ورود به ماه محرم

گئنه ده زینبون نواسی باشلاندی

بیکفن حسینون عزاسی باشلاندی

عطشان حسینیم وای

عــریان حسینیم وای

بو آیدا فاطمه باشلار غم نوحه سین

ضبط ایلر ملکلر وای حسین وای سسین

زینب غملی اوخشار چوللرده بیکسین

سسلر حسینیمون غم یاسی باشلاندی

زینبون قلبینده دوران مین غم چکدی

بو آیدا قان رنگی نقش ماتم چکدی

گویلره ملکلر قاره پرچـم چکدی

نوحه ی ماتمون صداسی باشلاندی

حسینون تربتی امراضه دوادی

مرکز عشقینون آدی کربلادی

یرلرده عزادی گویلرده عزادی

دنیانین بو غملی هواسی باشلاندی

قانلی بیر کوینگی زهرا الده ساخلار

هی باخار اول قانلی کوینگه دل داغلار

بالاسی ئولن تک حسینه قان آغلار

سویلر کی قلبیمون پرواسی باشلاندی

زینب کربلاده بیر محشر یاراتدی

بیر عریان خنجره مقتلده ال آتدی

حسینون ئولمگی زینبی قوجاتدی

سسلندی باشیمون بلاسی باشلاندی

اول زینب کی قلب قوم کفری یاردی

اول زینب کی گوهر نطقیندن یاغاردی

بیر گونون عرضینده ساچلاری آغاردی

کربلانین اُول دم بلواسی باشلاندی

(نصیری) یازدی بو غم گستر اشعاری

سوغات عشقیدور اربابه آثاری

چیخاتماز یادیندن "زبدة الاشعـاری"

طبعینون موجیلی غوغاسی باشلاندی

شاعر : محمدرضا نصیری میانجی