در جلالت حضرت زینب (سلام الله)

و گریز به احوالات حضرت امام حسین (علیه السلام)

جهاندا هر نه غمه آشنا اولوب زینب

محیط غصه ودردو بلا اولوب زینب

یازاندا حضرت حق رقعه ی شهادت و خون

شریک نهضت کرب و بلا اولوب زینب

جلال و شوکتینه بسدی بیر فقـط بو سوز

عزیز طائفه ی مصطفی' اولوب زینب

رموز عشقی حسین و حسندن اورگشدی

او دور عقیله ی آل عبا اولوب زینب

واریدی آلتی یاشی آچدی غم صحیفه سینی

انیس محنت خیر النساء اولوب زینب

او گون کی کوفه ده شیر خدا باتوب قانه

جریحه بند سر مرتضی' اولوب زینــب

گوروبدی طشتیده قارداشینون جگرلرینی

دوای درد دل مجتبی' اولوب زینب

اولارکی مشکلی وار دامـــنین دوتار چونکی

آتاسی تک بلی مشکل گشا اووب زینب

اوزی عنایت ایدوب بو سوزی کتابت ایدم

سوزون گریزینی تا دشت کربـلایه گیدم

روایت ایلوری فضه او بانوی والا

کنیز با ادب دختر رسـول خدا

کی اوچ گونیـدی عروسیدی دخت شاه نجف

نه گوردوم آغلوری ایلور فغان و آه نوا

دانشدروب دله گتدیم دئدیم سنه قربان

عروس سن ندور علت آخان بو گوزیاشوا

جواب وئردی حسین یادیمه دوشوب فضه

یوخومدی دلده توانیم منیم بو آیریلیقا

جهاندا بیرگون حسین سیزبوجانی ایستمورم

تمام عالم امکان اولا حسینه فدا

سبب بو گوزیاشیما فرقت حسینیمدور

یاخوندی صبـریمی بو آیریلیق ائده یغما

حسین جسمیده جانمدی سن بولورسن اوزون

علاوه جانیمه روحوم منیم او ماه لقا

جواب وئردیم اونا ای عزیزه ی دوران

بتوله نائبه دلبند حضرت طاها

اجازه وئرسن حسینه خبر وئریم گلسین

گلوب بوگوزیاشووی قارداشون اوزی سیلسین

روانه اولدوم اودم دودمان زهرایه

مریضین حالینی ابلاغ ائدم مسیحایه

عجیبه منظره گوردوم غریبه عالمـــیدی

گوزوم ساتاشدی،حسین،نور چشم طاهایه

گهی گلور،دایانور گاه،حسـرتیله باخور

خیالی وار یئتیشه دلده کی تمنایه

یئتیشدی گوردی یاتوب زینب وفاپرور

سالوبدی نورینی گون اول لطیف سیمایه

عباسین آچدی اودم سایه گستر خلقـــت

سالوبدی خواهر دلبندین اوستونه سایه

گوزونی آچدی اودم باجی،گوردی قاراداشینی

همای بختی اوچوب قوندی عرش اعلایه

دئدی باجون سنه قـــربان ائله داریخمیشدیم

بو وصلته ائدرم نقد جانیمی مـایه

سنون بو لطفووی من بیرگونی عوض ائدرم

باجوندا باخ آنام اوغلی بو عهده ایفایه

چکـور سوزی قلمیم دشت کربلایه طرف

دل فکاریم اولوب ناوک بلایه هدف

محرم آئینون اون بیر گونی زمان سحر

گلوبدی قتلگهه زینب وفا پرور

دولاندی تاپدی باجی قارداشین نجه گوردی

دلیم ده یوخدی توانا ائدم تمام اظهر

نه گوردی گون قاباقیندا یاتوب عزیـز دلی

یارالی جسمینی گون سوزشی کباب ایلر

نه باش بدن ده قالوب نه الی نه ده جامه

سویوبلا پیرهنین لشکر جفا گستر

توکوبدی گوزیاشینی آغلادی او کان وفا

دئدی ئولیدی باجون ای عزیز پیغمبر

بو فکره دوشدی ائده عهدینه خانم ایفا

عزیزه ی علوی دختر شه خیبر

دئدی یادیمدادی قارداش هنوز مرحمتون

هزار حیف یوخومدور عبا و نه معجر

یولوبدی زلفونی توکدی اوجسم عور اوسته

ائدوب عبا یرینه نعشی اوستونه ساتر

دئدی نه یاتموسان ای عالمین جهانبانی

ایاقه دور یولاسال اهلبیت زهرانی

ایا شه شهدا ای سلیل پیغمبر

امید اهل ولا شافع دم محشر

عنایت ایله اوزون "دلجو"ی دل افکارم

مریضیوم بولوسن عشقویله بیمارم

  شاعر : دلجو

منبع : کانال اشعار اصغر گلمحمدی متخلص به (دلجو )