#وهب
#جوان_نصرانی
#مرحوم_تائب (حاج صادق ابوالحسنی ، #تائب)

بخش ۲

سالاردی شور هارا یول سالوب گچردی حسین
او طولِ راهیده همره لرین سچردی حسین

جهانه شور سالوب شورِ شورباریله
یغوب ایدردی هم آهنگ یاری یاریله

نه تک زهیری آقام بلکه یولدا ترسانی
کمندِ عشقه سالوب عشقِ جانشکاریله

آدی وهب ، اوزی کلبی ، لقب تازا داماد
سالوب دالینجا حسین جلوهء نگاریله

سچوب جوانِ مسیحی نی چشمِ حق بینی
او یرده حقه طرف چکدی بیر گذاریله

وهب آناسینا مولا بویوردی من گیتدیم
وهبده خوشدی گَله رأیِ استواریله

الیله ایتدی اشاره او سرزمینه امام
صفالی گلشن اولوب لطفِ کردگاریله

وهب گلوب آناسیندان سوروشدی یوخسا آنا
بو سرزمینه مسیحا گلوب وقاریله

بو دشتی عطرِ بهشتی دوتوبدی سر تا سر
بو یر قرین دی فردوسِ مشگباریله

جواب ویردی بو صحرایه گلمیوب عیسی'
گَلن حسیندی بیر محترم قطاریله
 
صفا یاغیردی یوزیندن ایله صفالیدی
صفا یاراتدی بو چولده دمِ بهاریله

اشاره سیله بو صحرانی ایتدی گلشنِ قدس
برابر اولدی بو یر صحنِ لاله زاریله

پیمبر اوغلی و یا کیم اُزی پیمبردی
او عیسوی نفسیله او اقتداریله

توکردی دُرّ و گهر لعلِ دُر نثاریندان
دولیدی کامی ز بس دُرِ شاهواریله

نجه دانیشدی نجه شرح ایدیم اولیدون کاش
قولاق ویریدون اُزون گوشِ هوشیاریله

گوریدون اوندا نجه دل یاران بیان واریدی
ویروردی روح او بیاناتِ خوشگواریله

ولی اونون پوزولان حالی حالیمی پوزدی
او روبرودی یقین تلخ ، روزگاریله

بیله خیال ایدورم خائفاً دوشوبدی چوله
ایدوب جلای وطن ، اشقیا فشاریله

بویوردی من گیدیرم ویر خبر وهبده گَله
بو یولدا همره اولا جمعِ جان نثاریله

بو سوزلری ایشیدنده وهب گلوب شوره
او محوِ عشقِ حسین اولدی ابتکاریله

دوشوب حسین دالیجا گیتدی کربلا چولونه
 بویاندی قانینه دین اوسته حق شعاریله

گَه ارمنی بالاسین یولدا دینه دعوت ایدور
بلا چولینده مسیحی نی گَه هدایت ایدور

داشاندا دشتِ بلایاده عشق عمّانی
دوتاندا عشق چولون خونِ سرخ طوفانی

اولوندی یتمیش ایکی جان ، غریقِ موجهء خون
یارالی یخدیلار یالقیز عزیزِ زهرانی

اولوبلا چوخلار او مظلوم قتلینه مأمور
گوروب گوزل باخشین آتدی تیغِ برّانی

گیدن قییتدی ندامتله ، پورِ طاهانین
ایدوبله قتلینه مأمور پورِ ترسانی

آلوبدی وعدهء سرلشکری ، روان اولدی
امام مَصرعینه اول جوانِ نصرانی

گوروب که قانینه غلطان دوشوبدی بیر یارالی
نجه یارالی وار اوندا جمالِ نورانی

جمالی ایله منوّردی محو اولور نوره
گورون جمالِ جمیلینده کی تجلّانی

خیال ایتدی که قان گاهواره سینده مسیح
یاتوبدی نازیله وار اوندا روحِ روحانی

دئدی بو خوابدی یارب یا که بیداری؟
نیه تلقّی ایدوم من بو سرّ عظمانی

قیامت عالمیدور حضرتِ مسیح مگر
آتوبدی چرخِ چهارمده مهدِ بالانی

نزول ایدوبدی همین قان دولان بیابانه
بو مهدِ خوندا یاتوب دلده ذکرِ جانانی

و یا که حضرتِ یحیادی طشتیدن قانی
آخوبدی بیله دوتوب قان دولان بیابانی

بو شعله ور که اناالحق چیخور بوغازیندان
ایدر نظرده مجسّم درختِ موسانی

او حالتیله که غرقِ نگاهیدی او جوان
دولاندیروب او شهِ عشق ، چشمِ شهلانی

سالوب نظر او گوزل گوزلریله ترسایه
ایدوبدی محوِ نگاه اول جوانِ ترسانی

خطاب قیلدی عجب وقتیده گلوبسن سن
نه وقته دین ایده جاقسان سراغ ، جانانی

حریمِ عشقیدی گَل آت کناره زنّازی
کنار ایله اوزیندن عذابِ نیرانی

او بیر باخیش ، او بیانِ فصیح ، او منظرِ عشق
او عیسوی ده یاراتدی فصیح ، تبیانی

دئدی یارالی اولوم گوزلریوه من قربان
باخاندا دلدن آلورسان هامی توانانی

شرارِ آهویله کایناتی یاندیروسان
بو قلبیوین نقدر واردی داغِ سوزانی

منی بو دشتیده مأمور ایدوب مسلمانلار
که ئولدوروب سنی اجرا ایدم او فرمانی

عوضده وعده ویروبلر منه مقامِ بزرگ
دوتام سپاه آراسیندا مقامِ بالانی

ندور گناهون اولوبسان بو نوع واجبِ قتل
بولولّه قتلیوی واجب گروهِ سفیانی

دیولّه عاقّ امام اولموسان ، قانوندی هدر
فُهولِ عصر ویروبلر همین بو فتوانی

امام کیم اونا سن عاقّ اولموسان کیمدور؟
که قتلون اولا مطلق دلیل و برهانی

سوسوز دوداقلاری دگدی او دمده بیر بیرینه
ایدوب نثار گهرِ لعلِ گوهر افشانی

بویوردی یوخدی گناهیم جماعتِ مُجرم
قتیل ایدولّه گُنه سیز منِ پریشانی

اُزوم امامم   امام اوغلیم بو عالمده
اولوبلا عاق منه بو جماعتِ جانی

آزوبلا یوللارینی قانیمی بولولّه حلال
 چکوبله تیغ منه از طریقِ شیطانی


ادامه دارد🔽🔽🔽


....................................

#جوان_نصرانی
#مرحوم_تائب

بخش ۳ و پایانی

دیوبدی حضرتِ عیسی سنه نه رؤیاده
دیورسن ایمدی و یا من دیوم او رؤیانی

دئدی صباح اولاندا بو قانلی معرکه ده
خجالت ایتمه محمّد یانیندا عیسانی

نه امر ایدوب سنه عیسی' اونا اطاعت ایله
بو امتثالیله راضی ایله مسیحانی

دئدی بویور کیمه وار نسبتون ، اُزون کیمسن؟
که واردی سنده بو قدری کمالِ انسانی

سنی او عیسیِ مریم گوزیله من گوروم
حواری اولماقا آماده ام همین آنی

اگر مسیح دگلسن بیان ایله کیمسن
که سنده واردی بو اندازه روحِ روحانی

نه شمعسن؟ سنه ایلوم بو جانی پروانه
آلوم بو جانیمه شوریله هر بلایانی

جواب ویردی که عیسیِ مسیحه دم ویرَنَم
که شورِ عشقیمین اولموش کلیم ، حیرانی

محمّد عربی ، جدّ تاجداریمدور
قاباق کُتُبده گلوب مودمود عنوانی

آتام علیدی ، آدی ایلیا اولوب مذکور
یازوبلا بعضلری شنطیا او مولانی

آنامدا حضرتِ زهرادی ، مریمِ کبری'
اودور سپهرِ حیانین مهِ درخشانی

حسندی قاردشیم ، هاشن ، منیم آدیم هوشین
تانور کلیمی و انجلیان بو اخوانی

قوی آشکار دیوم آدیمی حسینم من
فدای دین خدا ایتمیشم سر و جانی

قوناق چاغیردیلا مهمان آدیله من گلدیم
ایدر قوناق چاغیرانلار قتیل ، مهمانی

مسیح - عبد ، ابی عبداللّهم بو بسدی منه
خدا ایدوب منه احسان بو شأنِ شایانی

گویه گیدوبدی اگر پای داریدن عیسی'
منیم باشیم دولانار نوکِ نی ده هریانی

جِدا باشیندا اوخور بو کسیک باشیم قرآن
که سرفراز ایلسون ملّتِ مسلمانی

منیم بو حالیمه باخما که دوشموشم یارالی
بو حالتیله منم شهرِ عشق سلطانی

خدائیله آرامیزدا بیر عهد و پیمان وار
شهادتیمدی ویرن آخره او پیمانی

اولوب خدائیله عهدیم که دین حق اوسته
باتام قزلقانا گلزار ایدم بو صحرانی

مسیحی اوغلی ، منیم قاتلیم دگلسن سن
منی قتیل ایده جاق بیر ستمگرِ جانی

سنی چکوب گتوروب نیک طالعون بو یره
کمرده محکم ایله همّتیله دامانی

ازلده پاک ایله دلدن غبارِ تَثلیثی
وحید و فرد تانی ذاتِ حیّ یکتانی

اُزون خلاص ایله ، آچ آت کناره زنّاری
حریمِ یاریده سن ترک ایله کلیسانی

رهِ حقیقتی تاپ ، قوی کناره انجیلی
یوزیوی کعبیه دوت ، بول کتاب قرآنی

فصیح نطقی ، او حالتده عاطفی باخیشی
ایدوبدی جلب ایله اول نوجوانِ ترسانی

کنار ایلدی بوینوندا کی او زنّاری
الیندن آتدی یره تیغِ تیزِ برّانی

دوشندی شاهِ شهیدین گوزل قدملرینه
سرشگِ شوق توکوب ایسلادوبدی دامانی

شرابِ عشقِ حسینی اونی ایدوب سر مست
آلوبدی تیغ الینه قصد قیلدی میدانی

ایدوب او تازه مسلمان قتال دشمنیله
او شور باشدا اولوب دینِ حق قربانی

اودا قاریشدی شهیدانِ کربلائیله
گیدوب مقام ایلدی باغِ خلدِ رضوانی

بلی حسین بیرینی سچسه چشمِ رأفتیله
یتر سعادته اولسون ولو او نصرانی

بو شرحی (تائبه) یازدیردی بیر وجودِ شریف
(حسین) شهرتی (نوتاش) ، حسین نواخوانی

امید وار بیزه ده چشمِ رأفتیله باخا
او باخماقی بیزه کافیدی ، یوخدی کتمانی.


مرحوم حاج صادق ابوالحسنی(تائب)

التماس دعای فرج