احوالات دیر راهب 2
دیر راهب
ایدوب مشاهده ناگاه پیر دیرانی
که دیری روشن ایدوب بیر شعاع نورانی
کمال حیرتیله باخدی خارج دیره
گوروب که منزل ایدوب بیر سپه بیابانی
ویروبلا نیزیه بیر باش ، ولی نه باش که باخان
گورر معاینه بیر آفتاب رخشانی
اگر چه بیر نچه گوندور جدا بدندن اولوب
نه بیر طرواتینین نقصی وار نه نقصانی
بعین شاخه سی اوستنده بیر گل تردور
مشام جان آلور اوندان شمیم روحانی
یولون توزی ، یوزینون قانی ، ابر تیره کیمی
دوتوبدی پرده به پرده او ماه تابانی
ایله جمالی تجلاده دور که جلوه طور
اولور مشاهده مبهوت ایدوبدی موسانی
شعاعی یردن ایله آسمانه ساطع دور
سالوب تحیره دوردیمجی گوگده مسیحانی
سوروشدی بو نه قوشوندی؟ بو باش کیمین باشیدور؟
جواب ویردی اونا پیروان شیطانی
قوشون یزیدین ، همین بو باشدا بیر خروج ایدنون
آدی حسیندی که واریدی هوای سلطانی
دئدیکه کیمدی امیروز؟ تانیدیرون منه بیر
نشان ویروبله اونا ابن سعد نادانی
دئدی ویرون بو باشی بیر گجه منه مهمان
که ساخلیوم گوزوم اوستنده من بو مهمانی
الیمده وار منیم اون مین دراهم ارثی
او باش یولوندا سیزه جمله قیلام ارزانی
ویروب دراهمی ، آلدی باشی سروریله
سپهر سینیه باسدی او ماه سیمانی
قلیل قیمته، بیر دولت آلدی ، بیر دمینون
دگلدی قیمتی ویرسیدی ایکی دنیانی
باخوب او گل کیمی باشه دولاردی ابر کیمی
توکردی اشگنی رخساره چشم گریانی
گه آغلیوب ، گهی قلبنده شاد اولور گویا
که دار ظلمدن آزاد ایدوب مسیحانی
گتوردی معبدینه راهب حمیده صفات
سر مطهر آرام جان جانانی
یووب او پاک باشی مشگیله معطر ایدوب
یوزین قویوب یوزینه چکدی دلدن افغانی
مقام راهبه سیر ائت ، قضانین امرینه باخ
که کفره همنفس و همدم ایتدی ایمانی
دئدی قسم ویرورم کردگاره بیرجه دانش
منه نشان ویر اوزون ای عزیز سبحانی
جواب ویردی که من بیر غریب و مظلومم
کسوبله باشیمی لب تشنه قوم سفیانی
ایشتدی بو سوزی راهب دئدی که واضحدی
قتیل ظلم سن ای عدل و داد بنیانی
آدون ندور؟ بیان ایله اوز حسب نسبون
دل آچدی شرح و بیانه او نطق تبیانی
دئدی حسیندی آدیم ، فاطمه آنامدی منیم
آتام علی شه کونین ، سر یزدانی
بابام رسول خدا اسم پاکیدور احمد ص
وجودی گوگلره معراج قیلدی جسمانی
ایشتدی تا بو بیاناتی راهب عارف
علاوه شدت ایدوب دلده سوز پنهانی
ایله شرار غمیله آلشدی یاندی دلی
تر اولدی یوزدن آخان گوز یاشیله دامانی
باخوب او باشه دمادم فغانین آرتوردی
او قدر آغلادی درک ایتدی فیض عظمانی
ضمیر پاکنه بیر تابش ایتدی حق نوری
که رشگ وادی طور اولدی دار ظلمانی
گورن کیمی او کسوک باشدا بو کراماتی
دئدی سنی تانیدیم ای ولی ربانی
بساط قربده بیلدیم قرین عزت سن
سنی عزیز دوتوبدور رحیم رحمانی
گرک قبول ایده سن حشرده مهالکدن
کناره قیلماقی بو غرق بحر عصیانی
دئدی بو کیشیله اولماز سنه بهشت نصیب
بیزیم شفاعتمیزدن اوزاقدی نصرانی
شفاعت ایسته سن اسلام دینین ایله قبول
اوزوندن حشرده رد ایله نار نیرانی
بو عهد ، عهد محمددی(ص) ، نه زمان مسیح
اونون نبوتنون ختم اولوبدی دورانی
گوتور مسیحیدن ال ، قوی کناره انجیلی
نبی عهدی ، نبی بیل ، کتاب قرآنی
موفق ایتدی اونی سر حق ایماسی
شهادتینی دیوب ، کفرین ایلدی فانی
چون اصلی خالصیدی ، چیخدی بوطه دن خالص
اولوب عیار تدینده بوذر ثانی
اولوب او شمع شبستان عشقه پروانه
دولاندی باشینه صبحه تک اول وفا کانی
او وقت اولوب که او مستحفظین بی رحمه
یتوب اسیرلریندن رحیل فرمانی
او باشی ایستدیلر گتدی ویردی ، خواه نخواه
ولی معاینه آیریلدی جسمدن جانی
دئدی او قومه که سیزدن بیر التماسیم وار
قبول ایدون سیزی تاری بو امر آسانی
گلون بو باشی داخی ویرمیون جدا باشنه
بو ظلم بسدور الوزده آخوب سو تک قانی
قبوله قویمادی بو خواهشی سپاه لئیم
برینون یوخیدی بسکه حس و وجدانی
اوجالدی نیزده ده گون چیخمامیش او شمس هدا
گیدردی شامه ایشقلاندیریردی هر یانی
یتوردی گون کیمی سیرین او گون تمامه او باش
که یتدی نیزه باشیندا دیار شامه او باش...
شاعر : مرحوم استاد مشهدی علی اصغر ذهنی
!!! لطفا با نام کانال مدح و مرثیه کپی کنید !!!
احوالات دیر راهب
گوردی راهب نیزده بیر نیر اعظم گلور
وارث اعجاز عیسی بیر مسیحا دم گلور
اندی دیریندن اشاقه پیرمرد خوش مرام
گوردی بیر لشکر ایدوب دیرین ایاقینده مقام
سویلدی کیمسوز رئیسوز کیمدی ای قوم ظلام
بوقشون بو باش بو هنگامه منه مُدغم گلور
ابن سعدی گوستروبلراول سپاه جنگجو
گلدی اوز منظورینی ایتدی سوال اول نیکخو
سویلدی بیز لشکر اسلاموق ای پاکیزه رو
جنگدن فاتح گلن بو رسمدور خرم گلور
بو باش اولموشدی جلال و جاه و منصب طالبی
ضد اسلامه قیام ایتمیشدی بو باش صاحبی
یوللا میشدی بیزلری شخص خلیفه نائبی
گوردی راهب بو قضایا فکرینه مبهم گلور
سویلدی سعد اوغلونا راهب ایدون احسان منه
بو کسوک باشی ویرون سیز بیر گیجه مهمان منه
خدمتی آل زیادین جسمدور هم جان منه
صبح قیترم غلاموز قولینه ملزم گلور
آلدی باشی دیره گتدی پیرمرد پاک ذات
عالم حیرتده اگلشدی اوزی مبهوت مات
فکر ائدردی وار بو باشدا نه مقام عالیات
نیزده گوردوم اؤزوم قران اوخور هردم گلور
یوز ویروب حال وَلَه گوردی سراپا دیرینی
ایلیوب انوار حق وادی سینا دیرینی
مُشک و عنبر دولدوروب چونخلد اعلا دیرینی
باش اولان یردن ظهوره اوزگه بیر عالم گلور
بیر جوان ماهرو آغلار گوزیله با نوا
انبیا و مُرسلینی تک به تک ایلور صدا
نوح و ابراهیم و موسی بیرده ختم انبیا
بیرده عیسی، ابن مریم دوتماقا ماتم گلور
نازل اولدی بیر به بیر گویدن خواتین بهشت
مقدمیله اونلارین رشگ بهشت اولدی کنشت
قامتی خم بیر اوجا بویلی خانم حورا سرشت
موج ایدوب آغلار گوزینده گوز یاشی چون یم گلور
گوئیا اوغلی ئولن مادردی دلده التهاب
مریم و سارایه تکیه ایلوب اول علیا جناب
گلدی باسدی باغرنا باشی ایدوب بیله خطاب
دور اوغول زهرا گلور پیغمبر خاتم گلور
بیله یاتما کعبۀ آمال ارواح عزیز
اچ گوزون ناز ایلمه ای خسرو ملک حجیز
دور انان باخ گور نجه پژمرده حال و اشگریز
چشمۀ چشمی ائدور جاری یوزه زمزم گلور
ایلدی قصد خروج اول ایدن کس لر ولوج
ایتدلر اغلار گوزیله عرش اعلایه عروج
قصد ائدوب زهرائیله مریم ده آخرده خروج
رسمدور باهم گدر هرکیم هارا باهم گلور
شاعر اولدی تا وَلَهدَن راهب نیکو سیر
گوردی خالیدور کلیسا یوخ گلنردن اثر
لمعه لمعه نور اولور اما اوباشدان جلوه گر
منظره هر ذرّه سی بیر نیّر اعظم گلور
گلدی اول باشی گوتوردی وئردی کامل شستشو
قویدی اوز سجاده سی اوسته او مرد نیکو
سوزن مژگانیله ایتدی جراحاتین رفو
سویلدی کیم سن سنه زایر شَهِ خاتم گلور
اولمیوب اولماز بشرده بو مقام و ارتقا
آدوی بُلدور منه ای ماسو اللهه رجا
گر دیسَم عیسی بن مریم سن اولور عرضیم خطا
گورماقا گوردوم سنی عیسی گلور مریم گلور
قانلو لبلر بیر بیره دگدی اولوب ظاهر صدا
ایتدی فرمایش اَنا المظلوم ، مقتول العِدا
سویلدی راهب که مظلوم اولماقوندور بر ملا
محرم سرّ الهی سرّوه محرم گلور
تازدن گفتاره گلدی رأس سلطان وجود
ایتدی فرمایش بابامدور فارقلیط و مودمود
جدّیمی یاخشی تانور قوم نصارا و یهود
آدی هم انجیل و هم توراتیده توأم گلور
اوز بابام یعنی علیدور ایلیا و شنطیا
عالم علم الغیوب و جانشین مصطفا
اولماسیدوق بیز تانونمازدی بو عالم ده خدا
ارتقاء قرب حقّه حبّ میز سُلّم گلور
لطف ایدوب تاج ربوبیت منه حیّ مجید
من اباعبداللهم عیسی ولی عبد عبید
فاطمه، زهرا آنامدور اسمی جنّاته کلید
قارداشیم هاشندی هوشینم یارامدان دَم گلور
عرض ایدوب راهب بو قانلو گوزلرون قربانی من
من گیدوم جنات اعلایه ضماتت ایله سن
ایتدی فرمایش او ترسا پیر شاه ممتحن
حشرده تثلیثیله، گوندوز سنه مُظلم گلور
تیشۀ توحیدیله تثلیث خارین یولماسان
باغ جنت گورمه سن، خالص موّحد اولماسان
شرکدن خالی اولوب توحید حقله دولماسان
کفّۀ میزان اعمالون جزاده کم گلور
عرض ائدوب راهب که تعلیم ایله اسلامی منه
نه دیسم؟ محشر گونی من نائل اولام مأمنه
شاه تعلیم ائتدی اسلامی یتوردی ایمنه
اشگ راهب گل یوزه چون قطره شبنم گلور
حاج ابوالفضل رضائی نوحه خوان با وفا
ای حسینی سندن ائتدی التماس و التجا
دیر راهب نوحه سی گوز یاشلی منظوم اولدی تا
اولدی مولادن توجّه سوز بیله مُلهم گلور
شاعر : مرحوم حسینی سعدی زمان
!!! لطفا با نام کانال مدح و مرثیه کپی کنید !!!
احوالات دیر راهب
كيمسن اي باش معجز عيساني گوستردين منه
قانلي صورتله بوگون معناني گوستردين منه
بير دانیش منله ندن منحور اولوبدور حنجرین
ياره لي باش باشيوه قربان هاني بس پيكرین
نيزه لر اوسته سنيلن همسفردور لشگرین
جلوه عشقینده سن يحياني گوستردين منه
كيمسن اي باش نيزه اوسته اهل عشقه راه سن
آسمان عشقيده قانه بويانمش ماه سن
کیمدی بو قاره گینلر اونلارا همراه سن
ياندي قلبيم خرداجا طفلاني گوستردين منه
كيمسن اي مظلوم اولن قانلي باشین اعجاز ائدیر
جلوه ائيلیر نيزده عشاقه كشف راز ائدیر
سنله هر کیم همسفردور عرش و فرشه ناز ائدیر
وصل ياره چاتماقا ميزاني گوستردين منه
بیر دانیش منله ائدیر هر قلبی روشن سوزلرین
آيه آيه ائیلیري قراني معنا گوزلرین
باش كسن قومه اسير اولموش ندن گل اوزلرین
تا بيليم كيمسن بئله دوراني گوستردين منه
درك ائده بیلمز جلال و شوكتين اهل فتن
سن کلیمه طور سیناده گورنموش جلوه سن
ائتمدون نفرين بو بد طينت لره آيا ندن
سري وار بو رحمت شاياني گوستردين منه
كشتي عشقین مني چكدي بلادن ساحله
آزدي ويرسه م باشيمي عشقین بها سينده صله
ايندي فردوس برين حسرت چكیر بو منزله
رمز و راز عالم امكاني گوستردين منه
خواب غفلتدن اويانديم لطفويله من بئله
راضی اولسا گر حرملر ائتمسه سندن گله
ساخلارام باشین قوناق تا دوشمه سین الدن اله
ابتدای راهیده پایانی گوستردین منه
نه يوزيله محشره آيا گلر بس امتین
دينیني دنيايه ساتدي بيلمدي اوز قيمتین
باشيوي تشنه كسيب آواره ائتدی عترتین
ظلم و جور امت ناداني گوستردين منه
گر بیزه قالسیدی عیسی نبی دن یادگار
ساخلیاردوخ گوزلر اوسته با کمال افتخار
اولدوروب پیغمبرین اوغولون بو امت آشکار
قدرت سيم و زر و دنياني گوستردين منه
مرهميم ده اولماسا سيللم جمالیندن قاني
اولميوب هيچ يئرده گويا استراحت امكاني
قال بو منزلده منه مهمان سنی عيسا جاني
عاشق ائتدین بير باخيشدا جاني گوستردين منه
هر نه امر ائتسن سوزون حجت دی طاعت ائيلرم
دينیوي ائتديم قبول حقه شهادت ائيلرم
هم سنه هم اهلبيته قالسا خدمت ائيلرم
گول یوزونده جنت الاعلانی گوستردين منه
قويسالا هر نه واريم وئره م سني تا ساخليام
هر گئجه شام عزا قوررام دويونجا آغليام
گر چه سايسيزدي ياران امكاني یوخدی باغليام
زخم عشقه مرهم و درماني گوستردين منه
كاش اوليديم سنله اي شه كربلاي عشقده
بذل ائديدیم جانيمي منده مناي عشقده
باش و جان لازم دییل الا هواي عشقده
بزم انس و خلوت جاناني گوستردين منه
بو گئجه سنلن تاپیبدي منزليم عالي صفا
شكري وار چوخ چوخ که من اولدوم سنيلن آشنا
بیر نظر قیل محشره قول شفاعت وئر آقا
اختيار عالم امكاني گوستردين منه
راهبی گوردی تحیرده امام عالمین
نطقه گلدی تا الین دوتسون اونون حبل المتین
من شهنشاه حجازم زاده زهرا حسین
عشقوین وار هر قدر امکانی گوستردین منه
سن مني راهب بلايه توش اولانلاردان سوروش
کربلادن باغری قانیله دولانلاردان سوروش
گل یوزی دوشمن جفاسیندن سولانلاردان سوروش
سن بوگون قلبینده کی ایمانی گوستردین منه
شاعر : استاد محمد هوشمند (مدهوش)
!!! لطفا با نام کانال مدح و مرثیه کپی کنید !!!
کوچ از قتلگاه
باجون زینب گئدیر شامه اویان ای باوفا قارداش
اویان بو کاروانی سال یولا ائیله دعا قارداش
بو چولدن عازمم شامه آلیب اطرافیمی دشمن
سنی دفن ائتماقا امکان یوخومدور نیلییم بس من
سویوبلا قالمیوب اگنینیده حتی کهنه پیراهن
نقدری ظلمده طغیان ائدیب اهل جفا قارداش
اورک درده گلیر باخدوقجا سالم بیر یئرین یوخدور
بدنده یوخ باشین گول پیکرین باشدان باشا اوخدور
انام اوغلی من دیندیر اورکده نیسگیلیم چوخدور
ایشقی گوندوزم سنسیز اولوب لیل دجی قارداش
دگیب از بس یارا نعشون صفالی گلشنه بنذه ر
جهاندا هانسی بیر بلبل منه یا گل سنه بنذه ر
خیامون یاندیربلا بیر داغلیمش خرمنه بنذه ر
منه قالدی بو خرمندن فقط آه و نوا قارداش
منه عزت دی سنله راه حقده اولموشام یولداش
بو یولدا هر قدر گلسه بلا صبر ایلرم قارداش
ولی ایا نجه بو قتلگهده توکمیوم قانیاش
وریب اهل جفا گل جسموه سایسیز یارا قارداش
سن ایچدین جام وحدت باشه یئتدی عهد و پیمانین
بقای دین و قرانی ضمانت ائیلدی قانین
گرک ماهیتن رسوا ائدم من آل سفیانین
بو نهضتدن آلا سرمشقینی اهل ولا قارداش
سنون گلدی یئتیشدی قسمتون فیض شهادتدن
منیمده قدیمی بوکدی فلک اندوه و محنتدن
اگر عومروم کفاف ائتسه قوتارسام بو اسارتدن
گئنه سیراب اولار گوزیاشلاریمدان نینوا قارداش
سنی سالم یولا سالدیم کئچن گون ای شه بطحا
نه بی انصاف دور نه بی مروت لشگر اعدا
کسوبلر اللرین غارت اولوب انگشترین شاها
هانی باشون هانی باشون ده خویش و اقربا قارداش
گئدنده خیمه لردن قتلگاهه روز عاشورا
منی هجران غمی سالدی ایاقدان قالمادی یارا
منیم اومیدیمی ائتدی کرملی اللرون دریا
هانی بیرده باجون آلسین او اللردن شفا قارداش
هانی بیر پاکباز عاشیق سنون تک امتحان وئرسون
هانی بیر مقتدا حقین یولون سن تک نشان ورسون
هانی بیر کس سنون تک یاره حنجردن اذان ورسون
هانی سن تک ذبیح و کربلا مثلی منا قارداش
سنه نامه یازانلار خائن اولدی ایتدیلر طغیان
ایکی نهرین اراسیندا کسوبلر باشیوی عطشان
يري وار ائيلسم تا واردي عومروم ناله و افغان
یارالی باشیوی بیلمم اولوب مسکن هارا قارداش
نظاره ائيلدوقجا بو چوله قلبيم گلير درده
يوخوم دي الده بير حایل چکم گول نعشيوه پرده
نه واردور زینبه امکان نه وار انصاف لشگرده
امان یوخ دفن ائدم یا کی قورام بزم عزا قارداش
بو رونقلی گلستاندا صفادن دویمادیم گئتدوم
اسير اولسامدا هئچ عزت لباسين سويماديم گئتديم
منی عفو ائیله گول نعشون مزاره قویمادیم گئتوم
سنی اللهه تاپشردیم بو سن بو کربلا قارداش
بو لشگردن او قدری اوز وئریب جور و جنایت لر
قوتارماز تا قیامت شرح اولونسا رنج و محنت لر
منه تاپشورموسان آخر وداعینده امانت لر
دعا ائیله ائدیم من دینمی یاخشی ادا قارداش
خیالون راحت اولسون خصم قران کامنه چاتماز
بو قانلی پرچمین آهیم کیمی اوج ائیلیر یاتماز
جهاندا تا کی وار ظالم قیام ایلر بو قان باتماز
اولار حق اهلینه بو قانلی پرچم رهنما قارداش
اگر چی کربلا دشتینده کی غملر سانا گلمز
عنایت اولماسا سیزدن قلم شرحین یازا بیلمز
زیارت ایتمسه مدهوش او قبرپاکی دینجلمز
اوزون یاز هیئتیله بیر برات کربلا قارداش
شاعر : استاد محمد هوشمند (مدهوش)
نوحه واشعاری درموردشهدا و اسرای کربلا