متن و دانلود نوحه های ترکی و فارسی جدید

اربعین حسینی

شامده دور اسارت چون یتیشدی انتهایه

گلدی بیر جمع پریشانیله زینب کربلایه

نقطۀ مقصوده یئتجک ناقه دن اولدی پیاده

مدفن امّیدگاهین تاپماقا ائتدی اراده

خوش زماندا جذبۀ شور حسینی یتدی داده

چکدی اول مظلومه نی قبر قتیل اشقیایه

گوردی قبر وجه حقدن نور وجه حق عیاندی

مین جهان لطف و صفا بیر توده خاک ایچره نهاندی

اول مکان بُلدی یقین قبر حبیب لامکاندی

بیت الاحزاندور او یر ریحانۀ خیر الورایه

نکهت جانبخش خاک کوی یار آلدی قرارین

خون دل ائتدی لبالب جام چشم اشگبارین

شوقیله آغوشه چکدی جان کیمی قارداش مزارین

جوش ائدیب دریای احساساتی گلدی آه و وایه

تا او رنجور غم هجران تاپوب یول بزم رازه

جان و دلدن آچدی دل جانانیله راز و نیازه

منتهای آرزودور عاشقان پاکبازه

صبر ائدوب هجرانه یتماق عاقبت بزم لقایه

منظرینده خاطرات ماسلف تاپدی تمثّل

شعلۀ اندوهه یاندی خرمن تاب و تحمّل

لاجرم اول صبره مظهر ایلدی صبره توسّل

یتمسون تا غم دل شاهنشه ملک ولایه

ایستدی میزان عشقین عرض قیلسون شهریاره

خاطر رنجوری تک اول بینوای بخت قاره

قبری اوسته سالدی بیر پیراهن خونین و پاره

بو نشانی بُلدی بس اثبات صدق مدّعایه

توکدی گوزدن مه یوزه انجم کیمی اشک روانی

لحن دلسوزیله سویلوب اول وفا و مهر کانی

دور ایاقه گلدی قارداش شامده غم کاروانی

ایلینلر هر بلا پیکانینی دلده وقایه

دامن دلدن سیلر هر غم غبارین چشم گریان

محو ائدر هر نقش رنجی لوح لدن دور دوران

تشنه لب جان وئرماقون چخماز ولی یاددان حسین جان

تا وارام بو غمده دلدن آغلارام گلّم نوایه

اولماسا عاشق سمندر آتش سوزانه یانماز

نار شمعه یانسا سوز فرقته پروانه یانماز

آشنا هجرینده یانمش حالینه بیگانه یانماز

طعن ائدر آسوده خاطر پای بند ابتلایه

چون آیوردی جبریله سندن عدو من بی پناهی

اولمادی بیر کیمسه من بی دادخواهون دادخواهی

تا یتورسون قبروه ای زینبون امّید گاهی

دردیمی اظهار ائدردیم بیر به بیر باد صبایه

منده راه عشقده سن تک قدم مردانه ووردوم

اود شرار آهمیله خرمن کیهانه ووردوم

نقش آمال عدونی سکّۀ بطلانه ووردوم

یومادیم تاپسون بنای کفر رفعت پایه پایه

اول زمان که دست بسته اهل بیتون قوم عدوان

چکدیلر بزم یزیده دیده گریان سینه سوزان

خسته و درمانده و رنجور بیر جمع پریشان

جمله اذعان ایلمیش صدقیله فرمان قضایه

تا او بی دین گوردی بو حالیله ال مصطفانی

ناگهان غور ایلدی قلبینده کی بغض نهانی

ائتمدی شرم و حیا اول جام نخوت سرگرانی

آچدی لال اولموش دیلین خصمانه طعن و ناسزایه

قصد استهزا ایدوب گوردوم او شوم پست فطرت

کاسۀ صبریم اولوب لبریز دلدن گئتدی طاقت

دیل لسان الله تک گفتاره من آچدیم او ساعت

بو قَدَر بُلدوم ضرورت وار بیان ماجرایه

گرم بیر لحنیله ائتدیم موبمو شرح حقایق

اولدی مسخور بیانیم هم مخالف هم موافق

بُلدولر قائد اولا دینه دَگُل هند اوغلی لایق

بو مقام و منزلت مخصوصدور آل عبایه

آه او ساعتدن مکان اولدی بیزه کنج خرابه

طرّۀ سنبل کیمی دوشدی اورک لر پیچ و تابه

وئردیلر شایسته منزل عترت ختمی مآبه

اّف اولا واقعده قارداش همت قوم دغایه

جام وصلوندن ایچندن بادۀ هجران رقیه

روز و شب ائیلردی دلدن ناله و افغان رقیه

گوشه ویرانه ده آخرده وئردی جان رقیه

دلده کی چوخ دردی آزعمرین یئتیردی انتهایه

ای مقدس آستانون قبله گاه اهل ایمان

مرقد پاکون مطاف سالکان راه عرفان

شیخ و ((عابد)) حشرده باشه قویانماز تاج غفران

باش اگر قبرونده قویماز عجزیله پائین پایه

شاعر : مرحوم عابد

!!! لطفا با نام کانال مدح و مرثیه کپی کنید !!!