شروع اعلان عزای حسینی

وقت او وقت اولدی گِنَه ای شیعه لر گِریان اولام

نینوا مِحنت لرینده نی کیمی نالان اولام

عشقیلن گوردوم قرا پرچملر هر یرده اَسور

پرچمه باخدوقجا اهل ناله و افغان اولام

باشدان هر عشقی آتام عشق حسینی ساخلیام

بو مقدّس یولدا توفیق اولسا گَر قربان اولام

اون بیر آی گولدوم نه گوردوم قُوی بِش اون گون آغلیوم

آغلاسام بوردا حسینه حشریده خندان اولام

دسته لر دوشسه یولا قاره گینلر عشق ایدر

ایستورم دیوانه لر تک وارد میدان اولام

نه جهنّم قورخوسوندان آغلیام بو سروره

نه بهشت عشقیله بو غمده یانوب گریان اولام

آغلاماق مَحبوبه دنیاده محبّتدندی چون

ایستورم منده محبّ عترت و قرآن اولام

اولسا توفیقیم بُلم معنای عاشورا ندور

کربلا مظلومینه من آغلیام انسان اولام

خالص و خُلّص حسینه آغلاماق زیبنده دور

راضیم مولا قبول ایتسه سگ دربان اولام

نه هدف اوستونده دوشدی موج دریای غمه

آه نه اندازه گرک من جاهل و نادان اولام

زرق و برق زندگی و طبل شیپور هوس

ویرموری مهلت بیر آزجا صاحب عرفان اولام

بیر آغیز که اوندا ذکر ایتسم حسینون آدینی

پس گرک اوندا عدوی تهمت وبهتان اولام

کینه دولموش سینه لرده چون حسینه یوخدی یر

کینه لی اولماقدان آساندور که بیر حیوان اولام

بو حسین اُلگوی تقوا و فضیلتدی گرک

با گذشت با محبّت ایستورم هر آن اولام

شاعر : استاد حاج غلامرضا عینی فرد زنجانی