزوندن

بیلدی توانی یوخدی سس ویرمگه سوزوندن

عرش اهلی باشه دوگدی دیجور گوندوزوندن

غمکش یازوم بو نظمی درباره نوکرم من

یعنی که من غلام فرزند حیدرم من

شاعر : غمکش

شجاعت و حماسه حضرت ابوالفضل العباس (علیه السلام)

شجاعت و حماسه حضرت ابوالفضل العباس (علیه السلام)

بو نجه عشقیدی عشّاقی گرفتار ایلیور

بو نجه عشقیدی شوره یری گلزار ایلیور

نخل عرفانی پر از شاخه و پر بار ایلیور

زشت رو برده لری چهره نمودار ایلیور

فی المثل قدرت خلقت دی یوخی وار ایلیور

بو نجه عشقیدی ائتمیش اوجا نام بشری

فوق ائدوب سلک ملک دنده مقام بشری

عشق اداره ایلیور آری نظام بشری

میندیروب قدرته نیروی قیام بشری

عشقیدور قدرت ایمانی سزوار ایلیور

جاودانه گل خوشرنگ بهار عشقیده وار

حسن عبدیّت و سیمای وقار عشقیده وار

گوهری ناب اولا یاخشی عیار عشقیده وار

قسم اولسون شرف عشقه نه وار عشقیده وار

عشق پیمانیدی پیمانه نی سرشار ایلیور

من دیَن عشق کی تعریفینه وار منده قصور

بهترین صحنه سی عاشور گونی ائتدی ظهور

سالاجاق طنطنه ایجادیده تا نفخۀ صور

مغز بیداره وئروب کرب و بلا صحبتی شور

بو حماسه بلی هرغافلی هشیار ایلیور

صبح صادق ده حسین پرتو نور ازلی

افق عشقیده زیبا یوزی خورشید جلی

خونی خون نبوی، اللری پیغمبر الی

امر ائدوب اکبره اعلان اذان ایله علی

صبح امّید ئوزین السّاعه پدیدار ایلیور

عاشق اعظم ائدوب عشقیله اقدام صَلواة

اقتدا ائتدی اونا صادق و صالح نفرات

فکر بیر قولیده بیر عشق بیر اندیشه ثبات

او جلال و جبروتی ده ملکلر هامی مات

تیپ ارباب صفا سجدۀ دادار ایلیور

صوت تکبیر اوجالور عرشه سوسوز لبلردن

قدسیان روحه گلور کلمۀ جان پروردن

بو ندای ملکوتی اوجالوب هر یردن

خلقته بسدی حسین مکتبی پیغمبردن

فخر بو طاعته پیغمبر مختار ایلیور

مشعر عشقیده ختم ائتدی نمازین شهدا

صدقیله محرم اولانلار ایلدی فکر مِنا

یار و انصارین حسین ابن علی قیلدی دعا

دئدی هامّوزدا سیزون من گورورم روح وفا

صورتوز سیرتوزون حُسنُنی اظهار ایلیور

ظاهراً عدهّ میزون گرچه چوخ آزدور عَدَدی

باطناً بسدی بیزه دولت عشقون مَدَدی

هر کس امضاء ائده بولمز بو خدائی سَنَدی

عشق توحیدیده وار رمز بقای اَبَدی

صود امر طفلیده سلطان جهاندار ایلیور

ای مجلّل کیشی لر کی دایانوبسوز بو سیاق

ورمیسوز خاطریمه همسروزی سیز سه طلاق

ساحت پاک خداده گوروم اولسون ئوزوز آق

اولاجاق سوز بو گئجه سفرۀ جاناندا قوناق

جدّیم احمد ده همان سفره ده افطار ایلیور

ما حصل اهل ولا فیض شهادت تاپدی

کهنه سرمستلر ئوز عشقینه قیمت تاپدی

تشنه لر اولدی فدا چشمۀ وحدت تاپدی

چوخی گمنامیدی بیر لحظه ده شهرت تاپدی

آری خوش لحظه یولی سالکه هموار ایلیور

خیمه لر بوشدی فقط عترت اطهار قالور

نه مهاجردن اثر واردی نه انصار قالور

نه علی اکبر و نه قاسم دلدار قالور

بیر حسین بیر صود امر بیرده علمدار قالور

اودا اذن آلماقا سلطانیدن اصرار ایلیور

یاپشوب دامن مولای وفاداریندن

ایله بیل حاجی دوتوب کعبه نین استاریندن

شبنم خجلت آخور لالۀ رخساریندن

یوسف حیرتده قالوب گرمیِ بازاریندن

هاردا یوسف بو قدر رونق بازار ایلیور

سیّدی وئر منه رخصت ایله مشمول کرم

مدرک عشقیمی قیل لطفیله توشیح و رقم

سینه می تنگه سالوبدور بیلوسن غصّه و غم

طاقتیم یوخدی سوسوزدان مَلَشه اهل حرم

الطش صوتی آقا روحیمه آزار ایلیور

باغلیوبسان نیه شهباز کیمی شهپریمی

گوهریم نابیدی قوی راضی ائدوم مشتریمی

داریخور قلبیم عباده گورورم اکبریمی

منده آزاده ام آزاد ایله سن اللریمی

گور نجه جنگیده اعجاز بو قولّار ایلیور

جنبشه گلدی بو سوزدن او کرم دریاسی

شاه دین رزمه مُخیّر ایلدی عبّاسی

امر پروازی آلوب قاف شرف عنقاسی

شاد و بشّاش اولوب مرتضوی سیماسی

گئدور عبّاس، حسد گنبد دّوار ایلیور

احسن احسن دیوری روح الامین همّتتینه

قدسیان عالم معنا دیل آچوب مدحتینه

شهدای اُحُدون روحی گلوب خدمتینه

باخور حسرتله حسین قارداشینون قامتینه

ساچلاری الده دعا خورداجا قیزلار ایلیور

تلّیدن اندی عقابی پر آچوب مثل عقاب

حکم تمکین وئروب توسنه ناگه او جناب

مسلک ابلیس سیاهه یتیشوب تیز شهاب

موسی تک سامُری سیرت قوشونا قیلدی خطاب

بی بصیرت سُپهه پند اولوالابصار ایلیور

ای سپاه اموی حیله مراموزدی سیزون

ننگ تاریخ بشر ننگ قیاموزدی سیزون

ظاهرا کلمۀ حق تکیه کلاموزدی سیزون

دینوز اولسا شه لب تشنه اماموزدی سیزون

ئوز امامینده مگر دینی اولان خوار ایلیور؟

دولدورورب قلبوزی عشق زر وسیم عشق جهان

مرغ زیبا پر حُرّیت اوخا اولدی نشان

قورخودوبدور سیزی عفریت محیط خفقان

قابل نفرت و لعنت دی یزید نادان

نه حکومت دی سیزه مردک میخوار ایلیور

عار اولا اون ایکی مین نامه یازان ملّتوزه

عار اولا عاطفوزه نیّتوزه غیرتوزه

لطمه وردوز ئوزوز ئوز ارزش و حیثیّتوزه

نه سبب اولدی قیتدوز گنه وحشیّتوزه

روبرو اولماقا انسان سیزیلن عار ایلیور

هانسی مسلکده سوئی تشنیه ایلوبله حرام؟

سارالوب ختم نبی گلشنی ای قوم ظلام

یوخدی سو شدّت گرماده یانور اهل خیام

نه کیچیک لرده رمق وار نه بیوک لرده دوام

سعدون اوغلی نیه آل اللهه اجبار ایلیور

گلمیشم نهری آلام سو آپارام تشنه لره

اعتنا ایلمرم یوز بئله سایسیز نفره

چکسه شمشیرینی هر کیم الین آتسا سپره

روبرو اولسا منه جنگیده سالّام خطره

نجه که کاهی فنا برق شرر بار ایلیور

انتخاب ایله دی هرکیم جدل تن به تنی

ساغر مرگی ایچوب توپراقا دوشدی بدنی

گورمیوب دیدۀ دنیا بئله شمشیر زنی

فِی المَثَل طَیراً اَبابیل پر آچموش عَلَنی

اَبرهه قومینی سجّیله گرفتار ایلیور

گوردولر جنگیده ماهردی او عالی هدفی

اختیار ایلدی ابطال عرب پشت صفی

بیلدی عبّاس علی تک باشا یوخدور طرفی

خیمیه باخدی صورا سسلدی شاه نجفی

کارزار اهلینی اوغلون نجه گور زار ایلیور

هر نه عّباسی ده واردور باباجان سَندَندور

منده که صدق و صفا نام و نشان سَندَندور

بو قوی پنجه بو بازوی توان سَندَندور

رگ قلبیمده عروقیمده کی قان سَندَندور

سن اؤپن قولدی بو گون صفلری طومار ایلیور

بیر نبرد ایلدی میدانیده اول یکّه سوار

قلب لشگرده یول آچدی قوشونا وئردی فشار

سوروشوب مارد بد خو نه قیامتدی نه وار

بیخبرسن دیدیلر جنگیدن ای فتنه شعار

مرتضانون اوجا بوی اوغلیدی پیکار ایلیور

خیمه سین ترک ایلدی فوری او غولِ اُموی

گوردی میداندا علمدار سپاه عَلوی

قول اوزون، پرچم اوجا، قامت اوجا، پنجه قوی

ماردون خیمه سینه فوری ائدور پیشروی

برق شمشیری شاخور مارده اخطار ایلیور

عصبی ائتدی صدیف اوغلونی کابوس اجل

مرکبه وئردی جلو اولدی مهیّای جدل

فنّ رزمیله آتوب نیزه سین عبّاس اَوَل

اوجالاندی او اوجا نیزه نی دوتدی اوجا اَل

بو نمایش دئدی مارد سنی بیدار ایلیور

منیم استاد نبردیم اسدالله علی

ایلیوبدور منه تعلیم رموز جدلی

ناقصون چوخدی سنون رشتۀ دعواده ولی

مردسن نیزه وی آل سن، دالی قیتر بو الی

اشقیا قدرت سرپنجه وی معیار ایلیور

نیزه سین آلماقا مارد چالشوب قدرتیله

زور بازوسی نی ویردی عصبانیّتیله

اولدی ناکام سنانه یاپشوب خفّتیله

نیزه سین آلدی علی اوغلی اونون همّتیله

منتطر دی هامی گورسونله نه رفتار ایلیور

ماردون مرکبینی پیله دی عبّاس شریف

عرصۀ رزمی ده سر در گُم اولوب کهنه حریف

پنجۀ شیرده روبه تک ئوزین گوردی ضعیف

دیل آچوب عجزه ابوالفضلی ائدوبدور تعریف

منی عفو ایله، بیوک عفو خطاکار ایلیور

ایسته دی مارده مرکب گتوره قوم ضلال

اسدالله بالاسی وئرمدی بو امره مجال

اونون ئوز نیزه سین عباس برازنده خصال

بوغازیندان ائله ووردی کسیلوب راه مقال

گوردیلر ترک نفس لاشۀ مردار ایلیور

جان وئرور مارد نامرد قشون وحشت ائدور

تلّون اوستونده حسین زینبیله صحبت ائدور

باجی قارداش او گوزل قارداشینا دقت ائدور

ارزش جنگینی زهراده گلوب قیمت ائدور

غبطه بو منظریه جعفر طیّار ایلیور

زینیدن اَندی او پروردۀ سلطان نجف

ماردون کسدی باشین قهریله اول کان شرف

بیلدی زینب سوؤونور آتدی اونی تلّه طرف

نیزه نی چالدی قوی پیکرینی قیلدی هدف

دئدیلر ایندی نه دور فکری نه پندارایلیور

گوردولر قوش کیمی قالخیزدی نگونسار تنی

آتدی سعد اوغلونا ساری او کثافت بدنی

خوار ائدوبدور اونی بو جنگی نمایش عَلَنی

علی اوغلی دئدی تپراقه سالور هر گئدَنی

صحنۀ عرصۀ بدری بیزه تکرار ایلیور

بی توقّف چاپاراق وئردی جلو مرکبینه

سعی ائدوب راه صفاده یتیشه مطلبینه

آلدی دریانی سودان وورمادی امّا لبینه

قویدی قیمت ئوزی ئوز عشقینه ئوز منصبینه

عشقه باخ ایچمگه سو ناز او سردار ایلیور

نهریدن چخدی اورکده غمی یوخ مشگی دولی

علمی الده قلج الده سلامتدی قولی

باخدی اطرافه ورانداز ایلدی صاق و صولی

انتخاب ایلدی مقصودینه نزدیک یولی

دل تمنّای حرم خانۀ دلدار ایلیور

قویسا اهریمن اگر درک سلیمان ائدرم

سو آغیر قیمت اولوب قیمتین ارزان ائدرم

غشّ ائدن قیزلارا مشگون سویون احسان ائدرم

صود امر اصغریمون دردرینه درمان ائدرم

تشنه لر غصّه سینی تشنه علمدار ایلیور

حمله ور اولدی او سایسیز نفره فرد رشید

دفتر رزم و شهامتده آچوب فصل جدید

ما و من اهلینی شمشیر ائدوبدور تهدید

کوفیه ساری فرار ایلدی افراد پلید

الحذر الحذر اُول فرقۀ کفّار ایلیور

تیز حملیدی ئوزی مرکب رهواری بُرو

گه ویروبدور آتا مهمیز گهی ویردی جلو

ایلدیریم تک قُشونون خَرمنینه توکدی اَلو

باشلاری داس اَجَل تک قلجی ائتدی درو

روبرو هر کیم اولور فوری نگونسار ایلیور

الحق الحق نه گوزل خدمت ائدوب قارداشینا

فرصت جنگی فلک حیف اولا وئردی قوشینا

آغلا آغلا آناسی مشتری دور گوزیاشنا

یازمازیدوم نه بلا گلدی او السیز باشینا

حضرت صادقون امری منی ناچار ایلیور

بشرون الدی خطر وقتی نگهبان گوزونه

الّلری اولسا مواظب اولار انسان گوزونه

السیزه چاره نه دور اوخ کچه پرّان گوزونه

یاریلا باش یاراسیندان توکوله قان گوزونه

سیلمه سه گوزلرینی باخماقی دشوار ایلیور

لخته قانیله دولان گوز گورر آیا هارانی

گوز دوتولموشدی قبول ایلدی هر بیر یارانی

نه گلن نیزه اوخی گوردی نه یاره ویرانی

نه یانیندان گئچنی گوردی نه یولدا دورانی

دونور هر سمته هدف سینه سین اوخلار ایلیور

باغلیوب امّ بنینون یرینه قان گوزونی

ایتیروبدور یولی میداندا ایتیرمور ئوزونی

گلدی بیر ظالم اونون تار ایلدی گوندوزونی

دئمرم آهن عمودیله آچیق باش سوزونی

صبر و طاقت او غمه هانسی عزادار ایلیور

بیلمورم اولدی نه رفتار او قوی پیکریله

اوجا قامت اوجا یردن یخیلوب لنگریله

باشینون اوسته گلوبدور آناسی حیدریله

فاطمه سیلدی گهی گوزلرینی معجریله

گه سو تکلیفی اونا حیدر کرّار ایلیور

سسلنوب معرکه دن گل منی درک ائت شاهیم

شاهسن سن منه شاهد بیر اولان الّلهیم

قورتاروب الده کی سرمایَم اوجالمش آهیم

سر خونین تن خونین دی قالان تنخواهیم

اونودا مقدمووه نوکرون ایثار ایلیور

گرد راه قدمون فخریدی ایجاد ائوینه

شاه عادل سن آقا عدل ائوینه داد ائوینه

آغلاما لطف ائله گل قارداشوون شاد ائوینه

سنی دعوت ائدورم عشقیمون آباد ائوینه

ائوی آباد اولا عشقون یوخ ائوی وار ایلیور

((انورم)) نوحه ده صرف ایلمیشم همّتیمی

آرتیروبدور آقامون لطفی منیم شهرتیمی

نیّتیم قلبیده خدمتدی بیلور نیّتیمی

وار امیدیم وئره موعود جزا خلعتیمی

موری تشویق سلیمانِ کَرَم دار ایلیور

شاعر : مرحوم انور اردبیلی

!!! لطفا با نام کانال مدح و مرثیه کپی کنید !!!

شجاعت حضرت ابوالفضل (علیه السلام)

شجاعت حضرت ابوالفضل (علیه السلام)

منم عباس نام آور، که مندن کفر لرزاندور

هراسیمدن یلان پردل عالم، هراساندور

نهنگ بحر قهر حضرت یکتای قهارم

فروغ مطلع باقی وجه اللهه انوارم

محل و مظهر تقدیر و صنع حی دادارم

منیم بو حول قوم، هر چه اولسا، صنع رحماندور

شعاع نور پیغمبر، منم ماه بنی هاشم

بو معراجیمدی، میدان بلایه اولموشام عازم

او سردارم که هیجاده منه لشگر دگل لازم

که هر مهلک معارکده منه عون الله، اعواندور

منم فرزند دلبند علی بن ابیطالب

نهنگ قلزم سطوت، هژبرالسالب غالب

شجاعتده بو گون شیر خداونده منم نائب

منه دعوا علومینده معلم، شاه مرداندور

منم ضرغام بن ضرغام، شیر کردگار اوغلی

منم صمصام بن صمصام، صاحب ذوالفقار اوغلی

منم کل معارکده علینون شهسوار اوغلی

شعاع شهرت تیغیم، بو شمس آسا نمایاندور

بو های و هوی لشگردن من ایتمم باک و اندیشه

که یکسر ریشه بیخ و بن کفره منم تیشه

هراسیمدن دوشر هیجا گونی، بهرام، تشویشه

منیم قهر و مهابت سطوتیمدن لرزه کیواندور

منیم یوخ واهمم، بو صوت طبل و ناله نی دن

نه باکیم وار بو گیر و دار و های و هوی و هی هی دن

گرک محروم ایدم سعداوغلونی، سلطانی ری دن

که الآن امر و نهییم، ناهی احکام فرماندور

نه بیله چوخ چالورسوز طبل جنگ و نای رزمانه

مگر عباس ئولوبدور؟ سسلنور دشمن دلیرانه

حریفیم کیمدور؟ اقدام ایلسون مردانه میدانه

بو عباس علی، بو تیغ، بو پهنای میداندور

اولیدی حکم اگر درگاه شاهنشاه والادن

یر اوزره زنده قویمازدیم قالا بیر نفس اعدادن

گچوردوردوم ته تحت الثرای ملکین، ثریادن

جهانی برهم ایتمک، دست تقدیریمده آساندور

اگر قهریله روز جنگ ورسام چنگ شمشیره

گروه شامیانه شام تک عالم اولور تیره

گتورمز روبهان کوفه طاقت، حمله شیره

که من شیر غرانم، آتام هم شیر غراندور

او دریایم که ذخارم، ولی بیتاب و صبرم من

او ضرغامم که غرانم، دم هیجاده ببرم من

او عباسم که ببر اسمم، پلنگ افکن، هژبرم من

منیم رزمیمده شیر و دیو و جن و انس، یکساندور

او شیرم من که شیر و ببر اولور هیجاده نخجیریم

احاطه ایلیوب آفاقی سهم برق شمشیریم

سیزی ئولورمگه یکسر واریمدور حول تقدیریم

و لیکن مانعیم فرمایش شاه شهیداندور

اگر چه سروران دهره، میر تاجدارم من

و لیکن بو حسینه چاکر و خدمتگزارم من

حضور باهرالنورینده عبد جان نثارم من

حیات جاودانیمدور، بو ئولمک راحت جاندور

بو نه بیداددور ای لشگر بی رحم و کین تواءم؟

سیزون بی حد ظلموزدن دونوبدور ساحت عالم

بو گون شهزاده قاسم وضع عیشین ایلدوز برهم

کف کف الخضیب آسا، کف داماد الواندور

نهال اکبر شهزاده نی یخدوز صنوبر تک

بدن صدپاره، تارک شق القمر زخم فرق حیدر تک

احد دعواسیدور، شبه نبی ده خود پیمبر تک

سالوبسوز عرش زین اوستن، بدن خاکیله یکساندور

دگل آیا حسین سبط رسول ختم پیغمبر؟

مگر بو شه دگل فرزند پاک حیدر صفدر

دگل یوخسا بو زیب دوش زهرا، زهره ازهر؟

بو آخر حجه الله دور، امام الانس و الجاندور

بو گون سوز عطشدن کودکان آل پیغمبر

بنات النعش تک جمع اولدولار اطرافیمه یکسر

جمیعاً العطش گویان که یابن الساقی کوثر

بیزه بیر جرعه سو بذل ائت، که سو من باب احساندور

جماعت دوریدور بو ظلم، انصاف و مروتدن

گچوبدور تشنگی کودکان حد و نهایتدن

گلون رحمه منی ایلون رها قید خجالتدن

اگر بیر مشگ سو ویرسوز منه چوخ منت جاندور

حسین قتلیندن اوتری دوشمیون ای قوم وسواسه

گمانوز گلسه هر تیر و سنان نوک الماسه

ورون بو گوزلریمدن جمله نوش جاندور عباسه

و لیکن سو ویرون، آل علی مجموع عطشاندور

بو جانی ایتمشم دائم نشان طعنه اعدا

که تا جسم حسینه یتمسون آسیب و غم اصلا

ورون هر حربیه گلسه گمانوز، ایتمیون پروا

بو قول بو باش بو جسم و جان، حسین راهینده قرباندور

بو گون ئولماخ منه کونینیده شان و جلالتدور

آدیم محسوب انصار بن ختم رسالتدور

حسینین مقدمینده آخسا قانیم چوخ سعاتدور

ازل گوندن بو نقد جان، نثار راه جاناندور

دئدی سعد اوغلی کی سقای اهل سید والا

حسینه یوخدی سو، گر سوئیله مملو اولا دنیا

مگر بیعت، و الا جز شهادت چاره یوخ اصلا

بو عالی حکم یا عباس، حکم پور سفیاندور

چو عباس علی اولدی کلام دشمنه سامع

سکوت ایتموب غلاف صبرده سیف الله قاطع

چهار آئینه سیندن ظاهر اولدی صاعق لامع

که بعد از برق شیر حق، رعد آسا خروشاندور

یتشدی تند باد طعنه نار آه خاموشه

شراریندن اولوب افسرده دل، پروین و هم خوشه

مگر طمطامدن ایلوب تلاطم، یم گلوب جوشه

بیریندن چرخ سوزاندور، بیری بنیاد طوفاندور

حصار صبرینی ایتدی مسخر طعنه دشمن

قیزاردی گوزلری مانند چشم ضیغم ذوالمن

سر هر موینه سوفار اولوب بیر حلقه جوشن

که زوبین حمیت نافذ خفتان مرداندور

چکوب بیر نعره غیظیله بسان رعد آذاری

محیط اولدی عدویه صوت قهر و سهم قهاری

ظهوره گلدی چین جبهه سیندن غیظ آثاری

جهان سیماب تک، دشمن چو برگ بید لرزاندور

عقابه اولدی تند و تیز و قهر آمیز و خصمانه

چکوب مهمیز آتش ریز، برق انگیز یکرانه

وروب ال قبضه صمصام خون آشام برانه

نهنگ آسا خیال ایتموب که لشگر بحر عماندور

جلوریز اولدی قلب لشگره تا حیدر ثانی

مثال برق خاطف، پنجه سینده تیغ عریانی

ایدوب چوخ کشته دن پشته، دوتوب قان سیل میدانی

او سیلابین حبابی اسپر و خاشاکی پیکاندور

جناح و میمن و میسر اولوب یکسر پراکنده

توکولدی بیر بیر اوسته زخمدار و کشته و زنده

سپه چون گله روباه، او شه بیر شیر درنده

هراس صولتیندن فوج فوج اعدا گریزاندور

دم تیغ شررباری عجب مرگ آفرین اولدی

توکردی مردی مرکبدن، یسار و یا یمین اولدی

او صحرا ایچره پشته کشته های مشرکین اولدی

او تحت پشته لرده جوی تک جاری اولان قاندور

او گون کروبیان قدس، طاق عرش اعلاده

ایدوبلر عزم نظاره، نه وار آیا بو صحراده

بیری مجمر ایدوب برپا، بیری چون شات آماده

فلک ایثار ایدر انجم، ملک بو شسته حیراندور

بیزه کرب و بلانی قسمت ائت، ای خالق ذوالمن

گوگل تا نور من زارالحسینیلن اولا روشن

اولا محسوب بلکه زمره جاروب کشلردن

او درگاهون سوئی گوز یاشیدور، جاروبی مژگاندور

زهی فخریه عالی که عباسه غلامم من

جسور نظم و مادح شیرین کلامم من

ولی اوز خواجمه همنام، گوینده بنامم من

او درگاهون (ترابی) بوسه گاه میر و سلطاندور

شاعر : ترابی

!!! لطفا با نام کانال مدح و مرثیه کپی کنید !!!

شجاعت حضرت ابوالفضل (علیه السلام)

شجاعت حضرت ابوالفضل (علیه السلام)

سس دوشدی میدانه شیر دلاور گلور

صفلری سیندیرماقا حیدر دیگر گلور

قاش گوزونون صیدینه یوسف مصری اسیر

باخ اوزون اللرده بیر قرمییزی پرچم اسیر

امر امامینده بو تابع فرمان اولوب

علقمه قصدینده تک راهی میدان اولوب

سس دوشدی میدانه شیر دلاور گلور

صفلری سیندیرماقا حیدر دیگر گلور

اولدی مقابل دیدی عاشق آزادی ام

مین بیله لشگر گله جان بکف آماده ام

ذلته باش اگمرم آند اولا عشق آدینه

نوکری ام من ئوزوم فاطمه اولادینه

سس دوشدی میدانه شیر دلاور گلور

صفلری سیندیرماقا حیدر دیگر گلور

هاردادی فرماندهوز آلماقا جان گلمیشم

مکتب حیدرده من درسیمی ئدورگن میشم

مرکب غیرت مینیب مشک و علم دوتموشام

سوز دیمیشم رهبره بال علم آچمیشام

سس دوشدی میدانه شیر دلاور گلور

صفلری سیندیرماقا حیدر دیگر گلور

جان ویررم یاحسین میل وصال ایتمیشم

دینه گوره باش اوجا بذل امام ایتمیشم

رهبره تقدیم ایدم باشیمی زیبنده دی

سسلنرم تا ابد عشق حسین زنده دی

سس دوشدی میدانه شیر دلاور گلور

صفلری سیندیرماقا حیدر دیگر گلور

هر نه امان یولاساز جیررام امان نامه نی

اذن اولا خوار ایلرم حاکم خود کامه نی

تک تکوزه روز و شب خوابی حرام ایلرم

دایره عالمی سیزلره دام ایلرم

زبانحال در ورود به کربلا

زبانحال در ورود به کربلا

بو یرین اسمی باجی لفظ بلا معناسیدور

جلوه گاه عشق جانان کربلا صحراسیدور

کربلا یعنی حقیقی کعبه اهل ولا

کربلا یعنی منای واقعی رشگ منا

کببلا یعنی بهشتین زینتی بزم وفا

کربلا عرش خدانین آیت عظماسیدور

مایل اولسا زینته جنتده حورالر اگر

تربتیندن بو یرین بیرذره رخساره چکر

گونکیمی صورتلرین بو تربت ایلر جلوه گر

بوگوزل تربت بهشتیلرجمال آراسیدور

عالم قالو بلاده شرح اولوندی هربلا

انبیا حیران باخوردی من دیدیم یالقوزبلا

اولدی اثبات بلا میعادی دشت کربلا

بو سولان صورت همان لفظ بلا معناسیدور

بو یرین خلق ایتمیوب مثلین گوی آلتندا الاه

قابلیت واربو یرده عرشه اولسون قبله گاه

بو یرین تپراقینه باش قویماسا هر هانسی شاه

ذلت دنیا اونون سرمایه عقباسیدور

بیر جوان ویرم بو چولده حق یولوندا من فدا

تا جهان وار افتخار ایلر اونیله برملا

من خلیله هاجره لیلا منایه کربلا

شرح ایدن ذبح عظیمی اکبرین اعضاسیدور

چوخ علمدارین سالوبلار قولارین قوم عناد

اولمیوب اولماز ابوالفضلیم کیمی باب مراد

سینه سی صفحه-خدنگ و نیزه خامه قان مداد

پیکری باشدان باشا مهرو وفا انشاسیدور

اللریندن ال گوتورسون سوزویروب روزالست

باشینین جامین عمود آهنین ایتسون شکست

باده عشقیله بسکه مست دور اول شیرمست

زخم پیکان ساغرسرشاری قان صهباسیدور

پرچم دینی یاتوردار لشکردنیا پرست

سو یانیندا تشنه ساقینین اولارجامی شکست

دیننه قربان ویرر بیر طاق سر بیرجفت دست

مفتی عشقین بلی بو مطلب اوز فتواسیدور

عشق قربانگاهیدور بو سرزمین پرخطر

قوش قوزی قربانی ویرم بوردا یتمش بیر نفر

اوخلاناراصغر-آناسی آغلار آهو تک ملر

قانلی قونداقی منای عشق زیب افزاسیدور

شاهد غیبی آتار بوردا جمالیندن نقاب

جان ویروب عاشقلره ایلرتجلی بی حجاب

باشینه تپراق سپربوردا آتامیز بوتراب

خرمن افلاکه آتش آه برق آساسیدور

بوردا قان دریاسی موج ایلر داشاربحرقتال

قانلی دریایه دونربو وادی دشت جدال

غرق اولار گرداب خونین ایچره کشتی جلال

امن ساحل ناخدای دینه قان دریاسیدور

بو یرین تپراقینه بیر قان قاتار آت دیرناقی

چشم حورایه اولارسرمه بو دشتین تپراقی

هرگلستاندا سرالسا سولسا هر گل یپراقی

سوگلی نازلی رقیم رنگینین ایماسیدور

بوردا بیر بیع و شرا بازاری وار باجی منه

قیمت اولماز عالم امکان ثمن یا مثمنه

هرایکی دنیانی آلام کهنه بیر پیراهنه

علت حیرت بو سوقین پربها کالاسیدور

عشقیمی ویرم نشان اولام فنا فی الله حق

سرعشقه ایلرم عاشقلری آگاه من

باش بدن ال ویرماقیمدان ایتمرم اکراه من

سلم محض اولماق عبودیتده رب ارضاسیدور

ملک تسلیم و رضاده اولماسام عالمده شاه

آستانیم اولماز اسلام عالمینده قبله گاه

خلد اعلایه آچارقانیم بو چولده شاهراه

نوکریم دنیا و عقبا اهلینین مولاسیدور

گرچه (سعدی زمان) چوخ ایلیوب جرم و خطا

باب رحمتدن و لیکن ایتمیب قطع رجا

عالم محشرده مولاسیندن امید عطا

آغلیان بیرگوزموثرسوزبو غم طغراسیدور

شاعر : مرحوم حسینی سعدی زمان

!!! لطفا با نام کانال گنجینه گذشتگان کپی کنید !!!

احوالات ورود به کربلا

احوالات ورود به کربلا

کربلا گوزلرین آیدین ساربان یولدان یتیشدی

پیشوازه چیخ سنی چون غصه لی مهمان یتیشدی

عونیله فضلیله جعفر ام کلثومیله لیلا

اوچ یاشنیدا بیر قیزیلان سود امر جانان یتیشدی

کربلا مهمانووه باخ گور نه جاهیلن گلوبدی

پوزماقا اجلالین اما کوفه دن عدوان یتیشدی

کوفه آهنگر لرینون کسبینه رونق  وریلدی

چون آچان اوخدان قیلجدان نیزدن دکان یتیشدی

سعی اله مهمان نواز اول نحرووه سقا الینده

مشکی ایستور سو آپارسن خیمیه عطشان یتیشدی

تپراقیندا بوترابین اوغلی قوردی خیمه گاهین

تپراقی مقتلده قانی ایلین الوان یتیشدی

تپراقن آلدی قوجاقه عرشه سلطانون ایاقین

تپرا قیندان  عرش اعلایه  سپن آلقان یتیشدی

قتله گاهیندن قوپوبدی گور نه واویلا نواسی

سانکی زهرانون حسین وای ناله سی اوردان یتیشدی

مقتلینده حاجریلن قوی خلیل الله دایانسین

بیر باجی قارداش مناده ویرمگه قربان یتیشدی

لیلینی مجنونی حاضر ایله عشقین مکتبینده

یازماقا قاندان فراز عشقه بیر دیوان یتیشدی

یوسف کنعانی سسله یوسف لیلایه باخسین

مقدمیندن اوپمگی چون حوریله قلمان یتیشدی

غملی بیر طوی وار قا باغدا ایله سون الله مبارک

قان حناسیلن عروسین حجله سی تالان یتیشدی

قوی ملکلر سسله سینلر تلیدن امن یجیبی

باخماقا میدانی اوردان زینب  نالان یتیشدی

خیبره فاتح علینین ذوالفقاره وارث اوغلی

فوج اعدانین  ایچینده ویرمگه جولان یتیشدی

خندقین جنگینده یخدی کفری تپراقه آتاسی

ایندیده ایماندی سسلور کفریله قان قان یتیشدی

ویرمگه غم امتحانی چکمگه قال و بلانی

ذوالجلالیلن ازلدن باغلیان پیمان یتیشدی

اوچ پر اوخلان التی آیلق اصغره لای لای چال ایندی

قمچیدن زین العبادین دردینه درمان یتیشدی

دوزدی قران ختم مرسل احمده نازیلدی اما

نیزه نین باشینده باشی باشلیان قرآن یتیشدی

نیزه باشینده تلاوت ایلین قرآنی گورجک

عشقه فتوی ورمگه باش محمیله چرپان یتیشدی

نیزه نین باشینده باشلار ناقه اوستونده اوشاقلار

گزمگه صحرانی یورقون جانیله جانان یتیشدی

کربلا سنده نه اولسا نشر ایدن زینبدی زینب

ایلین  نطقی یزیدین قصرینی ویران یتیشدی

شاعر : حسنعلی بالایی

منبع : کانال اشعار حسنعلی بالایی

زبانحال حضرت امام حسین (علیه السلام) در ورود به کربلا

زبانحال حضرت امام حسین (علیه السلام)

در ورود به کربلا

کــربلا دور وعــده گاه حضرت سبحان باجی

بورداانصاریم اولاردینه سوسوز قربان باجی

بو دیـــارین واردی غوغــــاسی بنــات حیدره

اود ویـــرالار کــــوفیـــان بـــوردا دل پبغمبره

گـــردش دنیا ویرر فــرصت بوچولده کافره

قــاره پوش ایلـر سنی اشرار بی ایمان باجی

عهــــد و پیمـــــان ایتمیــشم روز ازل دلداریله

ترک جان و سر ایدم جــاندان گیچــن انصاریله

شیـــرخـواره نوجــــوان یاکه قـــوجا سرداریله

قـویمیام یتسون پیمبر دینینه نقصان باجی

بوبیـــاباندا قـالار لب تشنه قارداشون وحید

باوفـــا انصاریمی ایلــــرعدو بیـر بیـر شهید

قول قولاباغلار گل اوزلی قیزلاری قوم عنید

شـــدت آلامیـــدن افغــان ایدر طفـلان باجی

اوج ایــدرمعنـــاده عرشه بوردان آهیله نوا

دوغـــرانار بو یــرده شبه ختم مرســل زینبا

سینم اوسته اوخــلانارشش ماه اصغر برملا

دولــدورار دشت بلانـی ظلم الیــله قان باجی

کـــوفیـــان بــوردا سالار بیحد بـلایه باشیمی

دونــدرلــــر قــانــه محنـــتدن آخــان گوزیاشیمی

الــدورللـــر سوکنـــارینـــده سـوسـوز قارداشیمی

ناامیــد ایلــر امیـدندن اونی عـــدوان باجی

قطعه قطعه دوغراناجسمیم بوچولده یوخ سوزوم

غـرق اولا قــانه سراسر یار و انصاریم اوزوم

دینه خاطرهـــر بلا گلـــسه گرک زینب دوزوم

حفظ اولا بلکه جهـاندا دینــیله قــرآن باجی

کینه سین ایلـــر علن بوچـولده قوم بد سیــَـر

ظلــــم الیلـــه اهـــل بیتیم جامه ماتم کیئیر

آغلیوب اصغر آناسی اوغــلونا لایـلای دیــــَــر

اوچ پــــرقلب ربـابی ایلیر شـان شـان باجی

باشه وئرم عهدیمی بوچولده یوخدور مسئله

یارلــــی جسمیله زین اوسـتن یخـلام مقتله

وارگمانیـــم دیدیمه قدی کمان زهــرا گله

باش آچاجیسمیم کنارینده ایده افغان باجی

واردی دیلــده بیــرسوزوم ای نــائب خیرالنسا

مرکب اوستن تپراقا یخسا منی قوم دغا

خنجرالده باشیم اوسته گلسه شمربی حیا

ممکن اولسا گلمه گـوداله طرف نالان  باجی

آگهــم بوسرزمیـــــنون غصه لــــــی سوداسینه

چوخ مصیبت یوز ویــرر محنتلـــی آل یاسینه

جـــانیمی ویـــرم باجی کــرب و بلا ابقاسینه

قویمارپاینده اولسون ظلمیله دونان باجی

باشلانــوب ایـام ماتم عــالم اولـــدی غمسرا

ایلیـــوب عاشقلــریم هریـرده اعـلان عزا

باغلـیاربــاشه(جوانـــــی)بومصیبتده قرا

یالوارورقبرون گوره ایله ئوزون احسان باجی

شاعر : کربلایی موسی جوانی تبریزی

منبع : کانال اشعار موسی جوانی تبریزی (ترنم عاشورا)

شجاعت حضرت علی اکبر (علیه السلام)

شجاعت حضرت علی اکبر (علیه السلام)

چون شیر خشمگین او جوانمرد نامدار

بحر بلایه غوطه ور اولدی نهنگ وار

اندیردی بیر عمامه نی ابرولر اوستونه

فرق سرینده مغفرینی ائتدی استوار

دریای قهری جوشه گلوب پور لافتا

قیلدی خروش ایلدی آهنگ کارزار

ووردی اؤزین چو شیر ژیان قلب لشکره

حیدر کیمی الینده درخشنده ذوالفقار

اوّل صفی داغیتدی ایکیمجین اوچومجیه

ملحق ائدوب نظام لری قیلدی تار مار

سیندیردی قلب میمنه نی تا صباحدن

کچدی صولا داغیلدی نظام صف یسار

تشویش اضطرابیدن اعدا ائدوب گمان

تیغ دوسر الینده علی اولدی آشکار

باشلار بدندن آیری بدن باشدان آیریلوب

باش بیر طرفده دوشدی بدن بیر طرفده خوار

ال باش توکولدی او صحراده بی حساب

مغفر سپر کمان داغیلوب بی حد و شمار

صفلر پوزولدی دسته داغیلدی سینوب سپاه

برهم اولوب نظام قوشون ایلدی فرار

خالی اولوب چو عرصه گه رزم کوفیان

دلخسته پر شکسته و مجروح و زخمدار

قومی احاطه ایلدی وحشت دوتوب هراس

قاچدی قاچان ئولن ئولوب اول معدن وقار

چکدی عنان توسنی نوک سنانینی

محکم دل ترابیده نصب ائتدی استوار

تکیه ائدوب جدایه زمانی سکوتیده

آچدی دوباره لعل گهربار و دُر نثار

کای قوم بی حمیّت و بی شرم و بی حیا

یوخ سیزده بیر نشانه ی ناموس و ننگ و عار

گوردوز منیم شجاعتیمی ضرب شستیمی

بو ال بو ذوالفقار علیدندی یادگار

مرد نبردسیز بو فرار ایلماق ندور

من بیر نفر ولیک سیز ای قوم صد هزار

فرزند حیدرم خلف شیر ذوالجلال

دعوا گونینده شیر اولور پنجمه شکار

انصاف ائدون مروّت ائدون یول وئرون گئدوم

نهر فراته یانمیشام ای قوم نابکار

دیّار قویمارام یر اوزون دوتسا گر سپاه

اذن قتال بنده یه گر وئرسه شهریار

قوّتده مین بو قدر وار آرتوق شجاعتیم

نیلوم که قویمیوبدی عطش منده اختیار

بیر جرعه سو بهاسی اگر نقد جان اولا

وئرم قالوب سکینه گوزی یولدا انتظار

یتمز((حقیر)) قصّه ی اکبر نهایته

صبح و مسا قلم ووراسان تا دم شمار

شاعر : حقیر خویی

!!! لطفا با نام کانال مدح و مرثیه کپی کنید !!!

بهاریه گریز به روضۀ حضرت علی اکبر (علیه السلام)

بهاریه گریز به روضۀ حضرت علی اکبر (علیه السلام)

بهار اولدی گوروندی آیت توحید دنیاده

سالندی گلستانه بر زمرّد رنگ سجّاده

اولان سرگرم وحدت معتکف کاشانۀ غمده

دولانسون گلشنی باخسون قد دلجوی شمشاده

تفکّر ایلسون تغییر فصل و وضع گلزاری

ندور علّت گیدور آز وقتده وضع چمن باده

ایدوب گلده عجب اظهار قدرت خالق یکتا

هویدا ذات مکنونی ایدوب هر چشم بیناده

نه یالقوز گل نه تک سنبل نباتات چمن یکسر

باخاندا وَحدَهُ وَحدَه دیر ظاهرده معناده

گل سرخ اوسته نقّاش حقیقی گوستروب قدرت

آچوبدور باب توحیده اونون هر برگی مینجاده

ویروب صبّاغ حکمت هر گله بیر نقش رنگارنگ

طبیعی آنلاسون وار مقتدر خالق بو دنیاده

شقایق اشرفی رعنا حنائی یاسمن صد برگ

دِیَر اوز رنگ بوینده نه قدرت واردی یکتاده

گل بید و بنفشه نرگس و اژدر دهن سوسن

ایدر اثبات توحیدی سمن تک لفظ و معناده

مرتّب بر بساط جشن گلشنده اولوب برپا

مُبرهن گورسنور بر موجدقادر وار اخفاده

وجوده موجده هر شیئی بر برهان انّی دور

هواده طیر و وحشی چولده ماهی قعر دریاده

نسیم صبح اولوب ساقی پیاله لاله می شبنم

او بزم عیشده شوریده بلبل نوش ایدر باده

خمار عشق ایدوبدور عندلیبی نرگس مخمور

یاتار گه شاخۀ گلده قونار گه سرو آزاده

گُله وار عشقی دلدن جور و طعن خاره تاب ایلر

سالار یاده خزان فصلین وورار جه جه گلور داده

غم هجره دوزوبدور دامن وصله وروبدور چنگ

اوخور درس وفا گلدوقجه شاخ گلده فریاده

اگر چه موسم عیش و فرح دور فصل گل امّا

منیم قلبیم آچلمور قید غمدن اولمور آزاده

گریز

خیالیم نه چمن نه عشق گل نه ذوق بلبلدور

دیار کربلاده سالموشام بر نوگلی یاده

نجه گل عارضی رشگ گل و گلزار جنّتدور

قد موزونی قویموش داغ حسرت قلب طوباده

بشر صورت ملک طلعت اوزی تصویر پیغمبر

آدی اکبردی گلمز گلمیوب مانندی ایجاده

یوزی گل زلفی سنبل بینوا لیلا اونا بلبل

باخار آغلار یانار شوریده بلبل تک او صحراده

هوائین ایسّسی سوز عطش ایلوب یوزین گلگون

قویار طاقت نجه او حُسنِ روز افزونی لیلاده

قرا زُلف آق کفن رخسار گلگون قامت موزون

سالوب سرو آتدا گویا سایه سنبل برگ رعناده

ایدوب اوز زلفی تک مجنون کیمی لیلانی آشفته

ورُوبدور بوینونا هر تار مو بر سخت قلّاده

باخان سویلر گل لیلا چکوب نقّاش غم تصویر

بو لیلادور هانی روحی یقین صورتدی دیباده

ویرور اولقالب بیروحه دو هردم مسیحا دم

جگر قان اولماقین توضیح ایدور گوز اشگ حمراده

دیور ایلوب علی بو قاره زلفون بختیمی قاره

گرک آشفته زلفون تک قالام عمریمجه افتاده

بو نه قامتدی لیلایه قیامنده قیامتدور

گورونمز لیلیه بیله قیامت حشر عظماده

غزال مشگمو آهو باخیشلی گوزلریم نوری

حرم آهوسی تک دوشسن بوگون سن دام صیّاده

دوشر صحرالره لیلا مَلَر آغلار یولار گیسو

باخاندا حالینه آغلار یانار اعلاده ادناده

دِیَنده وای علی اکبر جوانیم وای اوغول ایوای

منیله سس سسه زهرا ویرر جنّات اعلاده

آلوبدور شاهد غیبی سنون آرامیوی اَلدن

اودور جان ویرماقا دلدن اولوبسان بیله آماده

منه چوخ باخما یانما ای گوزوم نوری گیدورسن گیت

یانوب یاندیرما لیلانی شرار آهه شهزاده

اوزون راضی آتان راضی رضایم منده بو حاله

اگر چه طاقتیم یوخ قان گورم بو چشم شهلاده

رضایم پیکرون اولسون گل صد برگ تک صد چاک

بو چشم نرگسون قانیله دولسون دشت هیجاده

دوزولسون شدّۀ مرجان کیمی قان تار زلفونده

باخان رحم ایلسون گرچه مروّت یوخدی اعداده

بو کوی عشقده باش ویر آناوی سرفراز ایله

قیام حشردور باخما خیام آل طاهاده

ترقّی عالمین سیر ایت اوجات احکام اسلامی

گیدنده نیزه ده شامه گلر آردونجا لیلاده

جدا باشندا تبلیغات اسلام ایله سن سنده

دیار شامده محملده بانگ وا علیّاده

گلنده قتلگاهه دست بسته پیکرون اوسته

کسنده باشوی عجز ایلرم بیرحم جلّاده

وُراندا باشیمه قمچی منه بیر دادخواه اولماز

کیمی سسلر اوغولسوز لار بلا وقتینده امداده

«حسینی» معدن جود و کرمدور بو علی اکبر

ویرر عالی جزا یوم الجزا مطلق بو افراده

شاعر : مرحوم استاد حسینی سعدی زمان

!!! لطفا با نام کانال کنزُ الشُّعَراء کپی کنید !!!

وداع حضرت علی اکبر (علیه السلام)

وداع حضرت علی اکبر (علیه السلام)

ای منای عشقیمده زینت منا اوغلوم

گئت جداله خوش گلدون، تشنه لب فدا اوغلوم

بو بساط عشقیمده اولین فدا سن‌ سن

کربلا مناسینده، زینت منا سن ‌سن

پیشگاه جانانه، تحفه ابتدا سن‌ سن

برگزیده قربان سان، شبه مصطفیٰ سن ‌سن

وئرمیشم سنی قربان حقّه ابتدا اوغلوم

وئرمدیم سر زلفون، مین فدای مینایه

سن کیمی فدا گلمز عرصه‌گاه دنیایه

گئت آنون کفن سالسین قامت دل ‌آرایه

آفرین دیسین هاجر صبر حلم لیلایه

سن فدایه اسماعیل ائتسین اقتدا اوغلوم

وئرمه قوّت قلبون الد‌ن ای جگر گوشه

مزرع شهادتده سن ‌سن اولین خوشه

گلمسه علی قانون قتلگاهیده جوشه

روح عالم اسلام، گلمیور بالا هوشه

مُحکم اولمیور دین ختمُ ‌الانبیا اوغلوم

اولماسا قیزیل قانه خال هاشمون غلطان

یا توکولمسه زلفون توپراق اوستونه افشان

یا بُلونمسه جسمون، قطعه قطعه چون قربان

اولمیور یقین تکمیل حقّه وئردیگیم پیمان

اولموسان اله گلمز، عین مدّعا اوغلوم

اوغلونون الین دوتدی گلدی تلّید‌ن اندی

یوز دوتوب عمرسعد بیحیایه سسلندی

نسلیوی گوروم کسسین، اکبرین خداوندی

بو منا بو سن، بو من بو حسین جگر بندی

اول سنون قرا قلبون، بو قمر لقا اوغلوم

سن کی راضی اولدون بو ظلمه ای جفا کرده

احترام طاهایه قویمادون قالا پرده

بو جوان رعناد‌ن چکدیم ال همین یئرده

حقّ اوزی آلار سند‌ن، بو قصاصی محشرده

فاطمه رضا اولماز، اولماسا رضا اوغلوم

شاعر : مرحوم یحیوی