احوالات راه شام2
احوالات راه شام
ترحّم ایت من محزون و بیقراره الهی
بو چولده قافله دن دوشموشم کناره الهی
هوانون ایسّیسی من بیر یتیمه قیز چول آراسی
کیمه پناه آپاروم یوخدی راه چاره الهی
اسیرلیق غمی دشمن عتابی گورمه میشم من
منی بو چرخ سالوب ایمدی بو فشاره الهی
گلینجه عمّم اگرئولمسم بو قورخولی چولده
گلر چکر منی بو ورطه دن کناره الهی
منم او گل که آپاردیم پناه سایه ی خاره
رهین منّتم عمریمجه من او خاره الهی
اسیریدیم یوخیدی فرصت استراحت ایدم من
گلوب بیر آز یوخی بو چشم اشکباره الهی
امان او لحظه دن آچدیم گوزومی حیف که گوردوم
گیدوبدی قافله منظور اولان دیاره الهی
کوچوب گیدوب آنام عمّم چکوبله شامه قطاری
قالان منم، که گونوم دوندی لیل تاره الهی
آتام باشی وورولان نیزه نی اگر گوره بولسم
گرک قویام یوزیمی پای نیزه داره الهی
او عندلیب اسیرم دونوب خزانه بهاریم
فراق گلشنینه اولموشام هزاره الهی
اسیر ایدنده بیزی کربلاده قوم ستمگر
وجودیمی ایلیوب تازیانه یاره الهی
یارالیوب منی دلدن خدنگ طعن و شماتت
گواه صدقدی بو قلب پاره پاره الهی
بابام باشین گوره بولسم نهایتاً بودی قصدیم
ملالیمی یتورم عرض شهریاره الهی
دیم بابا سنه قربان منی اوزوندن آیرما
ایده عنایت کامل بو دلفکاره الهی
اسیر اولاندا باشیمدان وطن خیالینی آتدیم
سالوب بو غربت اودی قلبیمه شراره الهی
اسیریلیق نه یامان دردیمیش زمانه ده الله
یوروب منی گله لعنت بو روزگاره الهی
اسیر زلف علی اکبرم نه شمره اسیرم
منی علاقم اوزی باغلیوب بو تاره الهی
اگر او هر یره گیتسه دالینجا منده سورونّم
کمند عشقی سالوب قلبیمی حصاره الهی
اگر قالام بو گجه تک سحر اولونجا بو چولده
یوزومده قطرۀ اشکیم دوزر ستاره الهی
بو جذبه ده بو کشاکشده وار بیر اوزگه عوالم
که عاشقی یتورر قدر و اعتباره الهی
بودور قرار محبّت، بودور کمال ارادت
مرید عشق، مراده ایده نظاره الهی
گوتورمرم گوزومی گل یوزوندن اولسا علاجیم
گیدوب غروبه نه چاره او ماهپاره الهی
وصال شهدینی نوش ایلین طریق وفاده
گرک تحمّل ایده زهر نیش خاره الهی
یازاندا خامه ی خوندل ایدنده عرض ارادت
بو خاندانه توکر اشکینی عذاره الهی
نه لعل ناب بولر یازدیقین، نه درّ نه گوهر
ایدر نه شعرینی تشبیه شاهکاره الهی
گورنده اوز اثرین شرم ایدر ولی وار امیدی
اولا عنایت مولا بو شرمساره الهی
شاعر : مرحوم حاج حیدر خوندل
زبانحال حضرت رقیه (سلام الله) در راه شام
گوزآچدیم خوابیدن گوردوم گیدوبدورکاروانیم یوخ
بسان مرغ عشقم من بو چولده آشیانیم یوخ
اُمید فُلکی بابا باتموش گِله دریای حسرتده
نه لنگر وارنه وارسکّان بو فُلکه بادبانیم یوخ
باتوب بحر بلا ایچره رقیّن غرق اولور تز گل
فنا مُلکونده تنهایم مُحبِّیم یوخ جنانیم یوخ
گویول ویرانه دی سنسیز داغلدی گلشن عزّت
نه گل قالدی نه پروانه نه بلبل سایه بانیم یوخ
بونی بوللم گوزوم دوشمز چمن زاره گلستانه
قضا کِلکِی عداوتدن آیردی گلستانیم یوخ
منی سندن جدا ایتدی گینه ظلمون الین چکمور
اجل سیز ایستور اولدورسون قالام زنده گمانیم یوخ
رقیّه نامینه تحریر ایدن کاتب یازوب مِحنت
جگرقانی اوتوردور بوفَلکدن هیچ اَمانیم یوخ
غریب خانه بر بادم صغیره بیر قیزام چولده
قوری یرلر مکانیمدی ایویم یوخ خانمانیم یوخ
وجودیم باغلانوب تارِ غم و حِرمانه گَل سنسیز
ایدم پروانه تک پرواز پریم یوخ آسمانیم یوخ
وجودیم قورخودان تبدار اوزوم بیمار هجرانم
بابا تز گل طبیبیم یوخ انیس و میزبانیم یوخ
ندوم آخر کیمه ایلوم تمسّک ایستیوم امداد
بوچولده ظلمت حاکمدی یاتام راحت مکانیم یوخ
گلورچوخ قورخولی سسلر دوشوب جان و دله وحشت
مُعینیم یوخ پناهیم یوخ دوزه روح و روانیم یوخ
قاچوردور قورخی گه آرام ایدور وصلون خیالی گل
ایاقلار آبله اولدی ایاقیمده توانیم یوخ
هوای وصلون ایلوبدی دل شبده منی سرمست
دلیم ذکر ایلوری بابا بو سوداده زیانیم یوخ
اسیران یول گیدورشامه منی گوزدن آتوب عممم
دایانسان سان ویروب گورسه دیمز یرده قالانیم یوخ
منیم بو حالیمه (عدلی) گجه گوندوز ملرآغلار
یازار نوحه دیر الله عنایت ایت بیانیم یوخ
شاعر : حاج اصغر فرشچی (عدلی تبریزی)
احوالات مجلس یزید ملعون
قوتاروب واقعهء کرب و بلا
دوشنوب تپراقا نعش شهدا
گیدوب القصه دمشقه اسرا
یغوب اطرافینه بیرعده یزید
اوتوروب تخت ریاستده یزید
ایله مغروریدی اول دیو خصال
نه ادب واریدی نه عقل و کمال
آدی مشروب ایچردی تاپا حال
عوضینده ایتیرردی اوزینی
دیه بولمزدی عمللی سوزینی
قباقیندا واریدی طشت طلا
اوهمان طشتیده میر شهدا
یارالی باشه دگور چوب جفا
قورویان لبلرینین قانی آخور
باجیسی قزلاری حسرتله باخور
دل آفاق چکور شعله یانور
اثر شعله سی عرشه دایانور
اوحسینی که هامی خلق تانور
دیریلوخ گنجینه جان گوهریدی
ملک جن و بشر رهبریدی
عجبا هند جگرخواره نسب
دیور ای خارجی خوار اولدون عجب
کیم اولوبدور سنه دنیاده سبب
اوزوی سالمسان آخر خطره
بالالاروندا دوشوب دردسره
سفرا جمله سی مجلسده خمار
اموی زاده لر اوینوردی قمار
اسرا گلجاق عدو وردی شعار
دایانیب جمعده قول باغلی امام
دولانیب گوندوزی اولموشدی چوشام
او هیاهو ده دوروب زین العباد
حق دادارین آدین ایلدی یاد
متحیر دی هامی اهل عناد
او مریض ایستدی اذن سخنه
یتوره مطلبی قوم فتنه
قویوب القصه قدم منبره شاه
آپاروب حضرت یکتایه پناه
اولوب اجدادینه اولده گواه
بویوروب خلقته سرمایه بزوک
سالان آفاقلره سایه بزوک
بزوک انسانلارا حسن و حسنات
قاپومیز مردم ایچون باب نجات
بابامین آدینه گوندر صلوات
اوجالیق بیرقی بیزدن اوجالار
ابدی دور آدیمیز زنده قالار
نه سیزون خیرلی آینده واروز
نه ده آیندهء پاینده واروز
آدوزا ننگلی پرونده واروز
یازیلار چوخلی مذمت آدوزا
اوخونار دائمی لعنت آدوزا
بی بی سی صحبتین حس ایتدی دادین
ایاقا دوردی آچوب قول قنادین
هر ایکی قهرمان آلدی مرادین
پوزوب افکار یزیدی ایکی شیر
اولارین خطبه سی الماسی کسیر
اوجالبدور گوگه مجلسده صدا
ایله قالخزدی یزیدی ایاقا
سوروشوب بو خانم عورت کیم اولا
گوزی قورخمور سوزی جرأتله دیور
دیه سن برق دی سرعتله دیور
دیدی من زینبم ای شوم دنی
بابامین آدی رسول مدنی
تانیور عالم آنام فاطمه نی
افق خلقتین اول اختریدی
بشریت آدی نین مفخریدی
اوکه زهرا بجروب شیر منم
من اوزوم شیرم و شمشیر ننم
گوروسن ایندی جلای وطنم
یانیرام نطقیوه قلبیم آلیشیر
سن سکوت ایله امامیم دانشیر
اونی اعلا یارادیب حق ودود
اوزینین حرمتی بی حدو حدود
نظرین سالسا اولار بود نبود
او شهین شأنین «امینی» یازاجاق
اونا باش اگمیین الحق آزاجاق
شاعر : حاج رسول امینی خوئی
راه شام
قالمیشام چوللرده محزون و پریشانم بابا
یوخ یتن امدادیمه غمگین و نالانم بابا
بی پناهان جهانه ای اولان فریادرس
قورخولی صحرا 'ئوزوم مظلومه بند اولموش نفس
کاروان یوللاندی سمعه یتموری بانگ جرس
نیلیوم بو قورخولی صحراده گریانم بابا
بلبل باغ غم و دردم چمن آواره سی
آهوی دشت ختایم من خُتن آواره سی
بیر غریب و خانه بر دوشم وطن آواره سی
که اسیر فرقه بی دین سفیانم بابا
کربلادن آیریلاندان دوزموشم درد و غمه
ایتمشوم هرلحظه هر آن آدیوی من زمزمه
چوخلی زحمت ویرمیشم یوللاردا زینب عممه
عمه مین الطافینه دلدن ثناخوانم بابا
ناقه دن دوشدوم یره کیمسه سراغیم آلمادی
بیر نفر بو غمکش و بی یاری یاده سالمادی
مهربان عممده نولدی قیدیمه هیچ قالمادی
بختیمه اقبالیمه واللهی حیرانم بابا
من سنی ویرم قسم گوزدن آخان گوزیاشیمه
اللرون اوسته سوسوز قانه باتان قارداشیمه
گل بابا وحشتلی چولده سایه وی سال باشیمه
یاره لی توزلی بلالی باشه قربانم بابا
سن بولورسن من علیّ اکبره بیر باجیم
یولدا قالمیش بیر قیزام تیر بلا آماجیم
لطف قیل گیتمه بو چولده لطفوین محتاجیم
صرصر جور و جفادن برگ خندانم بابا
ای بابا سندنصورا غمله هم آغوش اولموشام
جور و ظلم اشقیادن محنته توش اولموشام
شمر ووردوقجا گه آغلوب گاه خاموش اولموشام
الامان شمرین الیندن سینه سوزانم بابا
چوخ جفالر گورموشم یوللاردا ای میر امم
ظلمیله قمچی ووروبدی باشیمه اهل ستم
هاردادی بولمم آنام باجیم بی بیم اهل حرم
اوچ یاشیندا بیر قیزام مقهور عدوانم بابا
یوز قویوب «یاسر» بیزیم درگاهه با آه و نوا
حاجتی واردور یورکده ای ذبیحاًمِن قفا
عممه خاطر گل ایله حاجتین سنده روا
تا دیسون شه لطف ایدوب مشمول احسانم بابا
شاعر : یاسر رستگار حسنی
زبانحال به راس امام حسین (علیه السلام)
درد فراقون ای بابا تاثیرایدوب منه
آخرمنی گتوردی همان درد دل دله
دلدن دله زبسکه ایدوب فرقتین اثر
بو عرض فرضدورایدرم من نه ناقله
سندنصورا داغیلدی بیزیم اهل سلسله
تعیین اولوندی سلسلیه بند سلسله
باغلاندی قول قولا مجموع اهلبیت
تبدیل اولوب گروه سلیمان ارامله
ایتدی کسوف نیزه ده اول گونکه خیزران
مثل ذنب بو راسیله ایتدی مقابله
باشون قویوبدی نوک سنان استینه سنان
فوق مقام نقطه ایدوب باء بسمله
هرگون جدا بویی اوجالان گون کیمی باشین
ایلوب حساب مغرب و شامی مراحله
چون گوندی صورتون ای مصحف ازل
غالبدی نور حق شب ظلمات باطله
بیر باش جدا باشیندا نه یول باشلیوب باشون
باشسیز قویوب یتیمی گیدر سمت منزله
گیرم واریمدی قوم جفادن شکایتیم
اما یوخومدی عمه لریمدن منیم گله
عمم قولون قباقه ویروردی ووراندا شمر
ایله عتاب ایدردی او بیرحم قاتله
غافل دگولدی بیرزمان حالیدن اهلبیت
اگلشدیردوله منی همواره محمله
ناگه اوگون ایسسی یورقون مکان غریب
مستولی اولدی خواب من زار و غافله
بیما اولان زماندا نگوردوم که شام اولوب
شام اهلی کوچ ایدوبله گیدوب شامه قافله
من بینوا نوایه گلوب عمه سسلدیم
گوردوم جواب گلمدی مهجور سائله
وحشتله سسلدیم که عمو هاردا قالموسان
فریاده گل که دوشدی ایشیم ایمدی مشکله
گیتدیم گهی یسارو نشیب و فرازه من
قاجدیم گهی یمینیده چوخلی مسافله
مجنون وار سیل سرشک ایلدیم سبیل
تا اگلشیدی لیلی آنام ناقه سی گله
دوشدوم ایاقیدن الیمی اولمادی دوتان
دریای حیرت ایچره یوخ امید ساحله
یازدی بیاض عارضه اشکیم بو مطلبی
آهیم صبا کیمی سنه ایتدی مراسله
گلدی بیرآتلی گرمنی گتدی او طرزیله
یتدیم ولی بو طرزیله قوم قبایله
بابا ایاقیمی ایلدی خارزخمدار
اول زخمیدن علاوه اولوب ایمدی آبله
بو معجریمدی چولقامشام من ایاقیمه
نیلوم گمانیم اولمادی بیراوزگه حایله
آتلو دالینجا قاچمیشام از بس برهنه پا
تا طی اولوب مسافت رهده بو فاصله
وی فوق فرقدان بو ثریایه قیل نظر
گوندر شهاب ثاقبی قوم ارازله
تاپموش سها قدیم چو سها خط نیلگون
جوزای تازیانه دی اوخشارحمایله
قالسا اسیر اولان بالا هرگز گیدرآتا؟
ای مهربان بابا اولی هجران نه بیربیله
من یاتمادیم سن اوردا کول استه یاتان گیجه
ایمدی که تاپموشام گیدوسن اوزگه منزله
معلوم اولان که اینجموسن اهلبیتیدن
گویا که یتمسونله بلاد محافله
باشین دایانماسیدی الردیم بو چولده من
حاشا مسافرین ایتورر یولدا راحله
سینم اولوب چو شخم (ترابی)خراشیدن
تخم محبتین گوگروب گلدی حاصله
شاعر : مرحوم ترابی قفقازی
!!! لطفا با نام کانال گنجینه گذشتگان کپی کنید !!!
نوحه واشعاری درموردشهدا و اسرای کربلا