احوالات فرزند شهید مسلم ابن عوسجه

او گونکه درد و بلا کونی بیقرار ایلدی

حسین کمکلری جانانه جان نثار ایلدی

او شاهین الدن عدو یار و یاورین آلدی

او گیر داریده پیغمبر اوغلی تک قالدی

البدی اکبر و عباس و عون و فضل و بریر

سسینه سس ویرن الا خدنگ قالموب غیر

او چولده ایادی هل من معین نقدری ندا

ویرن تاپوامادی بیر کیمسنه سسینه صدا

باخاردی حسرتیله گاه صاقه گاه صولا

یوخودی بیر نفر اول شهریاره ناصر اولا

گوروب امام که بیر نوجوان او دم گلوری

سرشک چشمینی گلدوقجا دیده دن الوری

صغیر دور سورونور تیغینین اجی یردن

باخاردی قدینه چوخ حسرتیله شاه زمن

گلوب سلام ویروب شاه آدین سوروشدی او دم

دیدی که من پسر مسلم بن عوسجیم

اتان الوبدی نیه گلموسن دیدی بالا سن

دیدی که گلموشم ایتماقه جان فدا سنه من

دیدی ایدر آناوا اکتفا آتان الومی

او داغ بسدی داخی گورمیه بالا الومی

خدای حق سنه اجر جزیل ایتسون عطا

دگل آنان سنین الماقیوه دوباره رضا

دیدی که سالما شرر ای شها یانان دلیمه

بو تیغیکه گورورسن باغلیوب آنام بلیمه

نقدری سویلدی ویرموب اجازه سرور دین

قیتدی خیمیه پژمرده دل شکسته غمین

زبسکه ایلدی الحاح و عجز مادرینه

دوروب گلوب ایکیسی شاه دین برابرینه

دیدی ندن بالاما ویرموسن اجازه شها

مگر لیاقتی یوخ اولسون اصغریوه فدا

زبس آنا یالواردی ایتدی داد و فغان

امام ویردی او طفله اجازه میدان

گلوب رجز اوخودی چکدی تیغ او طفل صغیر

ایکی شقینی حیاتیندن ایلیوبدور سیر

آناسی دورموشیدی خیملر قباقینده

اورک ویروب نه که یانسون غم فراقینده

دیردی قانه بویانساندیمه خیال ایدرم

سنه اوغول آنالیق حقیمی حلال ایدرم

یتوب او دمده بیر آتلی مرامینه چاتدی

یخوبدی باشینی کسدی آناسینا آتدی

آناسی گوردی اوغول باشیدور زبس یاندی

باسوبدی سینه سینه قلبیدن الولاندی

یاخوبدی قانین او دم زلف عنبر افشانه

الینده باش قویوب اوز کارزاره دیوانه

گوروب که اوغلی وفاسین جهانه بلدوردی

اوغول باشیله اوغول قاتلینی الدوردی

ستون خیمه نی چکدی اولوبدی داخل جنگ

اوغول غمینده اولوب عرصه چون آناسینا تنگ

امامه ویردیله بو حال ناگواری خبر

آناسی بو بالانون رزمگهده جنگ ایلر

یتوبدی ویردی اونا تسلیت او شاه انام

ایدوبدی عورته جدیم دیدی جهادی حرام

دیدی گذشت ایله نیلوم شها یانور قلبیم

بالام گیدوبدی الیمدن الولانور قلبیم

دوشر بو حاله خدا هانسی عورتین بالاسی

نه چکدی بس گوره سن لیلی اکبرین آناسی

او کونکه تیر بلا قلب عالمی دلدی

علی اکبرینین نعشی خیمیه گلدی

خیام طاهره ده سس دوشوب گلوب اکبر

توکولدی دیشره خیمدن بویوک  کچیک یکسر

تعجم آناسی لیلینین وفاسیندان

خیامیدن ایشیگه چیخمادی حیاسیندان

گوره مباد منی شاه دین اولا غمگین

گله ایله آنا (حامد)جهانه بیرده چتین

شاعر : مرحوم حامد تبریزی

!!! لطفا با نام کانال گنجینه گذشتگان کپی کنید !!!