زبانحال حضرت صغری (سلام الله)

ای جدّه هاچان بس گله جک اکبریم آخر

یولاردا قالوب حسرتیلن گوزلریم آخر

مدّتدی گیدوب یار و انیسیم غم اولوبدور

رعنا قدیم هجرینده گورورسن خم اولوبدور

غم گوشۀ دیوار منه همدم اولوبدور

آرتار گونی گوندن گورورم غملرین آخر

نسگلدی بو غملر بلی من بخت قرایه

آخشاملار اولاندا باخارام سمت هوایه

گورّم چکیلوب گون گلورم آه و نوایه

گلمز داخی بیلّم که برادرلریم آخر

بیر کیمسنه یوخدور سر بالینمه گلسون

مدّتدی قاپوم باغلی قالوب یانیمه گلسون

غم فوجی نه وقته کیمی بو جانیمه گلسون

قوینومدا قالوب حسرتیلن اللریم آخر

گوردم گجه بیر واقعه اولدی غمیم افزون

قارداشیم علی اکبر اولوب قانیله گلگون

باشینی کسوب خنجریلن منقذ ملعون

گورجک اونی سیندی داخی بال و پریم آخر

هم اول صودامر اصغری من زار و حزینه

گوردوم بوغازین اوخلیوب اول لشگر کینه

قونداقنی آلمشدی بابام جدّه الینه

سویلردی خدا ئولدی سوسوز اصغریم آخر

دوردوم یوخیدان جدّه ملالیله هراسان

گوردوم ایلیور بیر قنادی قانلی قوش افغان

قد قُتل الحسین سویلوری هر لحظه و هر آن

معلوم اولا بوندان که سولوب گُللریم آخر

هر کیم ویره بو بزم عزا و غمه رونق

بی شک تاپاجاق راحت و آسایش مطلق

غم ایلمه «مضطر» که یقیناً شه بر حق

سویلر سنه ده کلب در چاکریم آخر

شاعر : مرحوم مضطر اردبیلی