زبانحال حضرت فاطمه زهرا (سلام الله)

ای مُلک ولایتده اولان صاحبِ مسند

وی نائب برحقّ  نبی  وارثِ احمد

بالینیمه گل ای شهِ خوبان ئولورم من

یاسین اوخی ای ناطقِ قرآن ئولورم من

دوققوز ایل عم اوغلی سنه من همنفس اولدوم

آفات خزان ووردی ولی گل کیمی سولدوم

پروانه کیمی شمع وصالونده یاناردیم

گوز یاشیم آخاردی یوزه اشکه بویاناردیم

باشه یتشوب عمروم عم اوغلی بو جهاندا

گوزلور یولومی ایندی بابام باغ جناندا

هرچند کی دعوت شده ی باغ جنانم

افسوس اولا سندن بالالاردان نگرانم

عشقون بولوسن ریشه سالوب جان و تنیمده

بو عشقووه قرباندی حسین و حسنیمده

من مُشتَعِلِ آتش هجران و فراقم

بیر نچه دقیقه سنه بو ائوده قوناقم

عفو ایله منی دلده کی سوز و تبه خاطر

زهرانی حلال  ایله  قیزیم  زینبه  خاطر

ایستورسن اولا روحیمی قبریمده ده راحت

غسل ایله گیجیلن منه ای شاه ولایت

گیزلینجه گیجه جسمیمی کفن ایله عم اوغلی

آغوشووه آل نعشیمی دفن ایله عم اوغلی

قویما قاپیمی یاندیرانی دفنیمه گلسین

یا حقّیمی الدن آلانی کفنیمه گلسین

مندن صورا هیچ من دئمورم آغلاما، آغلا

هجران اوتونا داغلیوسان سینوی داغلا

هر نصف شبی قبریمه دیداره گلرسن

قبر اوسته گَلَنده یوزه گوزیاشون الرسن

تا سوزلرینی رشتیه مرجان کیمی دوزدی

پیغمبره بنذر خانمین گوزلری سوزدی

ترک ایلدی دنیانی گلِ باغِ پیمبر

قالدی الی قوینوندا داخی فاتح خیبر

"دلجو" بو گیجه شعریوه یاخشی صله ایسته

یالوار،گتیر حاجاتیوی بیر بیر دله ایسته

منبع : کانال اشعار اصغر گلمحمدی متخلص به (دلجو )