متن و دانلود نوحه های ترکی و فارسی جدید

احوالات حضرت علی اصغر (علیه السلام)

گُلِ قرنفل عجب مشگبودی نکهتی وار

نقدر باخسان اونون برگینون طراوتی وار

عذاری چهرهء جانان کیمی فرح افزا

عرق حساب ایله سن شبنمون شهادتی وار

بو گُل لطیفیدی آرتوخ منیم علاقم وار

بو گل اوزی گلِ گلشندی ، چوخ لطافتی وار

سولان گُلی ، سارالان لبلری خیاله سالور

بصرتیله قیل نظر عجب شباهتی وار

باخاندا غنچه سینه اصغری مجسّم اولور

لطیف گُل دودافیندا عطش حرارتی وار

گوزومده گلشنِ کرب و بلادی جلوه لنور

دروبله گللّری فصلِ خزان علامتی وار

بو گلشنون سارالوبدی گللری اولوبدی خزان

نه غنچه واردی نه گل وار ، نه بیر طراوتی وار

هوا چوخ ایسّیدی گُل یوزلولر سولوبلا تمام

سوسوزلوقون بو مسلّمدی چوخ صعوبتی وار

رباب آلوب الینه شیرخواره اصغرینی

گورور اونا عطشین موجبِ هلاکتی وار

نه قدر دل دیوری اولموری بالا آرام

نه واردی صود نه سو ، نه صبره استقامتی وار

سودان کناره دوشن بیر بالیق کیمی چابالور

علاجی یوخ آنانون ، نیلسون نه قدرتی وار

نقدر دل دئدی شهزاده اولمادی آرام

دل آنلامور عطشین بسکه دلده شدّتی وار

آلوب ال اوسته گتوردی امام محضرینه

کنیزیون دئدی دلده آقا بو حاجتی وار

آپار بو غنچه نی میدانه بلکه سو ویره لر

سوسوزدی رنگی سولوب احتضار حالتی وار

نجه شقی اولا دشمن ، بونا ترحّم ایدر

صغیر اوشاقدی نه تقصیری نه عقوبتی وار

امام آلوب آناسیندان گتوردی میدانه

بویوردی بو اوشاقون مصطفایه نسبتی وار

گَلون اوزوز آپارون ایلیون بونی سیراب

بالام الولانوری حالِ پُرملالتی وار

امام عالِمیدی اصغری سو ایچمیه جاق

سو ایستماقدا و لیکن بیر اوزگه نیّتی وار

بو قصدیله اولارا حجّتی تمام ایلسون

صباحِ حشرده بو ظلمدن شکایتی وار

بیر آز او نحویله اتمام حجّت ایتدی امام

کلامِ حقّدی چون سوز ، سوزون حقیقتی وار

مؤثر اولدی گلوب نالیه بیر عدّه سپاه

چکوب سس آغلادیلار ، معتبر روایتی وار

او وقتده شهِ دینه باخوردی سعد اوغلی

گوروب او حالی بولوب صدمهء ریاستی وار

امامون عِلمینه چون آشنائیدی او لعین

نقدری قوّهء تقریری وار فصاحتی وار

بیر آز دانشسا او منوالیله او شاهِ غریب

او لشگرین عدمِ رغبت و اطاعتی وار

یا : یزید سلطنتده شکست علامتی وار

اشاره حرملیه ایتدی ساکت ایله بونی

بولوب بو فَنّده اول ناکسون مهارتی وار

بیر اوخ کمانه قویوب آه یا امامِ زمان

کیمون بو قصّه نی شرح ایتماقا جسارتی وار

هواده مَشی ایلدی خطّ سِیرینی پیکان

نجه دیوم نه محلّه اونون اصابتی وار

دیمم صراحتا" امّا بو قدر عرض ایلرم

او نازک حلق که بیر غنچه دن لطافتی وار

گوروم الی شل اولیدی او گونده حرمله نون

دیمه که شمرون او اندازه ده شقاوتی وار

بیر ایله حالته سالدی امامِ تشنه لبی

یقین که قتلِ حسینه اونوندا شرکتی وار

آتا الینده بویاندی او غنچه گُل قانه

بیر عمر آغلاماقا بو سوزون کفایتی وار

دیسم بوغازی کسیلمیشدی ، اوخ بوغاز کسمز

دیسم غلطدی ، روایتده ذبح علامتی وار

چکوب اوغول بوغازوندان اوخی امامِ مجید

تصوّر ائت نقدر دلده صبر و قدرتی وار

دئدیم امام اوخی چکدی بو اشتباه اولدی

امامون اوز قولی مجروح اولوبدی ‌، صحبتی وار

دوتوبدی اوجونا قانین آتوب سمایه طرف

که یعنی هر غمه بو بیکسون رضایتی وار

او قانیله بالانون بیرده تللرین بویادی

مُزیّن ایتدی او زینتده قصدِ قربتی وار

چون ایلمیشدی او قربانی حق یولوندا فدا

نگار تحفه سینون حق یانیندا قیمتی وار

او تحفه نی بَزَدی بزمِ یاره گوندردی

اودور هدیه سینون حق یانیندا قیمتی وار

عجب بولوندی سنون قدرون ای علی اصغر

همین بو مطلبه بو عرضیمون اشارتی وار

مین اوچ یوز ایلدن اضافه گچور شهادتدن

هنوز اهلِ ولانون سنه محبّتی وار

سنون نقدر آدون ذکر اولور مجالسده

او قدر تازه لنور قلبلر ، اُبهّتی وار

بو رسمدور علمالر سنه توسّل ایدر

سنون توسّلوین خلق ایچینده شهرتی وار

عبث یره آقا باب الحوائج اولمامیسان

یتشماقون او مقامِ رَفیعه علّتی وار

صغیر سنّیله سن دینه خدمت ایلموسن

همین او خدمتیوین حق یانیندا اُجرتی وار

اودور خدا شهدادن سنی ایدوب ممتاز

مقامیوین هامی دللرده رشک و حسرتی وار

عجب مقام ویروب خالقِ جلیل سنه

کیمون سنون کیمی آفاقده جلالتی وار؟

ایدلّه غبطه تماما" مقدّساتِ جهان

او مدفنه که حسینون او یرده تُربتی وار

سنون مقامِ مَنیعون او یردن افضلدور

سنون یاتان یریوین عرشه افضلیّتی وار

مقام و مَسکن اولوب سینهء حسین سنه

او سینه ای که اونون بی عدد جراحتی وار

او سینه ای که اونا شمر چکمه لی چخدی

او سینه ، مخزنِ علمِ خدادی ، حرمتی وار

غرض او غنچه امامون الینده اوخلاندی

تصوّر ایله او شاهون نقدر رقّتی وار

او شهریاره بو محنت ایله مؤثر اولوب

دیسم سزادی که نه حدّی وار نه نهایتی وار

اونا بو نسگلی اکبر غمیندن آرتوخ اولوب

گواهی واردی دیمه بو سوزون مذمّتی وار

بولوردی اکبر آناسی علی قتاله گیدوب

مآلِ کارده حتما" غمِ شهادتی وار

ولی بونی آناسیندان آلوب ایده سیراب

سو ویرمیوبدیله اگنینده قانلی خلعتی وار

سو ایچمیوب بو دگل انفعالینون سببی

رباب گورماقا آیا بو حالی طاقتی وار؟

سبب اودور یوزی گلمز خیامه قیترسون

آناسینا نجه رد ایلسون که خجلتی وار

نجه توقّف ایدوب رزمگاهیده دورسون

صراحتا" دیمورم دشمنین شماتتی وار

اودور که گاه گلور خیمه گاهه ، گه قیدور

گورون غمون نجه اول شاهه اکثریّتی وار

همین بو قصّهء جانسوزی نقل ایدر راوی

یازور قلم ولی یازماقلیقا ندامتی وار

دییر باخوردوم او احواله چوخ تحیّریله

دئدیم خدا گوره سن بو ایشین نه حکمتی وار؟

نیه امام گیدور خیمیه گینه قییدور

بو گیتماقون بو قیتماقدا نه ضرورتی وار؟

باخاندا خیمیه گوردوم بو علّته او غریب

گیدور نه خیمیه ، میداندا نه اقامتی وار

دوروبدی خیمه قاپوسیندا بیر خانم عورت

اوزی مُجلّله ، معلومدور نجابتی وار

کمالِ یأسیله هر دم باخوردی میدانه

ولی حیاسینه اعمالینون حکایتی وار

یقینیم اولدی او محبوبه دور اوغول آناسی

نشان ویرور که نه اندازه شرم و عفّتی وار

امام گوردی گرک چاره یوخ خیامه گیده

آناسینا بالانی ویرماقون ضرورتی وار

چاغوردی زینبِ کبرانی ای آنام باجی گَل

بالام سو اولمادی ، قان ایچدی خوابِ راحتی وار

ربابه دئ نگران اولما آغلاماز بیرده

سو ایستمز دمِ پیکانیله سقایتی وار

ایا امامِ زمان ، شیعه لر امیدی آقا

بو (خوندلون) سیزه اخلاصیله ارادتی وار

نولور که ایستیَسن مشگلین خدا ایده حلّ

یقیندی هر نه دعا ایتسن استجابتی وار

اوزی مریضیدی مدّتدی تاپولموری چاره

بدنده طاقتی یوخ ، دلده درد و محنتی وار

مرام و مقصدی دلده فقط زیارتدور

بیر عمردور که اونون حسرتِ زیارتی وار.

حاج حیدر خوندل

 تایپ و نشر برای اوّلین بار بدون ویرایش