⚫️ بخش : 2⃣

جان ویروب بلسه ایکی نورس جوان
قامتین ایلر اوغول مرگی کمان

زینب بیخانمان ویردی جواب
ای شه گلگون قبا عالی جناب

یوز قویان گون بو دیاره سنله من
ایلدی اظهار او شخص ممتحن

قویم سن اوغلانلارین سالم قالا
فاطمه دلبندینه ایله فدا

بیر آنا بیرده ایکی نورس بالا
آغلادی اودلاندی شاه کربلا

بسکه چوخ عجز ایتدیله یالواردیلار
آخر اول شهدن اجازه آلدیلار

مقصده نایل ایکی قارداش اولوب
عازم میدان اولار بیر باش اولوب

یتدیلر میدانه باهم دوردولا
نوریله اول عرصه نی دولدوردولار

کوفیانه اول ایکی تشنه جگر
هر نه ایلوب موعظه ایتموب اثر

امر اولوب منجر آخر بیر یره
ایلیوبله حمله قوم کافره

آتش پیکار اولوبدور شعله ور
هر بیری الدوردی بیر نچه نفر

ویرمدی فرصت ولی قوم یزید
ظلمیله هانی بیرین ایتدی شهید

صدقیله جانانینه قربان اولوب
روح پاکی عازم رضوان اولوب

گوردی قارداش قارداشی قانه باتوب
عالمی دلدن دوشوب گوزدن آتوب

نعشینی جان تک باسوب آغوشینه
بو سوزی آهسته سویلوب گوشینه

بس منیم سندن صورا حالیم نولی
منده بل آردینجا گلم بو یولی

آتدی بیر اوخدا او دمده بیر شقی
عالمی یاندوردی تیر ناحقی

بو سوزوم عرشه اوجالدوب آهیمی
ایلوب اول تیره نشان ابراهیمی

تا گوزینه دگمسون تیر اول زمان
ال گوزی استه قویوب اول نوجوان

آنینا تیکدی او مظلومین الین
اودلانوبدور اولین و آخرین

یتدی بیر ظالمده الده بیر عمود
بیر بویوک ظلم ایتدی اول اهل عنود

توکمسون شیعه نجه گوز یاشینی
قارداشا ملحق ایدوب قارداشینی

پارچالاندی باش آخوبدور قان یره
قالموری گوردی او قدری جان ویره

یوز دوتوبدور خیمیه فریاد ایدوب
وارث عیسادن استمداد ایدوب

ای شه دوران یتوش امدادیمه
گامسن باش ویرمرم جلادیمه

تاایشیدی بو سوزی میر فخار
قالمادی قلبینده صبر واختیار

باشلاری استه او شاه غم حشم
حق بلور بلمم نجه گلدی او دم

توکدی اشکین صورت زیباسینه
غرق اولابلار گوردی قان دریاسینه

اونلارا اول منبع عین الحیات
بحریدن چون ناخدا ویردی نجات

آلدی آغوشه ایکی نعشی امام
یوزده گوزیاشی ایدوب عزم خیام

تا یتوشدی خیمده قویدی یره
عترت اطهار دگدی بیربیره

دیشره چیخدی خیمدن آل عبا
اولدی دشت کربلا ماتم سرا

بیر اودم غمخواره زینب چیخمادی
صبر ایدوب صبرین حصارین یخمادی

بو خیلیله گورر اولادینی
آرتورار فریاد و آه زارینی

سرور لب تشنگان خجلت چکر
زینب مظلومیه ایلر نظر

بلمورم دوزدی نجه صبر ایلدی
اشک چشمین بیر دولی ابر ایلدی

لیک بیر وقته کسیلدی چاره سی
اوندا که گلدی علی اکبر سسی

مرکبه اولدی شه دوران سوار
اکبرین درک ایلدی اول شهریار

(حامدا)اولدی مطول بو سوزون
مطلقا سوز صاحبینده وار سوزون

ایستسونلر ناله و افغانیله
زایر اول اول قبرینه (خوشخوانیله)