زبانحال حضرت رباب (سلام الله)

رحم ایله یارب منه یاندی سوسوزدان بالام

واردی امیدیم سنه یاندی سوسوزدان بالام

حقه بالام  سان ویرور

سودامریم جان ویرور

حد  غم  و محنتی  بولسه   بالام  نیلرم

بند    حیاتی  اگر  بولسه   بالام   نیلرم

اللریم اوسته سوسوز ئولسه بالام نیلرم

یوخ سو ویرن سوسنه یاندی سوسوزدان بالام

آل    رسوله   عدو   ساخلامیوب    احترام

باغلادی  سو  یوللارین   لشکر بی عار شام

یوخدی سو الدن گیدور آی تاری دلسیز بالام

یوخدی  دئین  دشمنه  یاندی سوسوزدان بالام

هی  دیورم   یات  بالا  یاتمیور  افغان  ایدور

یوخدی  سودوم  نیلیوم قلبی بو غم  قان ایدور

گوزیاشی غملن دولان سینمی شان شان ایدور

صرصر اسوب گلشنه یاندی سوسوزدان بالام

گون  قاباقیندا   اَرور آرزیلاریم   بوز کیمین

یاره لی قلبه بونون گوزیاشی دور  دوز کیمین

عرش وفادن  سوزور  اصغریم اولدوز کیمین

اشکیم آخور دامنه یاندی سوسوزدان بالام

من  کیمه    ایلوم     گله   لشکر   گمراهیدن

گون کی باتوبدور ولی اوت توکولور ماهیدن

ایستیورم   چاره می   من   فقط      اللهیدن

هی دیورم ذوالمنه یاندی سوسوزدان بالام

گوز قاباقیندا منیم دلبریم الدن گیدور

آغلیورام بو غمه یاوریم الدن گیدور

آغلامیوم نیلیوم اصغریم الدن گیدور

رحم ایلین یوخ منه یاندی سوسوزدان بالام

باری  بو  دشت غمه باد خنک  اسمیور

من باخورام   دلبریم جامۀ هجران گیور

یوخدی دلی گوزلری حسرتیلن سو دیور

آهی سالوب اوت تنه یاندی سوسوزدان بالام

منبع : مجمع شعرا و مادحین