احوالات ورود به مدینه

ای اهل یثرب اگه اولون  کاروان  گلیر

زینب گلیر بو شهره ولی باغریقان  گلیر

بیر قافله که  گئتدی  گئجه  چوخ جلالیله

ایندی دوشوب بلایه   همان کاروان  گلیر

همتله تئز چیخین قاباقا پیشواز ائدین

یولار یوروبدی کیم گلیری خسته جان گلیر

چوخ غمفزادی قافله ده یوخ دی بیرجوان

هر کس گلیبدی قامتی غمدن کمان گلیر

پیشوازه کیم گئدیر قره گیسین ملالیله

آلعبا اورک دولی درد نهان  گلیر

گلمیر بهشت جوانلارینین سروری داخی

اما باتیدی یاسه بیر عده زنان گلیر

عباس و عون و فضل وعلی اکبر جوان

گلمیر ولی قولاقلارا صوت اذان گلیر

یوخدور ربابین  اصغری آغوشی بوش قالیب

قونداقه لایلای دئیور اول   مهربان گلیر

پیشوازه کیم گئدور صود امر طفل آپارماسین

چونکه  ربابه ناله سسی   چوخ گران  گلیر

یوخ بیر قالان تمام جوانلار شهید اولوب

یاسه باتیب انا باجیلار نوحه خوان گلیر

هر بیر انا کی حسرتیله سسلیر اوغلونی

فریاده ناله سینده  زمین و زمان گلیر

شامات و کوفه نی دولانیبلار نواییله

اودلی نفسلریندن اود کیمی آه و فغان گلیر

تاراج اولوبدی گلشن حق باد ظلمیله

بیر گلستان دی ظلمیله اولموش خزان گلیر

زینب گلیر ولی اغاروب زلفی   قدی خم

اولموش اورک قانی یوزه سو تک روان گلیر

مدهوش اولور قلم  یازیری آیریلیق سوزون

جوهر یئرینه سانکی  قلمد ن ده  قان گلیر

شاعر : محمد هوشمند

منبع : کانال اشعار محمد هوشمند (مدهوش)