#کهنمویی

#پسران_حضرت_زینب

زینبین روح و روانی، ای عزیز جانـی قارداش

آل قبول ائیله باجوندان، بو ایکی قربانی قارداش

قالمیسان یالقوز بو چولده، ای پنـاه‌سیزلار پناهـی

یوخدو امید نجاتون، عالمین امید گاهـی

اولدوروب هانسی رعیت، بیر گناه‌سیز پادشاهـی

بو ایشین دنیاده هرگز، اولماییب امکانی قارداش

هر آنا ائتدی اوز اوغلـون، دینینـه قـربان بـو چـولـده

اولدو عورت‌لرده ظاهر، پایه‌ی ایمـان بـو چــولده

قطعه قطعه دوغرانیبدور، وئردی اکبر جان بو چولـده

ائیله‌دی مجنون آناسی، بینوا لیلانـی قــارداش

تحفـه هـر چند اولسا جزئی، کم بها اولسا عیاری

اولمـاســا لاییـق حـضـوری آستـان شهـریاری

کسب ائد‌ر شأن و شرافت، آرتار عز و اعتباری

شــه رعیـت‌دن آلانــدا، تـحفـه‌ی ارزانی قارداش

سعی ائده‌ر دنیاده انسان، مقصد و مقصوده چاتسین

وای او بدبخته کی ایستیـر، دینینـی دنیایه سـاتسیـن

ایستر اوغلانلار آناسی، باشیـن عالـمـده اوجـاتسین

نیلیرم سند‌ن سورا مـن، عز‌ت دنیانـی قـارداش

صفحه‌ی روخساره یازدی، گوزیاشی سر نهانی

سن کیمی قربان دینـه، زینبین قـربـانـدی جـانـی

بـو ایکـی طفل صغیـره، گلـدی آخـ‌رده گمانی

عفو ائله یوخدور، بیر آیری تحفه‌ی شایانی قارداش

غنچه‌د‌ن تازه گول آچدی، بیر خزان اولموش چمنده

بو ایکی طفل ائتدی ناله، سن کمکلیک ایستینده

اوزلـ‌ری راضیـدی بـی‌شک، راضیم بــو امـره منــده

وار بـو اصـرارین عـلاوه، اوزگـه بیر عـنوانـی قارداش

شهر یثریبــدن کنــاره، قافه چیخمیشـدی تـازه

گلـدی عبـدالـه بـویــوردو، زینبـــا وردیـــم اجازه

بـو ایکـی اوغـلانـلاریمـــی، ویر فــدا میــر حجــازه

اوندا کی گوردون کمکسیز، تشنه لب سلطانی قارداش

منده بیر قـربـان دینم، کـربـلا کـوه منـادی

نیله‌ییم دین وئرمه‌یبدیر، عور‌ته اذن جهـادی

چاره‌سیزلیکدن دوتوب، اود زینبیـن یانــدی نهـادی

شاهد عادلدی بوردا، دیده‌ی گریانی قارداش

کربلانین مکتبینـده درس عشقـی سنـد‌ن آلـلام

فصل صبری پس ویر‌نده، حیر‌ته دنیانی ساللام

صبره حیرانم اوزومده، اولمه­رم دنیــاده قالــلام

حنجرونده من گـورنده، خنجـر برانـی قـارداش

بو حیات عاریتـده، ائیلرم چــوخ استفاده

شورش و غوغانی ساللام، مجلس ابن‌زیـاده

کوه و صحرانی دولانام، دسـت بستـه، پـا پیاده

ائیله‌ر‌م رسوا جهاندا، آل بوسفیانی قارداش

کهنمـوئـی آختــاریـرسـان، گـر بـو دنیــاده سعــاده‌ت

کسب تقوا ائیله سنده، اولـدو تقـوا اهلـی راحت

بیر مسلمان روز و شب­ده، ائیله‌سه هر نه عباد‌ت

اولماسا تقواسی قالماز، مذهب و ایمانـی قارداش.

مرحوم استاد سید حسین کهنمویی (ره)

التماس دعا