احوالات جناب حر (ره)

خوش حالینه او کیمسه لرین وار درایتی

شامل اولوبدی حالینه حقین عنایتی

اونلار کی اوز مرامینی دیناره ساتمادی

هول و هراس محشری یاتدان چیخاتمادی

عاقل اودور هر امریده فرجامی آختارا

صادق اودور کی ائیلمییه نفسینه جفا

آزاده مرد اودورکی اولا صاحب اختیار

انسان اودور عمل ائلییه وئرمیه شعار

گر بیر زمانی اولسا هامی شبهیه دچار

عاقل اولان تعقل ائدر حق یولون تاپار

تاریخه عبرت اولدی قضایای کربلا

آیریلدیلار محکده او چولده مس و طلا

بیر بیر او چولده مدعی لر دالدالاندیلار

ناحقه یار اولوب هاموسی حقی داندیلار

هر لحظه دشمنین سایی آرتیب چو مور و مار

تنگ اولدی شاه تشنه لبه حلقه حصار

یتمیش ایکی گهر اوزونی ائیلدی عیان

گورمز مثالین اونلارین هیچ دور و هئچ زمان

ظاهرده آلدی بیر گئجه مهلت او پادشاه

باطنده وئردی بیر گئجه فرصت او پادشاه

فرصت وئریب دی بلکه آچیلدی ره نجات

شمس هدی او جمعه وئره جلوه حیات

افسوس او نوری ظلمت شب درک ائدنمدی

سعد اوغلی نفس خواهیشینی ترک ائنمدی

عاشور عشق تا گون اوزون ائیله دی عیان

اتمام حجت ائیله دی سلطان انس و جان

اما مصمم اولدوی قشون اوز جفاسینه

عقابی بوشلادی هامی دنیا هواسینه

سعد اوغلی ملک ری دن اوتور مست دی مدام

گییدی لباس رزم وئریب لشگره نظام

تجهیز ائدیب سلاحه پیاده سوارینی

تعیین ائدیب امیر یمین و یسارینی

تاپدی قرار مرکز لشکرده اول لعین

وئردی غلامینین الینه کفر پرچمین

آماده اولدی هر ایکی لشکر مقاتله

دولدوری کربلا چولونی شور و هلهله

درک ائیلیوبدی حر او هنگامه ده خطر

دوشدی وجودی لرزیه دیلدن تاپیب شرر

بیر سمتیده باخیر گوروب حق وحقیقتی

بیر یاندا سعدین اوغلون او کان شقاوتی

بیر سمتیده بهشته باخیر دیلده حسرتی

بیر سمتیده باخیر گوروری کفر و ظلمتی

دنیا گوزونده جلوه ائدیری سراب تک

عشقی ولی زبانه چکیردی شهاب تک

بختی اویاندی تاپدی سعادت او باوقار

تصمیم دوتدی جانینی اوددان ائده کنار

مست اولدی کوی عشقیده جام شرابیدن

دریانی گوردی ال چکیب آخر سرابیدن

گوز یومدی ملک و منصب و مال و منالیدن

سرمست اولوبدی جذبه جام وصالیدن

سرعتله عزم کعبه جانان ائدیب دی حر

بیر ایش گوورب کی عالمی حیران ائدیب دی حر

وئردی مس وجودینه عشقیله بیر محک

گلدی بو نیتیله حسینه ائده کمک

بیر آز قالاندا خیمیه ترک ائتدی مرکبین

یاتدان چیخاتدی منزلت و قدر و منصبین

شمشیرین آچدی چکمه لرین سالدی بوینونا

گه اللرین قویوب یوزینه گاه قوینونا

اقرار ائدیب او پاک نهاد اوز گناهینه

سالدی اوزون شکسته کرم بارگاهینه

ائتدی سلام صورتینی قویدی توپراقا

عرض ائیله دی کرم قاپوا گلمیشم اقا

جرمیم بویوک دی دردسره سالمیشام سنی

عفو ائیله فاطمه آناوین حقینه منی

ایوای اوزوم قرادی اگر ائتمسن کرم

بو روسیاهی ائیلمه سوز عفو نیلرم

اولده من اورکلری ظلمیله داغلادیم

اقرار ائیلورم یولی بو چولده باغلادیم

سن شاه با کرامت و من بندیم آقا

ائیله کرم خجالت و شرمندیم اقا

ای فاطمه عزیزی منه ائیله بیر نظر

گور شرمیدن تمام وجودیم نئجه اسر

من گرچي خاطی ام سن هدايت چراغيسان

دارالامان دی درگهین ای شاه انس و جان

اوز جرمیمیمن بویوکولوگونی بیلمیشم آقا

مین بیر امیدیله قاپوا گلمیشم اقا

قوش تک گلیب بو درگه لطفه سیخیلمیشام

ای ذولکرام سن دوت الیمدن ییخیلمیشام

چاره يوخومدي رحم ائله بو حال زاريمه

قویما اسه خزان یئلی فصل بهاریمه

کسدیم یولی حریم ولا اولدی دربه در

شرمندلیق اودیلا وجودیم دوتوب شرر

من بيلمديم كي ايش يئته جاق بو نهايته

سالدیم بو چولده آل رسولی مشقته

مولا سنین كرم قاپوي بيلميشم اوميد

من روسیاهی بیر باخیشا ائیله رو سفید

شانین بیوکدی من بیلیرم قدر و قیمتین

گلدیم چالام امیدیله درگاه عزتون

من گلميشم رضایتیوی اخذ ائدم شها

شرمنده جانی محضروه ائیلییم فدا

سن کشتی نجات سان حق رهنماسی سان

شانین بیوک دی حضرت زهرا بالاسی سان

بذل ائتدی تازه کوینگینی سائیله آنان

بذل ائیله دی رکوع حالیندا اوزوک آتان

جدین رسول فتحیده عفو ائتدی دشمنی

سن بیل رسولین حقی اقا عفو ائله منی

وئرم قسم آقا سنی زهرا و حیدره

عفو ائت منیم گناهیمی رحم ائت بو مضطره

سنسن بو گونده عالم هستیده مقتدا

توبه م قبول اولا منی سن قیل اوزون دعا

کانال اشعار محمد هوشمند (مدهوش)