زبانحال حضرت صغری (سلام الله)

نقدر هجره دؤزوم من علیل و مضطر الهی

گوزوم قالوب قاپیدا هاردا قالدی اکبر الهی

گئدنده وعده وئروبدی گلوب منیده آپارسین

ندندی گلمدی بُلمَم او ماه منظر الهی

مگر آتام اونا طوی دوتدی ایلدی تازا داماد

منِ مریضه نی یاددان چخارتدی یکسر الهی

نه وقته جان قاپیا گؤز تیکوم بو حسرتیله من

یقین گلینجه من ئولّم او ماه پیکر الهی

نه وقته جان گوزیمون یاشینی توکوم من کُلباش

دوشوبدی خاطریمه شیرخواره اصغر الهی

دیوم بو بوش بشیکه من نه وقته جان علی لای لای

بو قانلی گوگلیمه دوشسون نقدر اخگر الهی

دل آچموسان داخی ایندی علی اؤزوم سنه قربان

ندندی بس دئموسن هاردا قالدی خواهر الهی

اولور او گون گورم اصغر باجی دیوب منی سسلر

نثار ائدوم او شیرین دیللرینه شکر الهی

چوخ انتظارم الهی آلوبدی جانیمی محنت

نه وقته تک قالا قوینومدا بس بو اللر الهی

باجیم سکینه نین عالمده یوخدی محنتی من تک

یانیندادیر آتا، عمه، عمو، برادر الهی

آنام وفات ائلیوبدی سالوب آتام منی گؤزدن

داخی خیالینه سالماز منی او سرور الهی

عزیز اولاردیم آنام ئولمه سیدی منده باجیم تک

چکردی نازیمی عزّتله اقربالر الهی

خدا نخواسته گر گؤردوقوم یوخی اولا دوغری

عیان اولور داخی من بی نوایه محشر الهی

قرار صبریمی الدن آلوب بو قورخولی رؤیا

چو مرغ بسمله روحیم بدنده تترر الهی

یوخومدا گوردوم آتام باشینی کسوبدوله عطشان

آلوب آرایه او گل جسمی اهل لشگر الهی

ویروبلا بیر بیرینون اوسته تیر و نیزه و خنجر

آچوب عقاب کیمی تیر و نیزه دن پر الهی

دوتوبدی قان گؤزین آلمیش الینه خنجر عریان

چخوبدی سینه سینون اوسته شمر کافر الهی

علیِّ اکبری گوردوم دوشوبدی قرمزی گُل تک

بدنده صاف یئری یوخ بس ووروبلا خنجر الهی

او نازنین بدنین دوغریوبلا قطعه به قطعه

اولوبدی قانیله رنگین او زلف عنبر الهی

علیِّ اصغری گوردوم بیچوب بوغازینی پیکان

آناسی اللری قوینوندا ناله ایلر الهی

باجیم عروسین اولوب طوی اتاقی مجلس ماتم

عم اوغلی وای او حزینه اولوبدی ازبر الهی

دوشوبدی تپراقا سو اوسته تشنه قولسوز علمدار

دوشوبدی بیر یانا قول، بیر طرفده پیکر الهی

سکینه باجیمی گوردوم سولوبدی غنچۀ گل تک

عمو دیور دولانور سو یولینی گوزلر الهی

بی بیم آچوبدی باشین زفلرین یولور ائدور افغان

دوتوب یوزین نجفه مرتضانی سسلر الهی

یتیشمرم داخی بیرده وصاله یوخدی علاجیم

قالور قیامته دیدار یارو یاور الهی

مریض عشقه علاج ایلمز طبیب مجازی

بو دردیله ئوله جاق «ذاکر» سخنور الهی

شاعر : مرحوم ذاکر مراغه ای

 

متن نوحه های ترکی و فارسی