شاهزادیم اولوبدور-اصغریم فراته گیتدی-اوپمه دیم بالامون-نهر فراته بو گیجه
نوحه حالات خرابه
شاهزادیم اولوبدور منزلیم خرابه قارداش
ظلم الیله باغلانوبدی قوللاریم طنابه قارداش
غم ترانه سی انیسیم باغ محنتده عندلیبیم
هجر دردینون اسیری چاره یوخدی بی نصیبم
دست بسته دلشکسته هم اسیر و هم غریبم
معجریمدی قاره زلفیم حسرتیم نقابه قارداش
زنده گیم اولوبدی مشکل قالماقا تمایلیم یوخ
سیل محنته دچارم بیر امید ساحلیــــم یوخ
خسته بیرمسافرم من رختخواب و منزلیم یوخ
بحر پر تلاطم ایچره بنذرم حبابـه قارداش
گوزلریم اولوبدی دائم اشگیمه پر نم آغلار
باخدوقیجا قوللاریدا ریسمانه عمم آغلار
همصدا اولوب منیله صبح اولونجا باهم آغلار
گوزده کی سرشکی اوخشار بارش سحابه قارداش
عزتیم اولوبدی ذلّت عکسینه زمانه دونموش
سینم آرزولی غمیم چوخ قامتیم کمانه دونموش
محنتیم کیچوبدی حدّن گلمیور حسابه قارداش
بی سبب اوجالماز عرشه فرشیدن فغان ونالم
سرّی وار اولوبدی حالیم زلفیمون مثالی برهم
یاتماقا خرابه یرده قویمیور اورک دو گونمم
بسکه قلبیمی سالوبدی دشمن اضطرابه قارداش
هانسی باجینی گوزیندن من کیمی سالوبدی قارداش
سن گورن دگل رقیه وار نه سرّی چکموسن باش
شامه بیر یولون دوشیدی سن گلوب گوریدون ایکاش
بو تراب عزیزی قویموش یوز نجه ترابه قارداش
یوخ سوزوم اسیر اولان قیز چون چکر غم ومصیبت
بیر دقیقه راحــت اولماز ایلینمز استراحت
دلخوشام بو قدری ظلمه اهل کین ایده کفایت
چکمیه بو اهل بیتی مجلس ترابه قارداش
توسل به حضرت علی اصغر(ع)
اصغریم فراته گیتدی باخدی یانه یانه قارداش
صود امر مسافریمدن بوش بشیک نشانه قالدی
قردی ریشه دن نهال بختیمی آپاردی سیلّر
هجر اسیری اولدی دوشدی بیر بیریندن آیری ئیلّر
سیندی شاخه سولـدی گلشن اسدی سمّ دار یللر
گل قیافه گیتدی اما غصّه باغبانه قالدی
مشکیمی ستم کشیده گلمیوب بو روزگاره
من چکن غم و بلانی چکدی هانسی بخت قاره
اصغریم کیمین سارالدی سولدی هانسی شیر خواره
اوچ گون اوچ گیجه لب عطشان هانسی ناز دانه قالدی
حالتی مؤ ثراولدی بو غریب دل شکسته
بیر سودان چیخان بالق تک چیرپیناردی زار و خسته
من باخاندا تز قویاردی بارماقین دوداقی اوسته
حیف اولا سوزی اورکده گلمدی بیانه قالدی
بیلمورم او ناز دانه ایچدی سو بویاندی قانه
یا قوش اولدی شهپر آشدی گیتدی آیری آشیانه
مایۀ غم و مصیبت بو ذلیل و ناتوانه
یاره لی کبوتریمدن بیر بوش آشیانه قالدی
سوزدی بیلمورم نه سمته بختیمون سهیلی گیتدی
بو اسفلی زنده گیدن اولدی سلب میلی گیتدی
اللرین اونون قماطه باغلادیم گلیلی گیتدی
لوح دیلده دوشدی اما عکسی جاودانه قالدی
گوردی یوخ صودیم دوشومده کسدی مندن اعتناسین
خیمه لردن آیریلاندان اول غزال آل یاسین
خوردا اللریندن اوپدوم ایله دیم عوض لباسین
اوخلی یاره سیندن اما اوپمگیم جنانه قالدی
یوخ سوزوم منای حقده عالی امتیازه چاتدی
بیر ایشیقلی اولدوزیدی برج معرفتده باتدی
نازیلن ئوزی حسینون قانلی سینه سینده یاتدی
بی نوا ربابه اما غملو صحن خانه قالدی
نوحه حضرت رباب
اوپمه دیم بالامون اوخلی یاره سیندن
عطرین ایندی آلّام گاهواره سیندن
گوردی غملریم چوخدی دوشلریمده صود یوخدی
ترک الفت ایتدی چوخ گلیلی گیتدی
قان اولور بو قلبیم آخشام آی باتاندا
صود امر اوشاقلار مقصده چاتاندا
گیزلین آغلارام من قونشیلار یاتاندا
اصغریم دوشر یاده گلّم آه و فریاده
دلده دردیم آرتار دوشلریم سیزیلّار
ایلینده غملر اصغری خدا حافظ
هی باخاردی حسرت خیمه دن فراته
باغلامیدوم ایکاش اللرین قماطه
خیمه دن اورک داغلی گیتدی اللری باغلی
چوللری دولاندی قانینه بویاندی
هر گیجه شرار محنتیله یانّام
صبح اولونجان اشک ماتمه بویانّام
اللریم اورکده صحنیده دولانّام
غصه لی اولور مطلب صحنه تز دوشر زینب
داغلی قلبی داغلار بوینومی قوجاقلار
سسله نر بو داغلی قلبه یاره وورما
خسته دور وجودون بار غمله یورما
اللرون اورکده صحنیده اوتورما
دور گیدوب اوتور ایوده غملی بساطی قور ایوده
اوردا سینه داغلار منله باهم آغلا
زینبون بو ایوده غمگساری سن سن
بانوان یثرب افتخاری سن سن
اصغر و رقیه یادگاری سن سن
آغلاما یانور قلبیم والله اودلانور قلبیم
یوخدی الده چارم سن تک اشکبارم
یثربه گلندن زار و دلغمین سن
درد و غم شریکی مونس انین سن
سن بو دودماندا مهربان گلین سن
چوخ وفالی سن بیلّم گوز یاشون اوزوم سیلّم
ای گوزوم ضیاسی قلبمون صفاسی
دوز غم و فراقه صبر و طاقت ایله
آغلاماقدان آخر بیر فراغت ایله
گل بیر آزدا ایوده استراحت ایله
گوز یاشون دونوب قانه یوخسا دویموسان جانه
جوشی آب آوردن حضرت علی اکبر (ع)
نهر فراته بو گیجه اولدی روان اکبر
تحصیل ایده سو اصغره تازه جوان اکبر
بیر جمله ده نهری آلوب او نوگل رعنا
اوغلین دعا ایلور خیمده زادۀ زهرا
طبلین سسین اخیامیده درک ایلیور لیلا
آلدی الیندن لیلینون تاب توان اکبر
قاچدی موکّلر فراتی فتح ایدوب اکبر
مشکین پر آب ایلیوب سودان نوباوۀ حیدر
دشمن وروب طبلی برش اوینوب قشون یکسر
سبقت ایدوبدور لشکره ویروب امان اکبر
لیلا گوروب یوخدور علی آغلوب گلوب داده
سسلوم کیمی بو نصف شب یارب من امداده
عباس عموسی هاردا دور گلسون او فریاده
عباسیدن غیری هانی داده چاتان اکبر
طیلین سسی لرزه سالوبدور چرخ دوّاره
نیلوم بالامون جسمینه دشمن ورار یاره
عباسیمه کیمدور دیه قیلسون منه چاره
گور سونکه امداده گلوب شیر ژیان اکبر
گوردی سکینه مادری چوخ ایلیور شیون
عباس عموما سویلدی عرضون یتورّم من
هر بیر خطردن اکبری اول شیر ایدر ایمن
آلموش عموم عباسیدن نام و نشان اکبر
لیلا اورگلندی ایدوب گوز یاشینی جاری
سویلوب قیزیم سسله گله داده علمداری
تکدور بالام میدانیده باغلیولا یوللاری
نیلسون که تنها جنگ ایدور الده نشان اکبر
دردین سکینه عرض ایدوب غیرتلی سقایه
دور علینون آهی عمو پخش اولدی صحراده
اکبر صودان اوتری گیدوب رحم ایله لیلایه
هی سویلیور شهلا گوزه قربان آنان اکبر
اولدی سراسیمه دوروب اول نایب حیدر
قارداشلارین سسلوب گلون گیتمیش سوا اکبر
مولا گیجه نهر گیده راحت یاتا نوکر
تلی آشوب گوردی گلور سسلوبدی جان اکبر
سویلوبدی قزلار قامت رعنا یولون گوزلر
الّر دعاده زینب کبری یولون گوزلر
آغلار قالوبدور خیمه ده لیلا یولون گوزلر
ایندی سکینه گوز یاشین ایلور روان اکبر
نوحه مهلت گیجه سی – در شب دهم محرم
خیمه دن ناله چیخوب گویلره مهلت گیجه سی
یوخلاماق اولدی حرام رهبره مهلت گیجه سی
ویردی دستور ابوالفضل آلا مهلت بو گیجه
تا که اولاد پیمبر یاتا راحت بو گیجه
هر آنا بلکه ایده اوغلونا صحبت بو گیجه
گلدی اعلان ایله سون لشگره مهلت بو گیجه
ایتدی فرمایش ایا لشگر اشرار بیلون
ایستیور مهلت آلا سیزدن علمدار بیلون
آلمارام مهلت اوزوم لشگر خونخوار بیلون
چالا لای لای آناسی اصغره مهلت گیجه سی
ایش اگرمنلیک اولا جنگی الان باشلیارام
نه که سیزدن بو زمان عجز ایلیم مهلت آلارام
قدرتیم وار بو گیجه پر چمی نهر اوسته ورام
ایدرم جنگی بو دم یکسره مهلت گیجه سی
نیلیوم حکم ایلیوب شاه جهان مجبورم
حکمین اجراء ایلیوب مهلت آلارام مامورم
یوخسا دشمندن آلام مهلت دعوا دورم
سیزی مغلوب ایدرم کیفره مهلت گیجه سی
بو فراتین سوئی اوز باشینه صحرایه آخور
خیمیه شدت گرما ایله بیل برق شاخور
نالۀ اصغره گویدن ملکوت اهلی باخور
یره گویدن آچیلوب پنجره مهلت گیجه سی
اکبرین لیلی ویرور شانه قرا تئلرینه
باخور حسرتله رباب اصغرینون لبلرینه
زینب عباسینون هر دم باخوری اللرینه
غم هجران یارادوب منظره مهلت گیجه سی
ندی بو باره ده رایوز دیدی ای لشگر کین
منی مامور ایلیوب مهلت آلام شاه مبین
سعدو وقاصیله هم رای اولوب شمر لعین
حکم برگشت ویروب لشگره مهلت گیجه سی
آلدی مهلت قیدوب محضر سلطانه گلوب
گوردی تشنه بالالار ناله وافغانه گلوب
دولانوب خیمه لری باش چکه طفلانه گلوب
پاسلاری چاتوب اول سروره مهلت گیجه سی
نوحه واشعاری درموردشهدا و اسرای کربلا