زبانحال حضرت رقیه (سلام الله)

در شهادت حضرت ابوالفضل (علیه السلام)

نه سبب جمالیوه سیل تک آخوری سرشک ترون بابا

عمومون باشیندا نه‌وار بئله چوخالوب غم و کدرون بابا

بوگونی که گون ائلیوب طلوع سنه کربلانی ائدوبله تنگ

توکولوب جوانلارون قانی ائلیوبدی تپراقی رنگ رنگ

نفرات شامیله کوفه‌نی عجبا جری ائلیوب بو جنگ

اولارون سانی چوخالور ولی آز اولور سنون نفرون بابا

گئجه ترک ائدنده مدینه‌نی بوشالاندا ظلمله مسکنون

نه جلالیمیز واریدی بیزیم نه جوانلارون واریدی سنون

اورگیم اولاردی باخاندا شاد ائله با صفائیدی گلشنون

سنی مبتلا بیزی دربدرائلیوبدی بو سفرون بابا

اینانوبدی کوفه جماعتی نه خدا نه دین و نه مسلکه

قوناق ئولدورنلر ائدوب بیزه بو دیاری صحنه مهلکه

سو گتورسه صاحب پرچمون سو یولون کسن چتین اَل چکه

قوشون اهلینون نظری بودور آرادان گئده اثرون بابا

نگراندی بسکه خانم بی‌بیم منی گوندروبدی قباقیوه

هدفیم دگول سنه ناز ائدم آلاسان و یا که قوجاقیوه

دی گوروم عموم نه زمان گلورگتورور سو عورت اوشاقیوه

بالا قیزلارون نظری بودور بویور اولسا هر خبرون بابا

قوریوب دوداقلاریمیز یانور نجه که اوت اوسته یانار کباب

دیریلیقدان اَل چکوب عترتون بوریوب اورکلری اضطراب

اوزادوبدی خیمه‌ده قبلیه علی اصغرینی آنام رباب

اوقدر سوسوز دوداقی اَموب یورولوبدی صودامرون بابا

او زمانکه ایستدی آیریلا گئده کارزاره او بی‌بدیل

قوریان دوداقیمی گوستروب دئمیشم اونا عمو الدّخیل

دولی مشکیله گله عهد ائدوب اَنه تلّی سسلنه السّبیل

هامودان قاباق منه سو وئره او جوان خوش نظرون بابا

اَیاقین قویاندا اوزنگیه منی مطمئن ائلدی سوا

باشیما یغوب بالا قیزلاری عمومی اوزوم ائلدیم دعا

گهی خیمه‌گاهیده اگلشوب چیخورام گهی باخورام یولا

من اوزوم نه تک تَلسورهامی گَله اول وفا سیرون بابا

بو علم که شقّه‌سی سربسر بویانوبدی قانه کیمینکیدور

نه قدر اوخا اونی اشقیا ائلیوب نشانه کیمینکیدور

منه باخموسان اونا هی باخوب گلوسن فغانه کیمینکیدور

عمومون لواسینه بنذیورسینوب اولما شاهپرون بابا

اگر ئولسه صاحب پرچمون چاغیروم گله خانم عمّه‌می

گورورم مناده یورولموسان اونا وئر بو بیرق ماتمی

قوشونون قالوبدی مگر سنون کمک ایلیه آلا پرچمی

سحری نهاره یتورمه‌میش بوشالوبدی دور و برون بابا

بویانوبدی قانیله گل یوزون دوداقوندا وار قان علامتی

عمومون مگر شهدا کیمی واریدی بدنده جراحتی

یره یخسا کوفه‌لیلر اگر او همای اوج شهامتی

سنه صبر مرحمت ایلسون اوزی حیّ دادگرون بابا

سنی عمّه‌مین جانی بیر دانیش سارالوب نه علّته صورتون

نیه باخموسان یوزومه منیم نیه یوخدی صحبته رغبتون

بو گئدیش گلیشده نه گورموسن خم اولوبدی بیر بئله قامتون

اَیاق اوسته دوز دورا بولموسن ائله بول سینوب کمرون بابا