🌺 نویسنده و ویرایش کننده از : جناب آقای بهروز کریمی 🌺

#انور_اردبیلی
#کوچ_از_قتلگاه

بخش ۲

عشقون خزانی یوخدی گرک نوبهار اولا
حاکمدی عشق هاردا گرک لاله زار اولا

زهرانون اوغلی ایتدی گلستان بلا چولون
دنیا نقدری وار او گلستاندا وار اولا

سولماز شهید سینه سی اوسته شگفته گُل
کیم قائل اولسا سولماقینا شرمسار اولا

بلبل لر اَندی ناقه لر اوستن او گلشنه
جهد ایلر عندلیب یری شاخسار اولا

تاپدی پناهِ خاریده ، هر بلبل اوز گُلون
سوز پرده دن بو یرده گرکدی کنار اولا

زینب اوزون یتوردی شتابان چوخور یره
فکر ایلورم بو یر دئدی بَزمِ نگار اولا

باشسیز بدنده جاذبه وار ساخلادی منی
گوگلوم چتین بو دایره دن ، بر کنار اولا

عاشق وصال مجلسینی آختارار تاپار
فرق ایلمز ایشیقلی گونی ، لیلِ تار اولا

عاشق مسیرِ عشقینی ترک ایلیه محال
حَتّی اگر قدملری آلتدا ، شَرار اولا

چوخ شکری واردی محضرِ دلداره چاتموشام
حاشا حضوری زینبه قسمت دو بار اولا

افسوس وقتیم آزدی ، سوزوم چوخدی ، یورقونام
قلبیم اویاقدی ، گوزلریم ایستور خمار اولا

قیلدی طواف مقتلی باشلاندی دردِ دل
شرح ایلرم قلمده اگر اختیار اولا

فکر ایلورم ازل دئدی قارداش باشون هانی؟
شمری گوروم همیشه سیَه روزگار اولا

 ای گُل سنی تیکانلارا دشمن اوجوز ساتوب
ممکن دگول گُل اوسته بو اندازه خار اولا

نفرین ایدم لیاقتی یوخ شأنیمه ولی
گُل قدری بولمیَن گوروم عالمده خوار اولا

مُهرِ نبوّت اوسته اوشاق وقتی نازیله
سندن صورا کیمیدی حسینیم سوار اولا؟

تختِ جلالتیدی سنه دوشِ مصطفی
اگلش دییردی جدیّوه ده افتخار اولا

هاردان هارا چکوب سنی گور دورِ روزگار!
انصافدور فَلک بو قدر کج مدار اولا ؟

بیر نُقطیه مسافرتون اولمادی باجون
نوح عمری ایتسه ده یولووا انتظار اولا

شایان لباسیوی دِئمورم کیم سویوب حسین
کهنه قمیصوی آپاران شخصه عار اولا

گون یاندیرور جنازوی ، سینون برهنه دور
ای کاش دوغرانان بدنه بیر مزار اولا

من که سنون جنازوه بیر ایش گورنمدیم
شاید حمایت ایلیه نی ، رَهگذار اولا

تنگه سالوبلا زینبوی ، قافلم کُوچور
کیم وار گلوب حرملریوه پاسدار اولا

تختِِ روانیدن منی عبّاسیم اندیروب
عزّتلیَم کُوچومده گرک با وقار اولا

حسرت گوزوم بو چولده جلوداریمی گزور
عبّاسیمی چاغور منه یوللاردا یار اولا

پیغام ائله عزیزه باجون دوشدی چوللره
وقت اولمادی جنازوه پروانه وار اولا

حلّالِ مشکلات قیزی دوشدی مشکله
آخر کیمیم قالوبدی منه اعتبار اولا

قیزلار جحازسیز دوه اوسته مینمیور
عالمده سانما ، بیر بیله پوزقون قطار اولا

تکلیف شاقّ دور قسم اوز جانیوه حسین
عریان شترده خوردا بالا برقرار اولا

مقصد اوزاقدی ، یوللارین آلچاق اوجاسی وار
قورخوم بودور سفر بولارا مرگبار اولا

وقت اولمویوب اوپوم دوداقین نازدانه وین
قویمازدیم هئچ رقیّه تلینده غبار اولا

هر حالیده ، ادامه ویرم نهضته گرک
افسارِ دولتِ اُمَوی لر مَهار اولا

اورگدموشم بالالاریوا درسِ انقلاب
سعی ایلرم یاتان عَلَمون پایدار اولا

برّنده تیغ دور ، لبهء تیغِ منطقیم
نطقیمده وار گمان اثرِ ذوالفقار اولا

شش ماهه اوغلوون قانینا وار تَوسّلوم
قویماز او قان علی قیزینی شرمسار اولا

چوخ یالواروب ، آناسینی ساکت ایدنمدیم
سینه دولوبدی کاش دیور شیرخوار اولا

وار آرزوسی مسکن ائده کربلا چولون
امّا یانیندا خورداجا بیر گاهوار اولا.

مرحوم انور اردبیلی(حاج قدیر جلیل زادگان)

التماس دعای فرج