در احوالات حضرت رسول اکرم (صلی الله)
در احوالات حضرت رسول اکرم (صلی الله)
جناب ختم رسالت قوام لنگر دین
پیمبر مدنی مقتدای اهل یقین
شریف مَجمعِ پیغمبران ربّانی
محمّد عربی میهمان عرش برین
جمال انوری آئینه دار نور خدا
غلام درگه اعلاسی جبرئیل امین
علی ولیِّ خدانون مدبّر استادی
وجود اقدسی اهل ولایه حصنِ حصین
رشید قامت و زیبا جمال و خوش منظر
رئوف و خاضع و صاحب دل و گشاده جین
فقیریلن ئوزینه فرق قویمیان رهبر
عوام حقّینه ئوز حقّی تک بصیر و مبین
دیَردی عزت دین باغلیدی مساواته
دیمَزدی عزت دین یعنی کرسی زرّین
یاغاردی نور شرافت گوزل جمالیندن
نه گورمیوب نه گورر مثلینی زمان و زمین
حبیب لم یزلی شمع بزم سر مستان
کفیل امت قرآن وکیل دین مبین
سخن بلیغ و رسا، طرز فکری ارزنده
مَنِشده داغ کیمی سنگین و استوار و متین
بودور دلیلی که ساده کلامی نافذیدی
نه مزد منبر آلاردی نه ئوپدیرردی اَلین
اوخوردی زنده لره آیه آیه قرآنی
مزاریده اوخومازدی ئولنلره یاسین
گیدردی دشمن سر سختینون عیادتینه
بقای دینی بو طرزیلن ایلدی تضمین
تشبّثاب و تکبّر یوخیدی روحینده
دیمَزدی من ایلرم ایسته سم چنان و چنین
خشونت ایلیه بیر یول خبر ویرن یوخدی
تبسّمیله دیَردون اولوب دوداقی عجین
همیشه عطریلی گللر کیمی معطریدی
لباسی،قلبی کیمی ساده بیر پیمبریدی
هدایت ایلدی خلقی مسیر دادگره
مراقب اُولدی حقوقِ مُقرّر بشره
اوتورمازیدی تکبّرله صدر مجلسده
علاقه سی یوخیدی زرق و برق و سیم وزره
سلام ویرمگه سبقت آلاردی هر یِرده
ملاطفت ایلیردی یول اوسته رهگذره
قابار ووراردی الی بس که حضرت ایشلردی
محوّل ایتمزیدی خرجین آیری بیر نفره
او آز در آمده خُمس و زکات پایلاردی
بیلوردی چون عملیلن چاتار سوزی ثمره
جمالینونده اَوَل چیخدیلار وجوهاتین
زکاتی چاتدی گونه خمسی ویردیلر قمره
حسن حسینی آلاردی قوجاقه آغلاردی
دیردی عاشقم الله شُبیریلن شَبَره
صنم پرستیلری حُسن خُلق عظماسی
گتیردی مکتب دین حنیف معتبره
اونون وجودینه خاطر یاراندی ارض و سما
مخیّر اولدی بشر انتخاب خیر و شره
مشاورت ایلیردی همیشه امّتیلن
قولاق ویرردی صبورانه مختلف نظره
گیدردی جنگه دلیرانه صدر لشکرده
سالاردی جان شریفین مصافیده خطره
بیر آزدا سخت دوتاردی یوخون صحابه سینه
غریبه لر دیمه سین لطفی واردی بختوره
یاتاندا فرشی حصیر و عباسی رو انداز
یوخیدی ذرّه پس اندازی هیچ زمان سحره
گیدون گزون اوخیون صفحه صفحه تاریخی
دوشون بیر آزدا حقیقتدن اوتری دردسره
گورون حقوق بشر ادعا ایدنلرده
کیمین بو قدری اولوب اعتناسی کارگره
پیمبری کی الیندن یوپردی روح الامین
اگیلدی کارگرین خاضعانه یوپدی اَلین
غرض مراقب اولوب وجهه شریعتدن
محافظت ایلدی ارمغان نهضتدن
شرافتیله یتیردی باشا رسالتینی
جهانی روشن ایدیب مشعل هدایتدن
صفر آیندا دوشوب باشینه سفر فکری
گل آچدی گل یوزی شوق وصال رحلتدن
عم اوغلوسین ایلدی کفن و دفنینه مسئول
مدینه غرق عزا اولدی فرط محنتدن
بویوردی من گیدورم وعده گاه جانانه
حضور حقّیده بهره آلام حقیقتدن
دیل آچمامیش آتام ئولدی یتیم قویدی منی
گلایه ایلمدیم حکمت مشیتدن
زمانه روحیمی زندان کیمی فشاره سالوب
اَلیم اوزولدی منیم دامن محبتدن
بش آلتی سنّیم اولاردی ننم جوان ئولدی
اَلیمده قالمادی سرمایه صبر و طاقتدن
خلاصه رشد ایلدیم گون بگون رشید اولدوم
تمرّد ایلمدیم حیطۀ نجابتدن
همیشه دوز دانیشوب حقه پاسدار اولدوم
مراقبت ایلدیم پیکر عدالتدن
تلاطم ایلدی دریای رحمت ازلی
یاغوبدی نور کرم بارگاه عزتدن
نبوت حکمینی ویردی منی سفیر ایلدی
یتیشدی سهم کرم سفره کرامتدن
مُبَلّغ اولدم اونون دینینه ایگیر می اوچ ایل
تخطّی ایلمدیم رسم و راه وحدتدن
سینمده چوخ سوزی قبره گرک نهان آپارام
قوتاردی شکر اولا روحیم بو رنج و محنتدن
باغیشلیون منی وقتیم چاتوبدی گیتمه لیم
قوناق حساب ایلیون سیز منی بو ساعتدن
قولاق ویرون دانیشیم آخرین وصایانی
مراقبت ایلیون عترتیله قرآنی
نظرده ساخلیون اوّل رضای ذوالمننی
تَرَحّم ایلیون اولسا کیمین غم و محنی
اگر فقیر و یتیم و اسیره ال دوتسوز
ئولن زماندا منی گوزلروز گورر علنی
روا دگل بیری الوان لباس آلوب گِیینه
یتیمون اولمیا بایرام گونونده پیرهنی
یتیم گورسوز اگر دیندیرون نوازش ایدون
سو ویرمه سوز قوریار رحم و رأفتین چمنی
اولاندا فاتح دعوا اسیره رحم ایلیون
وگرنه قبریده تیترر پیمبرین بدنی
خصوصاً اینکه اگر اولسا قیز اوشاقی اسیر
دوشر اونون یادینا ایل قبیله سی وطنی
امان ویرون چکیلون بیر کناریده دایانون
قویون گلوب قویالار قبره جنگیده ئولنی
کیمین شرافتی اولسا حسینی تک قویماز
و بیرده قلبیده ساخلار محبّت حسنی
بولاردیلار گوزومون نوری احترام ایلیون
خلیفه ایلمیون دین حقّه هر گلنی
پرستش ایلمیون بُت،گناه اعظمدی
امام امت ایدون مرتضای بُت شکنی
قابار ووران اَلی اللهِ ذوالجلال اَلی دی
علی دی امت حقّون شرفلی ممتحنی
علیدن آیری دوشن جنتین یوزین گورمز
طلایه دار ایلیون دینوزه ابوالحسنی
آماندی فاطم نون آستانه سیندن ئوپون
ال آچسا کیم اونا فرق ایلمز ووروبدی منی
قیزیم چوخ آغلاسا مندن صوزا گذشت ایلیون
ئوزوم دعا ایلرم قانلی گوز یاشین سیلنی
او کس که پیرو دین خدادی «غفاری»
تَعَمُّداً ایلمز خلقه مردم آزاری
شاعر : حاج حسین غفاری اردبیلی
نوحه واشعاری درموردشهدا و اسرای کربلا