بسته شدن راه فرات

باغلاندی چون فرات یولی آل حیدره

فریاد العطش یِتیشوب طاق اخضره

زهرایه مَهر اولان سو حرام اولدی ظلمیله

کرب و بلاده عترت زهرای اطهره

آهو کیمی مَلَردی سیزیلداردی اهل بیت

دوندَردی قیل و قال او بیابانی محشره

ایش یِتدی بیر مقامه که اطفال غشّ ایدوب

بی حسّ دوشدی قالبِ بی روح تک یِره

ناگه سکینه دردینه بیر چاره فکر ایدوب

سقّا حضورینه ایدوب عزم اول مخدّره

تا یِتدی دوتدی عجزیله عبّاس دامنین

سالدی اوزین کنارِ عَمِ مهر گستره

اوّل اَلین دوداقینه قویدی اشارتاً

یعنی باخ ای عمو بو سولان غنچه لبلره

آچدی زبانحال دوتا دوتمیا دلی

تا بلکه شرح حالین اور سرداره بُلدوره

عرض ایلدی عمو نه روادور فرات آخا

آل علی باخوب سویا حسرتله جان ویره

جام اَلده خیمه گاهی سراسر دولانموشام

بیر شربه سو تاپولمادی شهزاده اصغره

نه وار آناسینون سودی، نه وار سو، سوزیدن

دونموش او سود اَمَر بالا مهد ایچره اخگره(تکّه ی آتش)

ایمدی علاج سنده دور ای مهربان عمو

ناچار بیر امیدیله گَلدیم بو محضره

سندن کَسیم امیدیمی بس یالواروم کیمه

نه قاسمه قالوبدی گمانیم نه اکبره

انصافیدور فرات آخا دریا کیمی چوله

بیر مشک سو تاپولمیه اطفال مُضطره

تغییر حال چخدی ابوالفضل خیمه دن

گَلدی حضورِ خسرو بی یار و یاوره

عرض ایتدی سیّدی داخی دویدوم حیاتیدن

خوشدور وجودیم اولسا نشانِ تیغ و خنجره

چوخ التماس و عجزیله اذن آلدی شاهیدن

اولدی سوار عقابینه تا یِتدی لشکره

ظلمت مقابلینده دوروب ماه هاشمی

حیران باخاردی لشکر او ماهِ منوّره

تا ویردی اوز حسب نسبین کاملاً نشان

ایتدی خطاب غیظیله قوم بداختره

آیا تانورسوز، هیچ بُلوسوز کیمدی بو غریب

انصارین اُلدوروب اوزین ایتدوز محاصره

عِلمُ الیَقین ایلدوز انکار جهلیدن

ایتدوز یزیده بیعت، او مرتدّ و منکره

عَینَ الحَیاتیدور بو که منع ایتمیسوز سودان

باعث بودور حیاتوزه ای قوم یکسره

قویدوز امام عصره ندن خارجی آدین

ممکن دگُل حجاب اولا خورشیدِ خاوره

پیغمبر اوغلی، فاطمه نون نور عینیدور

حافظ بو شهریاریدی شرع مطهّره

انصاف ایدون تصوّر ایدون بیر نه سوزدی بو

آد قویموسوز اماموزه عاقّ اولدی کافره

هانسی شریعت حکمی ایله ایلَدوز حلال

بیر قان که نسبتی یِتیشور حیّ داوره

فرض ایلیاق که دینوزی دنیایه ساتمسوز

عاقّ اولموسوز خدایه، امامه، پیمبره

بیر ظلم کی یهود و نصارایه اولمیوب

گوردوز روا بو بی کس و مظلوم سروره

آخِر ندور گناهی بو معصوم اوشاقلارین

سوزِ عطشدن ایله دیلَر غشّ یکسره

باغلاندی هانسی کافر و ترسایه سو یولی

سیز باغلادوز سلاله ی ساقیّ کوثره

«ذهنی» بو نوع اَلده سیزیلدار قلم، بس ایت

یوخسا سالور شرار بو سوزیله اختره

شاعر : مرحوم ذهنی

!!! لطفا با نام کانال مدح و مرثیه کپی کنید !!!