نه بزمدور گینه یاران صدای ناله گلور
زمانه مردمی یکسر غم و ملاله گلور

یواش یواش آچیلور آه و ناله غنچه لری
چمنده تعزیه بلبلری مقاله گلور

دوتوب سحابِ مصیبت هوای گلزاری
اودور که بارشِ غم مزرعِ خیاله گلور

تقاطر مطر و محنت و کدورتدن
مِی محبّت اوچون عاشقه پیاله گلور

دوشوب ئورکلره هر یاندا عشق سوداسی
خماردن آیلوب لحظه لحظه حاله گلور

سبب ندور گینه گوزدن آخار جگر قانی
دونوبدی گوز یاشی بیر چشمه ی زلاله گلور

درونِ سینه ده خونابه ی جگر یاران
ایدوبدی قانیله گوز یاشین استحاله گلور

مگر فضای چمنده بهارِ ماتمدور
بنفشه گردنی کج ، سینه داغ ، لاله گلور

سؤال ملهمِ غیبیدن ایلدیم که نه وار
تمام کون و مکان یاس دوتوب ملاله گلور

خطاب قیلدی که ای بی خبر نه غافل سن
بصیرت اهلی نجه بیر بئله خیاله گلور

زمینِ ماریه نی چولقیوبدی ظلمتِ شام
یقین که شمسِ امامت دونوب زواله گلور

بو گون یخالّا شهِ دینی ذوالجناح اوستن
الینده خنجری یوز مین نفر قتاله گلور

دئدیم حسین قمرِ طارمِ ولایتدور
جواب وردی که آی دوره سینده هاله گلور

بلی ولاده بلادور ، بلاده واردی ولا
نه قدر اولسا بلا ، طالبِ وصاله گلور

جلال و جاهه قدر ، پایه ی بلا آرتار
اگر زمانه ده نقصان گَله جلاله گلور

همیشه چوخ اوجا یرلرده گورسنور آفات
بولود گویون اوزونه ، ایلدیریم جباله گلور

ببر اوچییا اگر اولسا دچار یوزمین صید
شکارِ صید ده صیّاد اوخی غزاله گلور

وورالا قاعده دور بیر شکاره بیر یاره
حرم غزالینه مین اوخ اولوب حواله گلور

یتوب غروبه عزیزان هلالِ عمرِ حسین
مدام خلق تماشا ایچون ملاله گلور

بو شور گوزیاشی آرتیقدی عطرِ جنّتدن
حسین غمینده آخوب صفحه ی جماله گلور

نثار ایدلّه عزا مجلسینده اشکِ بصر
او دم که #قمری شیرین زبان مقاله گلور

دبیرِ مجلسِ هجران ، مدیرِ محفلِ غم
خجسته منشیِ ارقامِ فرصت و ماتم

نظام بخش صفوفِ عساکرِ انشا
اولوب وقایِع کرب و بلاده شقّه گشا

چو سبطِ احمدِ مختار ، سَرورِ حرمین
غریبِ کرب و بلا حضرتِ امام حسین

زمینِ ماریه ده قالدی بی کس و تنها
خیامِ لشگر آراسیندا اول شه دو سرا

چکردی آه دییردی شهنشهِ عطشان
زبان حالی بو مضمونی ایلیوردی بیان

غریب و بیکس و بی غمگسار جانیم وای
قالان بو غربت آرا دلفکار جانیم وای

صحابه سی قیریلوب یار و یاوری داغیلان
اولان غریب ولایتده خوار جانیم وای...

#عزامجلسی
#گوزیاشی

التماس دعای فرج