گَل عمو باخ قوریان لبلریمه
تشنه جان اوسته قالان اصغریمه
آل بو مشکی قوی فرات اوسته قدم


باغلیوب سو یولونی قوم ستم
دولدوروب خیمه لری محنت و غم
سوسوزوندان یانوری اهل حرم
آل بو مشکی قوی فرات اوسته قدم


ایتمرم داد و فغان اوز باشیما
قاریشوب خون دلیم گوز یاشیما
آغلورام بو سود امر قارداشیما
آل بو مشکی قوی فرات اوسته قدم


رحم سیزلرده نه انصافیدی بو
آخا صحرالری سیراب ایده سو
اصغریم جان ویره لب تشنه عمو
آل بو مشکی قوی فرات اوسته قدم


تشنه لیق اصغری بیر حاله سالوب
طاقتین سوزِ عطش اَلدن آلوب
گل کیمی رنگی سوسوزدان سارالوب
آل بو مشکی قوی فرات اوسته قدم


آناسی اصغره باخدوقجا یانور
گوروری یوخ سودی، لابد دایانور
خیمه گاهی سودان اوتری دولانور
آل بو مشکی قوی فرات اوسته قدم


دردینون سعی ایدوری چاره سینه
تاپموری چاره جگر پاره سینه
توکوری گوز یاشی گهواره سینه
آل بو مشکی قوی فرات اوسته قدم


اللرینده شهدا قیزلاری جام
آلوب اطرافیمی گوز یاشلی تمام
سنی سقّا ایدوب اطفاله بابام
آل بو مشکی قوی فرات اوسته قدم


گرچه غم گلشنینون بلبلیم
اکبرین خواهر شیرین دلیم
چون بولولّر سنه من سویگلیم
آل بو مشکی قوی فرات اوسته قدم


بو قوری مشکه باخوب داد ایدرم
یانارام، ناله و فریاد ایدرم
سو امیدیله گوگل شاد ایدرم
آل بو مشکی قوی فرات اوسته قدم


اولا سقّا آدون ای کان وفا
خوردا قیزلار قالا عطشان نه روا
خیمه لردن اوجالا عرشه نوا
آل بو مشکی قوی فرات اوسته قدم


آغلا «صحّاف» بو غمده مه و سال
صفحه ی عارضه توک اشک زلال
روز و شب بو سوزی دلدن دله سال
آل بو مشکی قوی فرات اوسته قدم