در احوالات حضرت امام حسن مجتبی (علیه السلام)

و گریز به مجلس یزید

قیل بیان قارداش گوروم لعل لبونده قان ندور

قارداشون قربان سنه بو حالیوه عنوان ندور

ای دوزن بیر عمر هر جور و جفای دشمنه

کیم سنی سالموش بو احواله بویور واضح منه

هانسی ظالم بیر بئله ظلمی روا گوردی سنه

لعل لبده قطره قان چون شطۀ مرجان ندور

عمروی قارداش گئچرتدون هر فشار دهریله

حلمدن یوز دشمنه دوندرمدون بیر قهریله

هانسی بی ایمان سنی بو حاله سالدی زهریله

چوخ عجبدور بولمیوب هئچ دین ندور ایمان ندور

آز قالور بحر غمیم موجه گلوب دلده داشا

شیشۀ قلب حسینی کیم نشان ائتدی داشا

دردینی سویلر بئله موقعده قارداش قارداشا

سویله دردون تا گوروم من دردیوه درمان ندور

حسرتیله باخما چوخ توکمه عذاره گوز یاشون

قوللارون سال بوینوما قوی سینمین اوسته باشون

ال ال اوسته منتظردور قارداش آلتی قارداشون

تا گوراخ قارداشمیزدان بیزلره فرمان ندور

بیر سنه مظلومیت تاپموش جهاندا اختصاص

قاتلون گوستر منی ایله بو محنتدن خلاص

قاتلوندن تیغ تیزیله آلوم قارداش قصاص

دشمنون گورسون سنون فرمانیوه اذعان ندور

سن برادر عصریوین بیر نوعیله مظلومی سن

گیزلدیرسن مندن آخر قاتلِ معلومی سن

ای قتیل زهر کین اوز اهلینون مسمومی سن

آشکار ایله گوروم بو نکتۀ پنهان ندور

بو نجه بیر زهردور آرامیوی الدن آلوب

قلبیوین بندین قیروب صبر و توانادن سالوب

باشون اوسته گور باجیم زینب نه احواله قالوب

آتشین آهیله اوندا خاطر سوزان ندور

اهل بیتون آغلادور قارداش اسفلی منظرون

گوسترور بیر اوزگه عالم حال زار مضطرون

بئله کیم قالموش اورک باشنده دائم اللرون

حالی اولدوم من سنون بو حالیوه پایان ندور

ای فلک ای چرخ دون فریاد الوندن الامان

گه حسن لعل لبینده گوسترورسن لخته قان

ووردورورسان گه حسینون لبلرینه خیزران

سنده ای چرخ دنی بو گردش و دوران ندور

اُول قدر وئردون یزید بی حیایه اقتدار

ساخلادی آل علینی مجلسنده بی خمار

گه شراب ایچدی او ظالم اوینادی گاهی قمار

بولمدی دین خدای عالم امکان ندور

قویدی پای تختده سرّ حقین قانلی باشین

خیزرانیله باجی یانینده ووردی قارداشین

قانه دوندردی بو غم آل علینین گوز یاشین

گور یارالی باشه ظالم زادۀ سفیان ندور

باخمادی فرقنده کی داش یاره سیندن قان آخور

یاندرور آخدوقجا قان اطفالینین قلبین یاخور

گه آچور قانلو گوزین اولادینه بیر بیر باخور

آندیرور باخماقلیقی گورسونله بو طغیان ندور

یاد ائدردی بدرده گاهی ئولن اجدادینی

آرتروردی دلده بغض و کینه و بیدادینی

خیزرانیله کسوک باشدان آلاردی دادینی

گه دیردی یا حسین قانلی لب و دندان ندور

گه دیردی تئز قوجالدوبدور سنی بو چرخ پیر

هاردادور گاهی دیردی بس جوانان دلیر

بو اؤزون بو اهل بیتوندور اسیر و دستگیر

گور امیر شماده بیر قدرت و امکان ندور

گوردی گئچدی حدّدیدن آخر یزید کین شعار

باشلادی قرآن تلاوت ائتماقا اُول شهریار

آلدی بو اعجازیله حضّار مجلسدن قرار

بیر بیره سویلوب کسوک بیر باشدا بو عنوان ندور

مجلس اهلی قالدیلار حیران بو سرّ اعظمه

بولدولر محبوبدور اول باش خدای عالمه

اهل مجلسدن اوجالدی قیل و قال و همهمه

گوردولر اول باشدا شور حضرت سبحان ندور

مجلسین اوضاعینه باخجاق یزید بی حیا

آز قالور گوردی او مردود دنی رسوا اولا

عالماً اؤز کفونه اقرار ائدوبدی برملا

سویلدی اول کافر مطلق حسین قرآن ندور

سن ائله قرآن تلاوت نوش ائدیم منده شراب

سن منه وعظ ائتگیلن ایلوم سنه منده عتاب

گون بو گوندور اولموشام دنیاده یاخشی کامیاب

آخرت هنگامه سی یا روضۀ رضوان ندور

اگمدون باش اوّلنده گلمدون سر وقتمه

عاقبت گلدون کسوک باشیله پایِ تختمه

ایندی بیر باخ برج اقبالیمده نجم بختیمه

گور بئله کوکب قبالینده مه رخشان ندور

ائتمیشم بو مجلس عیشین هامی نقصین تمام

تا وئریلسون باشیوه طشت طلا ایچره ممام

سن قوناقیمسن منیم لازمدی ایلوم احترام

حاضرین بولسون جهاندا حرمت مهمان ندور

آفتاب عمر «عاصی» آز قالور تاپسون زوال

گوسترور هر دم عروس مرگ بیر نوعی جمال

لطف ائله ایمانیله یارب آپار وقت رحال

گئتسم ایمانیله خوف و وحشت عصیان ندور

شاعر : مرحوم عاصی تبریزی

 

متن نوحه های ترکی و فارسی