بخش 2 و پایانی

آتشه دونسون گوروم عالمده آب
سو دگلدی گوردوقوم برج سراب
ساز دلده وار یری سنسیز رباب
باشلاسا بیر شوریله شهناز اوغول

 

هم اولوب کاخ امیدیم زیر و رو
هم اولوب قلبیم مزار آرزو
هاردا گورسم سودامر یا جام سو
ایلیر زخم دیلیم سرباز اوغول

 

باشه یتدی تشنه لیقدان شیونون
زینت اولدی گوگلره قانون سنون
گوئیا بیر بوش قفسدور بو تنون
ای بهشتی مرغ بی آواز اوغول

 

عرصه تاریخیده چوخ جنگ اولار
جنگیده گردان و تیپ و هنگ اولار
هنگیده سرلشکر و سرهنگ اولار
کیم گوروب ششماهه بیر سرباز اوغول
 


غصه دن چوخ قلب قانیله دولار
چوخ اورک تیر غمه آماج اولار
رسمدور هر گل خزان فصلی سولار
لیک بیر گل سن کیمی سولماز اوغول
 


چوخ گله زحمت چکر چوخ باغبان
تا جهان وار لیکن ای آرام جان
ویرمیوب هرگز نشان دور زمان
سن کیمی گل من کیمی گلباز اوغول
 


تا جهانی خلق ایدوب پروردگار
چوخ جنایت لر گوروب بو روزگار
حرمله مثلی ولی بیر نابکار
اولمیوب تاریخیده اولماز اوغول

 

هانسی طفله سو دم پیکان ویرر
دیننه کیم تشنه لب قربان ویرر
دهرده چوخ شیرخواره جان ویرر
لیک بیر قونداقه قان دولماز اوغول

 

یانمورام که ویرموسن لب تشنه جان
ایلیوب بو غم ربابی باغریقان
گل بوغازیندان صورا آیری نشان
تاپمادی بی رحم تیرانداز اوغول

 

بو سوزه واقفدی ارباب ادب
شعرون نقصی دگل جای عجب
شایگان اولموش بو ایراده سبب
بوردا وار بیر نکته ایجاز اوغول
 


ایله کیم هر بلبل شیدا اوخور
بلبلان گلشن زهرا اوخور
نوحه نی (مجنون) یازار اما اوخور
(سیدی) و (فاخر) و (طهباز) اوغول